Merkezê Îrtîbatî û Çapemenîye yê HPGyî nasnameyê di şehîdanê Zapî eşkera kerdî. Eşkerayîye wina ya:

''2022 de hêrişê îşxalî yê artêşa tirke ya kolonyalîste Herêma Şehîd Delîlî ya Rojawanê Zapî de serkêşîya YJA-Starî de hetê hêzanê ma ra, bi xoverdayîşêkê pîlî ameyî pêşwazîkerdene. Îşxalkerî rixmê hêrişan û teknîkê xo zî pê xoverdayîşê gerîlayan nêeşkayî û neçare mendî ke xo apey biancê. 20ê temmuza 2023yî de îşxalkeran reyna hêrişê Warê Xoverdayîşî yê Girê Cûdîyî kerd la reyna embazanê ma yê fedayîyan derbê giranî dayî nînan ro. Embazanê ma Robîne û Yildize  sey milîtananê YJA-Starî yê fedayîyan Girê Cûdî kerd kela, serkêşîya pratîzekerdişê xeta Apogîre û ê netîceya hêrişanê îşxalkeran de şehîd bîyî.

Embazanê ma Robîne û Yildize Warê Xoverdayîşî yê Girê Cûdîyî de rayîr nêda îşxalkeran, pawitişê ci de kedêka pîle daye, derba verêne daye dişmenî ro û nêverda ke îşxalkerî aver şorê. Embazê ma Robîne û Yildize cuye de pê tewirê milîtanî û şer de pê ruhê fedayîyî şîyî serê îşxalkeran û xoverdayîşê înan do tim vernîya ma roşnî bikero. Ma sere de keyeyanê înan ê ercîyayeyan rê pêro şarê Kurdîstanî yê welatperwerî rê serweşîye wazenê. Ma soz danê ke mîrasê înan ê xoverdayîşî biresnê serfîrazîye.

Nasnameyê embazanê ma yê şehîdan wina yê:

Nameyê Qodî: Robîne Avent Name û Peyname: Sîdar Erol Cayê Bîyayîşî: Wan Maye-Pî: Kiymete – Reşît Tarîx û Cayê Şehadetî: 25ê Temmuza 2023yî / Zap

 

Nameyê Qodî: Yildize Şahîn Botan Name û Peyname: Ronahîye Qarih Cayê Bîyayîşî: Kobanê Maye-Pî: Zerga – Bilal Tarîx û Cayê Şehadetî: 25ê Temmuza 2023yî / Zap

 

 Embaza ma Robîne Wan de dadîya xo ra bena. A hema domanîya xo de PKKyî û têgêrayîşê azadîye şinasnena. Embaze Robîne 2015 de di kênayanê apanê xo reyde verê xo dana koyan û bena gerîla. A Kelareş de gerîlatîye musena û dima derbazê Xakurkê bena. Embaza ma Robîne perwerdeyî ra dima verê xo dana Zapî û tîya de sey gerîlayêka YJA-Starî taktîkanê dewrê neweyî de bena westa.

Embaza ma Robîne Warê Xoverdayîşî yê Girê Cûdîyî de bena wayîra kedêka pîle. A Hemleya Şehîd Savaş Maraşî de hêrsê xo yê vera dişmenî eşkera kena û bêteredutî şina dişmenî ser. Ma do xoverdayîşê aye qetî bi serkewtişî tacîdar bikerê.

Embaza ma Yildize Kobanê de dadîya xo ra bena. A hêverî xebatanê ciwanan ê Şorişê Rojawanî de cagêna û dima ra  2018 de Efrîn de, 2019 de Serêkanîyê de têkoşîn kena. Embaza ma Yildize di kekanê xo ra dima 2019 de tewra gerîlayan bena. A rixmê ciwanîya xo zî 2021 de tewra Hêzanê Taybetan bena û tîya de zî performanêkê serkewteyî mojnena. Embaza ma Yildize Girê Cûdîyî de Hemleya Şehîd Savaş Maraşî de cepheyê vernî de şer kena. Embaza ma Yildize xeta milîtanîya PKK-PAJKî de pêro erk û mesuldarîyanê xo tim ana ca. A tim pê têkoşînê xo bena layîqa şehîdan û Rayber Apoyî. A milîtanîya YJA-Starî kesayetê xo de eşkera kena. Ma do mîrasê aye yê têkoşînî bi serkewtişî tacîdar bikerê.''