Pisporê Huqûqê Mîyanneteweyî û Avûkat Hêjar Nûredîn Kakeyîyî derheqê hêrişê vera kurdan û  tekîlîyanê hêzanê kurdan de  ANFyî rê qisey kerd.

Kakeyîyî serewedaritişê Rojhelatê Kurdîstanî û Îranî nîşan da û vat: ''Serewedaritiş kontrolê hukmatê Îranî ra vejîya kewt binê kontrolê şorişgêran. Tirkîya de zî  hukmat krîz de yo  û goreyê anketan rayê îqtîdarî zaf kêm bîyî.  Tirkîya û Îran kenê ke serê krîzanê xo bîgêrê. Erdogan seba ke weçînitiş de ser bikewo, bi polîtîkayanê taybetan krîzan şarî ra nimneno. Seba ke ser bikewo şerê vera kurdan giran keno.

Dişmenê kurdan vera kurdan bîyî yew. La hêzê kurdan eksê ci kenê. Bitaybetî Başûrê Kurdîstanî de destkeweyî binê tehlukeyî de yê. Operasyonê sîyasî û leşkerî yê dewleta tirke yê vera Başûrê Kurdîstanî destkewteyanê Başûrî erzeno tehluke. Eceb o ke hukmatê Başûrî na raştîye nêvîneno û fam nêkeno. Beno ke destkewteyê Başûrî şewêke de çîn bibê. Numûnêyêkê nê 16ê teşrîna verên a 2017î de ame ciwîyayene. A roje ma dî ke mîyanê 24 saetan de nîmeyê herra Başûrê Kurdîstanî kewt destê hêzanê Iraqî.

Eke Tirkîya, Îran û Iraq pê bikerê, tehlukeyê çînbîyayîşê destkewteyan zaf gird o. Ganî hêzê kurdan meseleyanê mabênê xo caverdê, semedê çar leteyanê Kurdîstanî bibê yew û çarçeweya neteweyî de bigurîyê. Eke hêzê kurdan bibê yew eşkenê hêrişanê vera kurdan û Kurdîstanî betal bikerê.  Senî ke dişmen kurdan cîya nêkeno, ganî kurdî zî xo mîyanê xo de cîya mebê, verê hêrişan bêrê têhet.''