Endamê Komîteya Rayberdişî ya PKKyî Duran Kalkanî Medya Haber TV de rojdem ercna.

Qiseykerdişê Kalkanî ra tayê noqtayê girîngî wina yê:

''Hemleya 'Rayber Apoyî rê Azadîye, Meseleya Kurdan rê Çareserîye' do menga 11ine temam bikera. Çarçewa na hemle de çalakîyê şarê ma zî dewam kenê. Ganî ma raştîya Îmraliyî her ca de eşkera bikerê û paradîgmaya Rayber Apoyî vila bikerê. Rayber Apo o kes o ke do bieşko meseleya kurdan çareser bikero. Seba haştîya welatî girîng o ke Rayber Apo qisey bikero. Xoverdayîşê Rayber Apoyî do ser bivisno. Ganî ma serra yewine ya hemle de çalakîyanê xo bizêdînê,  têkoşînî aver  berê. Sere de ciwanî û cinîyî ganî şarê ma bê teredûtî xo ver bidê. Ma do qetî ser bikewê.

Gerîlayî 40 serrî yo rûmet û estbîyayîşê kurdan pawenê. Gerîlayî her cayê Vakurê Kurdîstanî de çalakîyan kenê. Xeta gerîlayan xeta qehremanîye ya. Herêmanê Pawitişî yê Medya de zî xoverdayîşê gerîlayan asta tewr berze de ya. Xoverdayîşê gerîlayan xercê kesî nîyo. Gerîlayan ra ber qet yew hêz nêeşkeno vera hêrişanê winayênan xo ver bido. 

Hamnanêko bîn ho qedîyeno. Êyê ke vanê 'no hamnan ma do qetî PKKyî biqedînê' vînenê ke ma hê tîya de yê. PKK, gerîlayî xo ver danê. Çar hetanê dinya de bi mîlyonan dostê ma est ê. Gerîlayî serkêşê serkewtişî yê. Xeta PKKyî her ke şino bena pîlêr. Rejîmê AKP-MHPyî zî çend reyî verê ma de bin kewt. 

23ê tebaxe de Silêmanî de hêrişêkê namerdî de di rojnamegerî Gulîstane Tara û Hêro Bahadîn ameyî qetilkerdene. 22yê nîsane de mabênê îqtîdarê AKP-MHPyî, Iraq û PDKyî de tay peymanî virazîyayî. