Merkezê Çapemenî û Îrtîbatî yê HPG’yî derheqê hêrişanê dewleta Tirkî yê hemverê sivîlan ê Başûrê Kurdistanî eşkerayîyêka nûştekîye weşanaye.

HPG’yî da zanayene dewleta TC’yî ya îşxalkare hemverê destkewteyanê Kurdan de ê Kurdistanî de dest bi hêrişanê neweyan kerdo. Eşkerayîye de ame vatene, “No zihnîyeto ke bi hawayêkê barbarî hêrişê şarê ma û ercanê şarê ma kena, cehd kena ke pêroyê Başûrê Kurdistanî îşxal bikero. Dewleta Tirkî ya îşxalkare bi paştdayîşê teknîkî, bi zanabîyayîşî merdimanê ma yê sivîlan ser o bombayan varnena. Nê hêrişan ra yew 12’ê Hezîrane qezaya Amedîye ya Duhokî de ame kerdene ke xeylî wareyanê sivîlan ser o bombayî ameyî varnayene. Na çarçewaye de teyareyanê şeran saet 13:30 wesayîtêkê sivîlan ser o dewa Guherze ser o, şand de di wesayîtê sivîlî yê ke dewa Sergele ra şîyêne, keyeyêkê dewa Derê ser o û îstasyonêka petrolî ya şarê sivîlî ya mabênê Sulawe û Amedîye ser o bombayî ameyî varnayene. Rîyê nê bombardumanan ra tayê hemwelatijê ma yê sivîlî birîndar bîyî.”

‘Tc ya Îşxalkare Wazena Çimê Şarî Bitersno’

Eşkerayîye de ame pêhesnayene ke dewleta Tirkî bi zanabîyayîşî hêrişê ca û wareyanê sivîlan kena, wazena bi çimtersnayîşî şarê herême bifetesno û ame vatene, “Hêrişê ke bi paştdayîşê teyareyanê bê merdiman ameyî kerdene de bi giranî merdimê ma yê sivîlî yewser ameyî hedefgirewtene. Dewleta TC’yî ya îşxalkare ke wazena Başûrê Kurdistanî bi temamî îşxal bikero, seba ke şarê ma bi ruhê Şeladizê hemverê îşxalkarîye de xover nêdo, nê hêrişan kena. Nê hêrişê ke yenê kerdene qismêkê planê îşxalkarîye yê.

Bi nê hêrişan ma reyna vînenê ke dewleta TC’yî ya kolonyalîste teberê mergî de û xirakerdişî de Kurdan rê çîyêk rewa nêvînena û seba nê hêrişanê xo Gerîlayanê Azadîya Kurdistanî kena mazeret. No zihnîyeto ke verî zî xeylî merdimê ma yê sivîlî qetil kerdî, nê hêrişî sey hêrişanê hemverê gerîlayan ramotî. Cayo ke ê qalê ci kenê cehd û têgêrayîşê gerîlayanê ma çino. Bombakerdişê benzînxaneyî û rayîranê pêroyîyan tirêm hêrişêko bi zanabîyayîşî nêyo? No zihnîyeto ke wareyo ke wesayîtê sivîlî ci ra ravêreno bomba keno, bi polîtîkaya tersnayîşî wazeno ke çimê şarê Başûrê Kurdistanî bitersno.

‘Hemverê Hêrişan Ganî Her Ca de Xoverdayîş Bibo’

Rixmo ke cayo ameyo bombardumankerdene gerîlayê ma çinê zî artêşa Tirkî ya îşxalkare bi teyareyanê keşfî bi zanabîyayîşî herême ser o bombayî varnayî. Ganî şarê ma her ca de hemverê nê hêrişanê ke şarê ma yê Başûrê Kurdistanî ser o ameyê kerdene de hurzo we, bêveng memano. Amacê dewleta Tirkî qirkerdişê Kurdanê azadan o. ganî hemverê nê hêrişan de çar perçeyê Kurdistanî bibê yew û hemverê hêrişkarîye de mucadele bikerê. Gerîlayê azadîya Kurdistanî do hemverê îşxalkaran de seba azadîya şarê ma mucadele bikerê û plananê îşxalkarîye bin fînê. Ma seba merdimanê ma yê ken ê hêrişan de birîndar bîyê şîfaya xeyrî wazenê.”