HPGyî nasnameyê 2 gerîlayan eşkera kerdî
HPGyî nasnameyê 2 gerîlayanê şehîdan eşkera kerdî û vat: ''Embaz Agir û Fedakar hem pê tûjîya xo ya xoverdayîşî, hem zî pê tewirê xo yê şehadetê bêteredûtî seba pêro embazanê xo bîyî xeta xoverdayîşî.''
Merkezê Îrtîbatî û Çapemenîye yê HPGyî bi eşkerayîyêke nasnameyê di gerîlayanê ke 17ê nîsane de şehîd bîyî eşkera kerdî. Eşkerayîye wina ya:
''Tîmê hereketînî yê gerîlayan vera hêrişanê îşxalî yê dewleta tirke pê taktîkanê gerîlatîya modernîteya demokratîke derbaznê tewr pîlan ê tarîxî danê. Westayê nê taktîkî embazanê ma Agir û Fedakarî pê xoverdayîşê xo derbê giranî dayî dişmenî ro. Embaz Agir û Fedakarî prosesê şerê çetinî de bi çêrî vera dişmenî şer kerd û sey fermandaranê serkêşan ê xoverdayîşî tarîx de cayê xo yo rûmetên girewt.
Nasnameyê embazanê ma yê şehîdan wina yê:
|
|
Nameyê Qodî: Agir Botan Name û Peyname: Serhat Sakçi Cayê Bîyayîşî: Şirnex Maye-Pî: Şahîye – Ramazan Tarîx û Cayê Şehadetî: 17ê Nîsana 2022yî / Herêmê Pawitişî yê Medya |
|
|
Nameyê Qodî: Fedakar Cudî Name û Peyname: Alî Îbrahîm Cayê Bîyayîşî: Kobanê Maye-Pî: Cemîle – Ebuzeyt Tarîx û Cayê Şehadetî: 18ê Nîsana 2022yî / Herêmê Pawitişî yê Medya |
Embaz Agir Cizîre de dadîya xo ra bîyo. Embaz Agirî verî mîyanê xebatanê şorişî de ca girewt. Embaz Agirî dima 2015 de vera hêrişanê îşxalî verê xo da refanê gerîlayan. Embaz Agir cade cuya gerîlatîye musa. Ey hîna zaf warê Zapî de xebatî kerdî, tewrê xeylêk çalakîyan bi û tecrubeyêko pîl vist dest. Embaz Agirî dima perwerdeyê fermandarîye girewt. Ey warê fermandarîye û îdeolojîkî de marîfetêko pîl qezenç kerd û sey fermandarê yewinî derbazê Zapî bi. Embaz Agirî 17ê nîsane de wexto ke hêrişanê îşxalî dest pêkerd, tîmanê hereketînan rê fermandarîye kerdêne. Ey bi erkê xo derbê giranî dayî dişmenî ro. Embaz Agir sey sembolêkê Xoverdayîşê Zapî tim do bêro vîrardene.
Embaz Fedakar Kobanê de dadîya xo ra bîyo. Embaz Fedakarî 2014 de wextê hêrişanê DAÎŞî yê vera Rojawanî de verê xo da koyan û bi gerîla. Embaz Fedakarî koyan de hertim xo aver berd, giranîye daye taktîkanê gerîlatîya dewrê neweyî. Embaz Fedakar waştişê xo ser o derbazê Zapî bi û warê Zapî de pê kesayetê xo embazanê xo rê bi mîsal. Ey xoverdayîşê Zapî yê 2021î de kedêka pîle daye, tecrubeyêko pîl vist destî û xo şerê hîna çetinî rê amade kerd. 17ê nîsane de wexto ke hêrişanê îşxalî dest pêkerd embaz Fedakarî mîyanê tîmanê verênan de ca girewt û derbê giranî dayî dişmenî ro. Embaz Fedakar sey şerwan û fermandarêkê xoverdayîşê Zapî tarîx de cayê xo girewt.
Embaz Agir û Fedakar hem pê tûjîya xo ya xoverdayîşî, hem zî pê tewirê xo yê şehadetê bêteredûtî seba pêro embazanê xo bîyî xeta xoverdayîşî. Ma sere de keyeyanê ercîyayeyan ê embazanê xo rê, pêro şarê welatperwerî yê Kurdîstanî rê serweşîye wazenê.''
