Endamê Komîteya Rayberdişî ya PKKyî Duran Kalkanî Medya Haber TVyî rê qisey kerd û rojdem ercna. 

Qiseykerdişê Kalkanî ra beşêk wina yo:

''Îmrali de tecrîdê vera Rayber Apoyî dewam keno. Pêvînayîşê keye û avûkatan bi bahaneya 'cezaya dîsîplînî' yenê astengkerdene. Xora vera ney Rayber Apo zî xoverdayîşê xo rê dewam keno. Ma kenê ke nê xoverdayîşî fam bikerê û goreyê ci têbigêrê. Kurdan Newroze û 8ê Adare de zî vera tecrîdî mesajêko zelal da. Ma Serra 50. ya Newroze sey serra azadîya Rayber Apoyî îlan kerde. Seba azadîya Rayberîye çarçewa Hemleya 'Wextê Azadîye' de her ca de têkoşînê ma dewam keno. Ewro azadîya Rayber Apoyî meseleyêka global a. Coka sey Sendîkayanê Îngilîstanî her cayê dinya ra seba ney têkoşîn yeno kerdene.

Zîndanan de merg, zulm, îşkence est ê. Tira cenazayî vejîyenê. Hişmendîya AKP-MHPyî tecrîdê Îmraliyî pêro zîndanan ra vila kerdo. Îqtîdarê hukmatî zaneno peynîya înan ameya coka înan zulmê zîndanan zêdînayo. Faşîzmê AKP-MHPyî bîyo sey Cuntaya Darbeya 12ê Êlule. Dewlete seba ke îradeyê kurdan teslîm bigêra hêrişê zîndanan kena. Kenan Evrenî zî wina kerdbi. La seba ke no hesabê dewlete ser nêkewto, dewlete nêeşkaya îradeyê tepişteyan bişikna, înan qetil kena. Zîndanan de bi hawayêkê fîîlî îdam yeno caardene. Nê hêrişî a raşte vera pêro komelî yê. Ganî komel, keyeyê tepişteyan, demokratî, pêro kurdî û tepişteyî bi xo, vera nê qirkerdişî xo ver bidê, înadê dewlete ra rojêke zî biba zêde biciwîyê. Ganî tepişteyî rewşa nikayêne hol fam bikerê û metodanê xo goreyê na rewşe biweçînê. Xora ganî tepişteyî têkoşîn bikerê la mesuldarîya esase kewena milê şarê teberî. Ganî cinî, ciwan, keyeyî, demokrat-şorişgêrî û rêxistinî zulmê zîndanan hol teşhîr bikerê, vera ci cade reaksîyon bimojnê û sere wedarnê. Ganî keyeyê tepişteyan rêxistin bibê, wa ê bînî zî keyeyan têna meverdê.  Eke dişmen şima qetil keno, ganî şima zî bi ziwanê dişmenî cewab bidê ci. Wa nê zulmkarî, îkencekarî, qirkerî bizanê ke hesabê nê kerdişan do bêrê persayene. 

Xoverdayîşê gerîlayan dewam keno. Gerîlayî faşîstan ra hesab persenê û do bipersê. Gerîlayî hêzê hesabpersayîşî yê. Nika serrgêra hêrişanê 23ê nîsana 2021î ya. Serrêke ra nata Metîna, Avaşîn û Zap de çêrîyê pîlî qewimîyayî. Gerîlayan Serhedî ra heta Dêrsimî, Mêrdînî ra heta Colemêrgî her ca de çalakîyî kerdî. Prosesî 10ê sibate de Garê de dest pêkerd. Dewlete seba ke gerîlayan tasfîye bikera hêriş kerd la derbêka pîle werde. Dewlete uca de şikîyaye. Gerîlayanê ke Garê de serkewtiş vist dest, heman xete ser de Avaşîn, Metîna û Zap de xo ver da. Xoverdayîşê gerîlayan îqtîdarê AKP-MHPyî ard noqtaya şikîyayîşî. Netîceya xoverdayîşê gerîlayan ê 2021î de rijîyayîşê AKP-MHPyî bi lezêr. Gerîlayan zî xo taktîk, metod û rayîranê çalakîyan ser o aver berd. Gerîlayan bi taybetî şerê tunelan de xo aver berd. Ma îlan kerd ke Newroza serra 50. de hemleyêke daya destpêkerdene ke na hemle azadîya Rayberîye hedef kena. Her roja na serre roja Newroze ya, roja xoverdayîşî ya. Gerîlayî zî serkêşîya nê xoverdayîşî kenê.

