Endamê Komîteya Rayberdişî ya PKK’yî Dûran Kalkan bi meymanê programê Ulkeden ê kanalê Medya Haber TV’yî.

Dûran Kalkanî derheqê 1’ê Gulane de zî qisey kerd û vat, „Gama ke 1’ê Gulane yeno vatene yewîye û pêgirewtiş yeno vîrê merdiman. Cimatbîyayîş yeno vîrê merdiman. La oyo tewr muhîm mucadele yeno vîrê merdiman. 1’ê Gulane yo bêmucadele manaya ci çina.“

Kalkanî qiseykerdişê xo de nê vatî:

„Hemleya ‚Ma tecrîdî bişiknê, faşîzmî birijnê û Kurdistanî azad bikerê‘ 6 mengan a dewam kena. Na hemle xoverdayîşêkê pêroyîyî îfade kena. Têgêrayîşê cimatî û yê gerîlayî ya. Şaro Kurd 7 ra heta 70 serre û dostanê xo reyde xoverdayîşî mîyan de yo. La nê şeş mengan de oyo ke morê xo da hemleye ro grevê vêşanîye yo. Na çarçewaye de ez xusûsen 1’ê Gulane yê xoverdayoxanê grevê vêşanîye pîroz kena û ez vana nê xoverdayîşî nika ra xo reyde serkewtişê pîlî ardê û do qetî bireso serfirazî. Ez zerrî ra naye ra bawer kena. Çunke hemle resaya dereceyêka winayêne.

Çar perçeyê Kurdistanî de, çar hetanê dinya de xoverdayîşêk esto. Strasbourg ra heta bi Galler her ca de vila bîyo. No şar xover dano û sîstemê îşkence û tecrîdî yê Îmraliyî qebûl nêkeno. Tecrîd sere her kesî de yeno bicaardene. Tesîrêkê ci yo xirab merdimîye ser o esto. Şar wazeno ke tecrîd biqedîyo û seba nê mucadele keno.

Ez tîya wazena çîyêk vajî û ganî şaş nêro famkerdene. Mucadele tena grevê vêşanîye nêyo, xoverdayîşêko pêroyî yo. Gerîla şer keno û xover dano. Cinî û ciwanî xover danê. Helbet nê prosesî de grevê vêşanîye bingeyên ê, sereke yê. Nê grevî tena zîndanan dir bisînor nêyê. Çar perçeyanê Kurdistanî de û her cayê dinya de dewam kenê. La oyo ke tewr hîra yeno rayraberdene zîndanan de yo. Weçînayîşê 31’ê Adare de faşîzmê AKP-MHP‘yî bin kewt û nika zî rojê ameyoxî do bibê rojê prosesê şikitişê hişmendî û sîyasetê faşîstî yok e bîyo sebebê tecrîdî. Ma nê ra bawer kenê.

Leyla Guvene û embazê ke xoverdayîşê grevê vêşanîye de yê nika ra serfirazî bi dest fînaya. Înan heme merdimayî kerde mîyanê têgêrayîş û cigêrayîşêk. Newe ra ruh da cimatî û her kesî antî sere rastîya cimatkîye. Wextêko zaf nizd de do tecrîd bişikîyo û faşîzm zî birijîyo. Xoverdayoxî do biresê amacê xo û qetîyen do serkewtiş bi dest bifînê.

Berê cûntaya faşîste ya 12’ê Êlule hetê mayan ê Kurdan ra ameyî şikitene. Do berê faşîzmê AKP-MHP’yî zî hetê înan ra bêro şikitene. Rastîyêka mayan ê Kurdan a winayêne esta. Mîyanê mucadeleyî de pêşaya, aver şîya. Çew nêeşkeno vernîya înan bigêro. Ez înan heminan bi hurmet silam kena. Ê xoverdayîşêkê pîlî danê.

