Hunermendê dêrsimîjî Raber Dîlerî îfade kerd ke ziwanê kirmanckî (kirdkî) binê tehlukeyê çinbîyayîşî de yo û ganî pêro hemwelatîyî wayîrê ci vejîyê.

Hunermend Raber Dîlerî da zanayene ke ganî dadî û babîyî keyeyê xo de domananê xo reyde bi kirmanckî qisey bikerê û vat: ''Eke ma keyeyê xo de tirkî qisey bikerê ziwanê ma do vîr a şoro. MA girîngîye nêdanê ziwanê xo ser. Hînî dewan de zî ti bi kirmanckî zî qisey bikerî her kes bi tirkî cewab dano. Teberî seba çinkerdişê kirmanckî xîretêk esto. La eke ma tay aktîvîteyî bikerê ma eşkenê ziwanê xo bipawê.''

Raber Dîlerî ard ziwan ke o bi ziwanê xo hunerê xo keno û vat: ''Kirmanckî ziwan û kulturê min o. Ez bi ziwanê xo ber ana. Muzîk zî seba ke ziwanê ma vîn nêbo kede dano. Ma eşkenê bi muzîk, tîyatro, estanikan ziwanê xo vila bikerê, qeyd bikerê.''

Hetê bînî ra Dîlerî eşkera kerd ke hunermendî wextê pandemî de xeylêk tengîye ancenê û vat: ''Ez hunermendo herêmî yê Dêrsimî ya. Pandemî ra mi qewexaneyan de deyîrî vatêne la nika ê zî girewte yê. Ma binê şert û mercanê zoran de yê.''