Merkezê Îrtîbatî û Çapemenîye yê HPGyî  bi eşkerayîyêka nuştekîye da zanayene ke  Endamê Fermandarîya Eyaletî yê Heftanînî Bargiran Erkendî hêrişê hewayî de şehîd kewt.

Eşkerayîya HPGyî de nê ameyî parekerdene:

''Hêrişê îşxalî yê dewleta tirke yê vera herêma Heftanînî serrêke û 5 mengî xo dima verdayî. Xoverdayoxê Heftanînî ke vera îşxalkeran çarçewa Hemleya Şorişgêre ya Cengê Heftanînî mucadeleyo tarîxî danê destanê xoverdayîşî yê tarîxî nusenê. Artêşa tirka îşxalkere heme hêzê xo yê teknîkî Heftanîn de şuxulna. Serreke û nêmî de bombardumanê bêhûmare kerdî. Operasyonê hewayî bêmabên ameyî kerdene. Rixmê nayî îşxalkerî nêrasayî hedefê xo û derbê pîlî werdî. Îşxalkerê ke badê xoverdayîşê Sûr û Nisêbînî sendromî ciwîyayî vera xoverdayîşê Heftanînî hîşê înan kewtê têmîyan û psîkolojîya înan xeripîyaye.Hemleya Cengê Heftanînî biye hêvîya heme şaran ê bindestan. Bêşik o ke na hemle de bedelê pîlî ameyî dayene. Şexsê ruhê xoverdayîşî yê Rûbar, Berîtane, Zelale, Mazlûm û Tolhîldanan û serkêşîya xoverdayîşê cinîya azade ya kurde Esmere û Nucanan de  destanê neweyî ameyî nuştene.

Serkêşê no xoverdayîşî ra yew zî Endamê Fermandarîya Eyaletî yê Heftanînî Bargiran Erkendî bi ke wextê hêrişî ra nata xoverdayîşê Heftanînî de rolêko aktîf kay kerdêne. Fermadanranê ercîyayeyî yê xoverdayîşê Heftanînî ra hemrayê ma Bargiran 20ê tebaxa 2020î de hêrişê hewayî yê vera Heftanînî de tewrê kerwanê şehîdan bi.

Nameyê Qodî: Bargiran Erkendî Name û Peyname: Hasan Guner Cayê Bîyayîşî: Adana Maye-Pî: Dîvane-Mahmût Tarîx û Cayê Şehadetî: 20ê Tebexa 2020î /Heftanîn

Hemrayê ma Bargiran Erkendî herêma Garisa ya Botanî de keyeyêkê welatperwerî yê dewa Erkendî de ame dinya. Rîyê hêrişê dewleta tirke ra pîya bi keyeyê xo mecbur mend ke metropolî rê bar bikero. Hemra Bargirano ke Kurdîstanî ra dûrî bi pîl serranê xo yê hurdîyan de vera dişmenî sere wedarit û bi generalanê qican ra yew. Hema 14 serre bi ke kewt zîndan. Hem zere de hem zî bado ke vejîya teber de mucadeleyê xo rê dewam kerd û reya bînî ame tepiştene. Bado ke serbest veradîya narey verê xo da koyanê azadan ke mucadeleyo xurtêr bikero.

Hemra Bargiran bi kulturê keyeyê welatperwerî, karekterê ci yê mutewazî û grane û tecrubeyê xo yê zîndanî sefanê gerîlyan de rewî ra game pîlî eştî û bi fermandarêko nimûne. Xakurkê ra heta Garê, wextê hêrişê DAÎŞî de xeylêk cayê Kurdîstanî ke newe ra ameyî azadkerdene ra heta xoverdayîşê Cengê Heftanî bi qerardarî şer kerd û keda pîle daye. Hemra  Bargirano ke mîlîtananê serkêşan ê PKKyî ra bi netîceya tecrubeyanê xo de Fermandarîya Eyaletî yê Heftanînî rê ame tayînkerdene ke hetê embazanê xo ra zaf ameyêne sînayene. Hemleya Şorişgêre ya Cengê Heftanîn de rolo pîl kay kerd. Xeylêk çalakîyî plan kerdî, pratîk de ardê ca û derbê pîlî dayî dişmenî ro.

Vatêne ''Ma do ser bikewê! Yewna rayîrê ci çîn o! Ma soz dayo Şehîdan, Rayberîye û şarê xo. Ma do nê dişmenî na herre ra vejê. Ma nika Heftanîn ra dest pê kenê.''

Çalakîyê serkewteyî yê qilanê Şehîd Mervan, Konferans, Partîzan, Şehîd Berîvane û Dupîşkî ê bi xo koordîne kerdî. Operasyonê şorişgêrî yê Pibula yo ke 8ê tebexe de ame ekrdene û 22 îşxalkerî ameyî kiştene, 8ê înan birîndar bîyî û 2 helîkopterî ameyî derbkerdene rê fermandarîye kerd.

Hemrayê ma Bargiranî cuyaya mucadeleyî ya 20 serran, gerîlatîya 17 serran de her tim bi ruhê fedayî, coşê şorişgerî nefes bi nefes rayra şi û xo dima mîraso pîl yê mucadeleyî verda. Ruhê mucadeleyî yê fermandaranê pîlan ê Hemleya Şorişgêre ya Cengê Heftanînî ra hemra Bargiranî ma do sey nimûne bigerê û xoverdayîşê şorişî xurtêr bikerê. Şarê Botanî yo welatperwer û ciwananê Kurdîstanî ra do bi hezaran Bargiranî bivejîyê û ey tim bidê ciwîyayene.

Ma sere de keyeyê ercîyayeyî yê hemrayê xo fermandar Barginî, şaro welatperwer ê Erkendî û Kurdîstanî rê serweşîye wazenê.''