Hêrişê polîsan ê Tirkî yê hemverê mayan namerdî û bêexlaqî ya. Xora no faşîzm o, qirkerdiş o. Reya ewilêne wina nêbîyo. Ganî ma hemverê nê de mucadeleyî hîna bikerê xurt û nizdbîyayîşê îdeolojîk, organîzasyonkî û sîyasîyî xo rê esas bigêrê. Wa hêrişkarê faşîstî bizanê ke înan ê ke verê înan wina kerdibi înan ra hesab ame persayene, do ê zî cezaya kerdişanê xo bidê. Do qesasê mayan bêro girewtene û xora nika ra yeno girewtene. Wa çew nêvajo çîyo ke maneno do verê înan de bimano. Do hesabê ci rojêk bêro persayene.

Ez tîya vengdayîşê Nasir Yagizî ana vîrî. Îradeyê mayan muhîm o, la ê mayî, cinî û ciwanê bînî kamca yê? Ma veng danê hemeyê Kurdan ke gureyo ke keweno doşê înan ser bica bîyarê. Gerîla bi qehremanî xover dano. La kuçeyan de zî ganî hemverê nê hêrişanê faşîstan de cewabêk bêro dayene. Eşkenê têgêrayîşêkê hîra yê girseyî virazê. Ganî virazê zî. Na çarçewaye de ez veng dana ciwanan ke gureyê xo bica bîyarê, hîna zaf mucadele bikerê û aktîf bê. Roje a roj a ke hemverê faşîzmî û hişmendîya qirkerdoxe de mucadele bêro kerdene. Na çarçewaye de ez veng dana ciwanan ke bibê wayîrê tewirêkê rast û xurtî û mucadele bikerê.

Çalakîyê gerîlayan ê nê wextanê peyênan hîşyarî yê û hemverê heqaretê ke mayan ser o ameyo kerdene de qesas ê. Çi çîyo ke faşîzmê AKP-MHP’yî kerdo do verê înan de memano. Do hesabê terror, îşkence û kiştişan bêro persayene. Biryargehî no vat. Xora peyam zî hetê her kesî ra ame famkerdene. Serhed de, Xakûrkê-Bradost de û Zar-Çelê de çalakîyî ameyî viraştene. Ez ê heme çalakwanan û şexsê înan de zî heme gerîlayan û biryargehî seba ke derbe daya dişmenî ro pîroz kena. Ez 1’ê Gulane xusûsen înan rê zî pîroz kena.

Înan vat ma do PKK û gerîlayî biqedînê. Şima nêeşkenê biqedînê. Ma wazenê ke wa hîna zaf gonî nêrişîyo, wa rastîye bivînê û bêrê sere rayîrê çareserîya maqûle. Eke tayê bieşkê fam bikerê do nê forsdayîşê xo ra fek vera bidê, forsî ra çîyêk nêvejêno. Mumkun nêyo ke ê hemverê gerîlayî de bi ser bikewê. Serê hemleye ra 6 mengî ravêrtê, herinda ke çareserîye dima şirê wina fam beno ke înan rastî fam nêkerda. Çimsûr bîyê.

Înan peyam rast fam nêkerd. Nê sey zihîfîyêk vînenê. Seba ke rastî bêro famkerdene no 6 mengî yo ke merdimî bedenê xo helnenê. La eşkera yo ke hêzê hemverê man o fam nêkerdo. Gama ke şima biisrar fam nêkerê ma do zî bi ziwano ke şima ci ra fam kenê qisey bikerê. Çîyo ke gerîla nika keno no yo. Ganî her kes nê wina bizano. Gerîla do tîya ra tepîya bikero, heta nika peyam bi. Înan rixmê heme peyaman de hêrişkarîya xo kerde vêşî qirkerdişî domanyî û heta hêrişê mayan kerd. Nika ra tepîya gerîla do her ca de bibo aktîf. Tena ko de nêbo û tena do hemverê leşkerî de şer nêkero. Do her ca de bo û kiştoxanê faşîstan ra, polîsan, ajanan û îxbarkerdoxan ra hesab biperso. Ma nêwaşt wina bo. La heto ke hemverê ma de yo ziwanêkê bînî ra fam nêkeno. A game ma do zî waştişê înan bica bîyarê û înan ra hesab bipersê. Do faşîzm û teroro ke înan kerdo ra hesab pêro persayene. Ganî no wina bêro zanayene.”