Endamê Komîteya Rayberdişî ya PKK’yî Dûran Kalkanî ard ziwan ke weçînitişanê cayîyan ê 31’ê Adare de tîfaqê AKP-MHP’yî yê hemverê Blokê Demokrasîyî yo ke dorê HDP’yî de amebi têhet bin kewt.

Kalkanî ANF’yî rê qisey kerd û nê vatî:

“Serê weçînitişê cayîyî yê 31’ê Adare ra 15 rojan ra vêşêr ravêrto la hewna zî netîceyê ci hetê sazîyanê eleqedaran ra tam nêameyê eşkerakerdene. Na babete de xusûsen zî sazîya ke ci ra Heyetê Weçînitişî yo Berz yeno vatene sey şaxêkê AKP’yî şuxulêna. Kurdistan de tayê şaredarîyê ke kewtê destê HDP’yî dayê AKP’yî.

Rasta ci şarê Kurdî, hêzanê demokratîkan, bi kilmî hêzanê muxalefetî serkewtişêko pîl fîna dest. Rixmo ke tîfaqê AKP-MHP’yî heme îmkanê dewlete fînayî dewre netîceyêko winayên vejîya werte. Blokê demokrasîyî yo ke dorê HDP’yî de ame têhet sey 7’ê Hezîrane bi ser kewt. Ez netîceyanê weçînitişî şarê Kurdî, hêzanê demokratîkan, têgêrayîşê demokrasîyî û heme hêzanê muxalefetî rê pîroz kena.

Hetêna ra hewna zî hemverê faşîzmî de alternatîfê îdareyê antî-faşîstî nêvetê werte. Alternatîfêkê cimatî yo ke do cimat xo bi xo îdare bikero pêşkêşê cimatî nêkenê. Nuqtaya ke kemî manenê na ya. Nika halêkê îdarenêkerdişî esto. Faşîzmê AKP-MHP’yî îqtîdar ra kewto, weçînitişî kerde vînî. Rasta ci înan 7’ê Hezîran a 2015’î de vînî kerd. A roje ra nata meşrûtîyetê îdareyê AKP’yî nêmendo.

Îdareyê Tayyîp Erdoganî îdareyêko xespkar, darbekar û komploger o. Îdareyêk ke bi weçînitişî ameyo serê îqtîdarî nêyo. Bi nê weçînitişanê 31’ê Adare no bi hawayêkê eşkerayî ame tescîlkerdene.

CHP zî tede, wa HDP heme hêzanê demokratîkan bîyaro têhet. Yanî îdareyêko alternatîf bêro viraştene. Ganî îstîfaya Tayyîp Erdoganî bêro waştene.

Nê netîceyanê weçînitişî de vejîya werte ke şarî vat, ‘Ez eşkena nê çîyî bikerî.’ A game ê do bieşkê faşîzmî zî birijnê û probleman bi rayîrê demokratîkan çareser bikerê. Seba wextê ameyoxî umîdê ma no yo. Seba bicaameyîşê nê zî barêko pîl keweno serê doşê hêzanê şorişgêr û demokrasîyî. No gureyêko tarîxî yo. Ma güreye xo yê şorişgêrî û demokratîkî bica anê û ma do bica bîyarê zî. La ganî her kes wina bikero.

Mesela derheqê problemanê Tirkîya yê dewaya Kurdan de CHP se vano? Çira HDP’yî dir tîfaq nêkeno. HDP her cayê Tirkîya de rayan gêno. Tewirê CHP’yî yê hemverê HDP’yî cesaret dano îdareyê Erdoganî. Ganî CHP û HDP bi mesuldarîye nizd bibê. Ganî hemverê dîktatorîya Erdoganî de alternatîfêkê îdareyê demokratîkî awan bikerê û bi paştdayîşê şarî nê îdareyî bierzê serê sergoyî.’’