Şer têna Herêmanê Pawitişî yê Medya de nîyo. Dişmen wazeno ma bianco şerê mewzîyan. Ma do nê şerî vilayê her cayî bikerê. Şer do Vakur de zî, sere de metropolan Tirkîya de zî bibo. Ma amadekarîyê xo zî goreyê ney kerdê. Hînî înîsîyatîf destê gerîlayan de yo. Yanî îqtîdarê AKP-MHPyî kamca de hêrişê ma bikero, ma do uca de bidê piro. Ma do faşîzmê înan birijnê, sîstemê Îmraliyî parçe bikerê, bingeyê azadîya Rayber Apoyî de Kurdîstanê Azadî, Tirkîyaya demokratîke awan bikerê. Ney ra ber qet yew netîce ma rê serkewtiş nîya.

Tirkîya de îqtîdarê AKP-MHPyî krîzêko ekonomîk o pîl viraşto. Înan Tirkîya kerda zîndanêk. Sebebê nê krîzî zî şerê vera kurdan o. Pêro budçeya dewlete şina nê şerî. Şar vêşan o. Sey Newroze meydananê 1ê Gulane de zî şar îqtîdarê AKP-MHPyî ra hesab biperso. Hînî îqtîdar nêeşkeno biremo. Partîyê muxalefetî zî nêeşkenê verê nê prosesê krîzî bigêrê. Çunke babeta çareserîya meseleyanê kurdan û meseleyanê bînan de nê partîyî qels ê. Ê sey îqtîdarêkê alternatîfî asenê. Coka wa çew înan ra çîyêkî hêvî mekero. Vera ney ganî îtîfaqê demokrasî, îtîfaqê rayîrê 3. bêrê bihêzkerdene. 

Ewro dewleta tirke sey rejîmê Saddamî Başûrê Kurdîstanî de qirkerdişan kena. La nê hukmatê Hewlêrî ne zî hukmatê Iraqî vera dewleta tirke fekê xo anêkenê. Mîyanê Rojawan û Şingalî de pê malzemeyanê dewleta tirke dêsî virazîyenê, Erdogan vano înan sînorê xo hîra kerdo. Nê senî benê? Wina vajîyeno ke dewleta tirke amadekarîya hêrişan kena (No roportaj hêrişanê 17ê nîsane ra verî amebi kerdene.) Dewlete 2021 de vera gerîlayan bin kewtbî. îqtîdarê AKP-MHPyî hi rijîyeno, kesê ke nê îqtîdarî ser o hesaban kenê zî do birijîyê. 

Çapemenîye de wina vajîyeno ke PDK zî dewleta tirke reyde hêriş bikero. A raşte PDK qaydeyêk a ho mîyanê şerî de yo. Eke dewleta tirke eşkena bikewa sînorê Başûrî, no pê destûrê PDKyî beno. La eke PDK vera gerîlayan şer bikero o çax no şer vilayê pêro Başûrî beno. Rewşa winasêne de zî şarê Başûrî do zerar bivîno. Wa şarê Başûrî na raştîye bivîno û PDKyî vindarno. Eke PKK û PDK bikewê pê, PDK do ney ra zerar bivîno. Şero winasên do bikero ke pêro kurdî wirzê payan ser. PDK ganî hesabanê xo hol bikero. 

Ma hê ver bi 1ê Gulane şinê. Ma pê bawer ê ke no 1ê Gulane do sey Newroza emserîne biheybet bibo. Ez nameyê PKKyî ser o 1ê Gulane Roşanê Karkeran ê her kesî fîraz kena. Ez venga her kesî dana ke 1ê Gulane bikerê leweyê xoverdayîş, têkoşîn û  heybetî. Ganî sendîka û sinifê karkeran ê Tirkîya kurdan reyde yew bibê û pîya têkoşîn bikerê. Ewro şertê demokratîkbîyayîşî paştdayîşê bi kurdan o. Ganî nê 1ê Gulane de no tewir bi xurtî bêro mojnayene. Ganî no 1ê Gulane bibo rijîyayîşê AKP-MHPyî, destpêkêko newe yê Tirkîya. Na babete de mesuldarîyê tewr pîlî kewenê milê partîyanê sosyalîstan, rêxistinanê înan, lîderanê înan û hêzanê şorişgêr û demokratan.''