Merkezê Îrtîbatî û Çapemenîye yê HPGyî bi eşkerayîyêke nasnameyê di şehîdan eşkera kerdî. Eşkerayîye wina ya:

''3ê teşrîna verêne ya 2022yî de warê Amanosî de hêrişanê artêşa tirke ya kolonyalîste de embazanê ma Kemal Çîya û Rustem Efrînî heta nefesê xo yê peyênî, bi qehremanî şer kerd û şehîd bîyî ke nê embazanê ma serranê dergan Amanos de gerîlatîye kerde. Nê embazanê ma erazîyê çetinî yê Amanosan de bi beşdarîya xo ya fedakare û fedayîye embazanê xo rê serkêşîye kerde û vilabîyayîşê têkoşînê ma yê azadîye de rolêko pîl kay kerd. Nê embazanê ma her hela xo seba azadkerdişê şarê ma xerc kerde û sey serkêşanê şarê ma tarîxê xoverdayîşî de cayê xo girewt. Embazanê ma Kemal û Rûstemî ma rê mîrasêkê têkoşînî yo zengîn verda. Ma soz danê ke qetî têkoşînê embaz Kemal û Rûstemî biresnê serfîrazîye.

Nasnameyê embazanê ma yê şehîdan wina yê:

Nameyê Qodî: Kemal Çiya Name û Peyname: Ahmet Aza Cayê Bîyayîşî: Efrîn Maye-Pî: Zeynepe – Nurî Tarîx û Cayê Şehadetî: 3yê Teşrîna Verêna 2020î / Amanos

Nameyê Qodî: Rustem Efrîn Name û Peyname: Alî Adnan Şêr Cayê Bîyayîşî: Efrîn Maye-Pî: Fîlyare – Adnan Tarîx û Cayê Şehadetî: 3yê Teşrîna Verêna 2020î / Amanos

Embaz Kemal Efrîn de dadîya xo ra beno. O hema domanîya xo de PKKyî şinasneno û destpêkê Şorişê Rojawanî de serra 2012î de tewrê gerîlayan beno. Embaz Kemal Zap de perwerdeyê verênî gêno. O bi taybetî şuxilnayîşê çekanê giranan de xo aver beno. Embaz Kemal 2014 de vera DAÎŞî Şingal û Rojawan de şer keno. Embaz Kemal tecrubeyanê pîlan ra dima sey fermandarî agêreno koyan. O 2015-2016 de Vakurê Kurdîstanî de xoverdayîşê xoîdarkerdişî nêzdî ra teqîb keno û waştişê xo ser o derbazê Vakurî beno.  Embaz Kemal bi nê hawayî derbazê Amanosan beno. Embaz Kemal Amanosan de derbanê giranan dano dişmenî ro, serkêşîya çalakîyan keno û qesasê embazanê xo gêno. Embaz Kemal Amanosan de heta nefesê xo yê peyênî têkoşînî ra tawiz nêdano.

Embaz Rûstem qezaya Cindirêsî ya Efrînî de dadîya xo ra beno. Embaz Rûstem verî xebatanê Şorişê Rojawanî de cagêno û dima zî şerê vera cerganê DAÎŞî de têkoşîn keno. Embaz Rûstem 2016 de tewrê gerîlayan beno. O Amanosan de dest pê gerîlatîye keno û tîya de perwerde gêno. Embaz Rûstem tim embazanê xo rê beno çimeyê moral û hêzî. O xeylêk çalakîyanê serkewteyan de cagêno. O tim pê bawer keno ke Şorişê Kurdîstanî ancax bi bedelan û têkoşînê pîlî do bêro caardene û coka kedêka pîle dano. Embaz Rûstem pêro embazanê xo rê beno nimûne û tewrê karwanê şehîdan beno.

Sere de keyeyanê înan ê ercîyayeyan rê ma pêro şarê welatperwerî yê Kurdîstanî û Efrînî rê serweşîye wazenê. ''