Merkezê Îrtîabatî û Çapemenîye yê HPGyî derheqê şehîdanê Werxelê de eşkerayîye daye û nê pare kerdî:

''Artêşa tirke ya qirkere 23ê nîsana 2021î de vera Avaşîn, Zap û Metîna hêrişê îşxalî da destpêkerdene. Vera nê hêrişî xoverdayîşo biheybet ê tarîxê kurdan ame dayene. Gerîlayanê Azadîye yê Kurdîstanî  rixmê heme bêîmkanîye bi îradeyê Apoyî xover da û dişmen bin fîna. Şerê tunelanê Werxelê darbeyê pîlî dayî dişmenî ro. Dewleta tirke ya ke rixmê heme hêrişanê xo ser nêkewt çekê kîmyewîyî şuxulnayî. Netîceya nê hêrişî de tunalanê şerî yê Werxelê de Jînda, Amara û Ozgur şehîd bîyî. Dima ke hemrayê  ma Celal  û Mazlûm şîyî cayê embazanê xo ê zî tesîrê çekanê kîmyewîyan ra şehîd bîyî. Ma embazanê xo yê erjayeyan bihurmet yad kenê û sozê caardişê waştişanê ci danê.

Nasnameyê hemrayanê ma yê şehîdan wina yê:

Nameyê Qodî: Celal Fedakar Name û Peyname: Bestûn Bekir Cayê Bîyayîşî: Silêmanî Maye-Pî: Emîne-hacî Tarîx û Cayê Şehadetî: 26ê Êlula 2021î / Avaşîn

Nameyê Qodî: Jînda Ronahî Name û Peyname:  Hevîne Hesen Cayê Bîyayîşî: Efrîn Maye-Pî: Emîne-Abdo Tarîx û Cayê Şehadetî: 23ê Êlula 2021î / Avaşîn

Nameyê Qodî:  Amara Çiya Name û Peyname: Zîlane Mûhammed Cayê Bîyayîşî: Dirbêsiyê Maye-Pî: Nadya-Mûhammed Tarîx û Cayê Şehadetî: 23ê Êlula 2021î / Avaşîn

Nameyê Qodî: Ozgur Bedran Name û Peyname: Nesîp Ekîn Cayê Bîyayîşî: Sêrt Maye-Pî: Erdeme-Resûl Tarîx û Cayê Şehadetî: 23ê Êlula 2021î / Avaşîn

Nameyê Qodî: Mazlûm Batman Name û Peyname: Umran Kaya Cayê Bîyayîşî: Êlih Maye-Pî: Gulcîhane-Mehmet Tarîx û Cayê Şehadetî: 26ê Êlula 2021î / Avaşîn

Hemrayê ma Celal Silêmanî de ameyo dinya û tim têkoşînê azadîye yê Kurdîstanî tim yew hesibnayo. Coka binê tesîrê îdeolojîya azadîye yê Rayber Apoyî ya ke serêkeşîya partîya ma PKKyî de hetê Kurdîstanî ra vila bîya de mendo û tim waşto bîbo gerîla. Gama ke artêşa tirke vera 2018 de vera Efrînî hêrişê îşxalî da destpêkerdene ey zî verê xo da sefanê gerîlayan. Bado ke waranê gerîlayan de perwerde girewt xeylêk wext Avaşîn de mend û tewrê zaf çalakîyan bi.  Nê çalakîyan de sey gerîlayêkê profesyonelî ca girewt û derbeyê pîlî dayî dişmenî ro.

Hemraya ma Jînda waro xoverdayox ê Rojawanî Efrîn de ameya dinya, bi hîkayeyanê qehremanîye yê PKKyî bîya pîl û tewrê  Şorişê Rojawanî bîya. Bado ke Rojawan de tewrê xeylêk xebatan bîya 2017î de verê xo dayo koyanê azadan ê Kurdîstanî. Hemraya ma Jînda xo her hetî ra perwerde kerd û sey gerîlayêka profesyonele ya YJA Starî Avaşîn de tewrê çalakîyan bîya. Tewr peynî de şîya ceyê embazanê xo yê tunelanê Werxelê û tewrê xoverdayîşê pîlî bîya.

Hemraya ma Amara bajarê Dirbesîyê ya Rojawanî de ameya dinya û bi kulturê welatperwerdîye bîya pîl. Pîya bi Şorişê Rojawanî Têkoşînê Azadîye yê Kurdîstanî nas kerd û 2015 de tewrê sefanê gerîlayan bîya. Bi felsefeya Rayber Apoyî xo resnayo û bîya gerîlayêka serkewtîye. Zafê wextê gerîlatîya xo Avaşîn de ravêrnayo. Bi taktîkanê şerî yê cîya cîyayan tunelanê şerî de darbeyê xurtî dayî dişmenî ro.

Hemrayê ma Ozgur Sêrt de ameyo dinya û keyeyêko Têgêrayîşê Azadîye yê Kurdîstanî de bedelî dayî de bîyo pîl. Seba ke keyeyê ci mecbur mendo metroplolan rê bar bikero Kurdîstanî ra dûrî de bîyo pîl.  Ciwanîya xo ra tewrê xebatan bîyo û çirey raştîya xo ra nêqerfîyayo. Sere de Komalên Ciwan xeylêk xebatan de ca girewt û rîyê xebatanê legalan ra 13 mengî zîndan de mendo. Badê zîndanî 2015 de verê xo dayo koyanê Kurdîstanî û Avaşîn de tewrê gerîlayan bîyo. Bi felsefeya Rayber Apoyî xo aver berdo û bîyo mîlîtanêko serkewte. Badê pewerdeyî reyna agêrayo Avaşînî û tîya xoverdayîşê tarîxî de cayê xo girewto.

Hemrayê ma Mazlûm Êlih de ameyo dinya û bi destananê qehremanîye yê gerîlayan bîyo pîl. Hemrayê ma Mazlûmî gama ke metropolan de xebat kerdêne polîtîkaya qirkere ya dewleta tirke ya vera kurdan holêr fam kerda û kewto qesasgirewtişî dima. Bado ke çeteyanê DAÎŞî hêrişê Rojawanî kerd warê Amedî tewrê sefanê gerîlayan bîyo. Tîya wextêk perwerde dîyo û ravêrto Kobanê û tewrê xeylêk hemleyan bîyo. Dima ra 2017 de verê xo dayo koyanê Kurdîstanî.  Garê, Cîlo, Zap û tewr peynî de zî Avaşîn de gerîlatîye kerda.

Sere de keyeyê erjayeyî yê hemrayanê ma Celal, Jinda, Amara, Ozgur û Mazlûm yê ke bi şerê tarîxî zerîya şarê ma de ca girewt û ma rê mîrasê xoverdayîşî verda, wa sereyê heme şarê welatperwerî yê Kurdîstanî weş bo.''