Hemsereka Konseya Rayberdişî ya KCKyî Besê Hozat bîye meymana 'Bernameyê Taybetî' yê Medya Haber TVyî. Hozate xeylêk babetî ercnayî û bale ante tecrîdê vera Rayberê Şarê Kurdî Abdullah Ocalanî ser.

Qiseykerdişê Hozate ra beşêk wina yo:

''Îmrali de 22 serran ra nata huqûqo bêexlaq û îlegal yeno caardene. Îqtîdarê AKP-MHPyî 6 serranê peyênan de huqûq bi temamî bin pay kerd. Hînî seba tecrîdî destê îqtîdarî de argumanêk zî nêmend.

CPTyî tecrîdê Îmraliyî eşkera kerd. Almanyaya ke paştî dayêne Tirkîya, hînî resaya a noqta ke sîstemê îşkenceyî qebul nêkena, nêpawena. Almanya bi eşkerayîyêka raporê CPTyî sey Konseya Ewropa qebul kerd. Sîstemê îşkenceyî yê Îmraliyî sîstemêko mîyanneteweyî yo. Ewropa zî hînî tecrîd ne qebul kena ne zî pawena û tecrîd kena rojdemê xo. Hêzê hemkarê sîstemê tecrîdî hînî nêwazenê tecrîd dewam bikero. 

Dewleta tirke sîstemê tecrîdî vera kurdan tim sey hacetê şantajî xebitnena. Ewropa zî tecrîd vera Tirkîya sey hacetê şantajî xebitnena. Ma hêvî kenê ke hînî do wina nêbo. Eşkerayîyê ke hê yenê dîyenê girîng ê. No ma rê destkewteyêk o zî. Hîşmendîya dewleta tirke ya ke Rayber Apo tecrîd kerdo nika hetê dinya ra yena tecrîdkerdene. 

Paradîgma, fikr û îdeolojîya Rayber Apoyî hetê pêro şaran ra bi sempatî yenê pêşwazîkerdene. Şarî wayîrê Rayber Apoyî vejîyenê. Sîstemê Konfederalîzmê Demokratîke û Neteweyê Demokratîkî yê Rayber Apoyî her ke şino vila beno û beno alternatîfê çareserîye. Na safha de tecrîd hînî bîyo pûç. Nika çîyo ke ganî bêro kerdene azadîya Rayber Apoyî ya. Hemleya ma seba naye zaf eleqe dî û her kes wayîrê hemle vejîya. Nika her ca de azadîya Rayber Apoyî rojdemo verên o. Ganî ma pê qerardarî dewam bikerê ke tira netîceyêke bigêrê.

Hemleya ma hemleyêka neteweyî ya. Vera kurdan çar parçeyanê Kurdîstanî de  hema zî polîtîkaya qirkerdişî yena caardene. Kurdan bi hîşmendîya neteweyîye cewabê hemle da. Rojawan, Vakur, Rojhelat û teberê welatî de bi hêzî wayîrê hemle vejîyayî. Ganî ma bi xurtî dewam bikerê. Ganî çalakîyê hîrayî zêdêr bêrê kerdene.

Azadîya Rayber Apoyî rojdemê şaranê dinya û hêzanê demokrasîyî de ya. Ê zî wayîrê na hemle vejîyenê. Heta nika xîretê azadkerdişê Rayber Apoyî bi serkewtişî dewam kerd û ganî wina dewam bikero. Ma do Rayber Apo û Kurdîstan azad bikerê û faşîzm birijnê. Her ca de seba naye îmkanî estê. Bi xoverdayîşê nikayênî na hemle do ser bikewa.''