Merkezê Îrtîbatî û Çapemenîye yê HPGyî bi eşkerayîyêke 3 gerîlayî serrgêra şehadetê înan de yad kerdî.

Eşkerayîye wina ya:

''19ê temmuza 2019î de warê Şehîd Serxwebûnî yê Amedî de hêrişê artêşa tirke ya îşxalkere de fermandarê ma yê ercîyayeyî Numan, Erhan û Delîl şehîd bîyî. Nê embazanê ma bi serran seba têkoşînê azadîye kedê pîlî dayî. Ê pê cuyanê xo yê derwîşwarîyan, embazîya xo ya samîmîye û tewrbîyayîşê xo yê bêhesabî ganî hetê pêro embazan û şarî ra sey mîsalî bêrê girewtene. Ma sey embazanê înan xo sey bişansî vînenê ke înan reyde vera kolonyalîzmî têkoşîn kerdo. Ma soz danê ke vîrameyîşê înan do bikerê sebebê zêdînayîşê têkoşînî. Ma fermandaranê xo yê ercîyayeyan Numan, Erhan û Delîlî serrgêra şehadetê înan de reyna bi rêzdarî yad kenê. Sere de keyeyanê înan ê ercîyayeyan rê, pêro şarê welatperwerî yê Kurdîstanî rê serweşîye wazenê.

Nasnameyê embazanê ma yê şehîdan wina yê:

Embaz Numan Êlih de dadîya xo ra beno.  Embaz Numan wexto ke Zanîngehê Dîcle de waneno, Newroza 1992yî de zanîngehî verdeno û tewrê gerîlayan beno. Embaz Numan verî Xakurkê de gerîlatîye keno dima zî 6 serran Zap de wezîfe keno. 1999 de o sey fermandarêkî derbazê Amanosan beno û prosesê xoapeyantişî de zî derbazê Herêmanê Pawitişî yê Medya beno. 2000 ra heta 2005 o Qendîl, Garê û Metîna de têkoşîn keno, 2003 de Akademîya Leşkerî ya Mahsum Korkmazî de perwerde vîneno. Seba Hemleya 1ê Hezîrane 2005 de derbazê Amanosan beno û tewrê hemle beno. 2008 de Dibistana Merkezî ya Partîye de perwerdeyê îdeolojîkî vîneno. O 2013 ra heta 2019î sey fermandarêkî Amed de wezîfe keno. Embaz Numan pê tecrubeyê xo yê 27 serran beno wayîrê perspektîfêkê raştikênî. Embaz Numan 19ê temmuza 2019î de tewrê karwanê şehîdan beno. Embaz Numan pê tewirê xo yê çêrî tarîxê ma de ca dayo xo. Têkoşînê ey do bêmabên dewam bikero, vîrameyîşê ey do bêro pawitene û armancê ey do bêrê caardene.

Embaz Erhan Qers de dadîya xo ra beno. O 5 serran mîyanê xebatanê ciwanan de ca gêno û 2005 de tewrê gerîlayan beno. O hemleya tirsanê gandaran de verê xo dano koyan. Embaz Erhan tewrê Hêzanê Taybetan beno û tim keno ke xo xeta fedayîtîye ser de aver bero.

Embaz Erhan 2014 de verê xo dano Vakurê Kurdîstanî û Amed de sey şerwanêkî têkoşîn keno. Embaz Erhan tim keno ke bibo layîqê Rayber Apoyî, naye ser o xo perwerde keno. O 19ê temmuze de pa embaz Numan û Delîl Amed de şehîd beno.

Embaz Delîl Mûş de dadîya xo ra beno. Embaz Delîl wexto ke zanîngeh de waneno bire dano ke verê xo bido koyan û Newroza 2014î de tewrê gerîlayan beno. Embaz Delîl Eyaletê Amedî de bi xîretêkê pîlî têkoşîn keno û pê kesayetê xo beno mazharê heskerdiş û hûrmetê embazanê xo. O tim xîret keno ke xo pê perwerdeyan aver bero. Embaz Delîl seba şarê xo û têgêrayîşî beno fermandarêko marîfetîn û pêro wezîfeyanê xo nê esasî ser o bêkêmasî ano ca. Embaz Delîl pa embaz Numan û Erhanî warê Şehîd Serxwebûnî yê qezaya Licê de şehîd beno.''