Merkezê Îrtîbatî û Çapemenîye yê HPGyî da zanayene ke di gerîlayî şehîd bîyî û nê pare kerdî:

''Hemrayanê ma Şervan û Agirî bi ruhê fedayîtîye têkoşîn kerd  û seba ke têkoşînê ma yê azadîye dahîna bibo gird çîyo ke destê înan ra ame kerd. Wird embazê ma hêrişê dişmenî de têkoşînê ma kirişt serpilikî û tewrê artêşa bêmergan bîyî.

Nasnameyê hemrayanê ma yê şehîdan wina yê:

Hemrayê ma Şervan dewa Mametxanî ya qezaya Gîyadînî de yeno dinya û  leyminîya modernîteyî ra dûrî dewe de beno pîl. Gama ke rîyê şertenê zehmetan ê ekonomî ra şino metropolanê Tirkîya tîya hîna eşkera polîtîkayanê îmha û înkarî yê vera kurdan vîneno. Hemrayê ma Şervan 2015 de semedê pawitişê erd û şarê xo tewrê sefanê gerîlayan beno.

Herêmanê Pawitişî yê Medya de perwerdeyanê bingeyînan vîneno û nasname û tarîxî xo dahîna hol nas keno. Dima ra xo hem hetê leşkerî hem zî hetê îdeolojî ra aver beno û sey gerîlayêke serkewteyî ver bi fermandarîye gamanê zixman erzeno. Rayîrê heqîqetî de semedê pawitişê ercanê kurdan têkoşîn keno. Vera hêrişê îşxalî şerê  pawitişê Başûrê Kurdîstanî de Metîna ra heta Mexmûr û Kerkukî mîyanê têkoşîn de cayê xo geno û heme wezîfeyan xo bi serkewtişî ano ca.

Hemrayê ma Agir keyeyêkê welatperwerî de yeno dinya û bi tradîsyonê welatperwerîye beno pîl. Seba ke wayîrê nasname û xo ercanê kurdan vejîyeno xeylêk rey yeno destbendkerdene la çirey vera zextan milê xo çewt nêkeno. Tim sereberz dahîna qerdar têkoşînê xo domeneno. Tewr penî verê xo dano koyanê Kurdîstanî û tewrê sefanê gerîlayan beno. Roja verêne ya tewrbîyayîş xo ra heta hela şehadetî tim bi ruhê fedayîtîye wezîfeyanê xo ano ca û hetê embazanê xo ra zaf yeno heskerdene.

Ma sere de wird keyeyanê erjîyayeyan ê hemrayanê xo Şervan û Agîrîyî, şarê welatperwerî yê Kurdîstanî rê serweşîye wazenê û soz danê ke ma do têkoşînê hemrayanê xo şehîdan biresnê serkewtişî.''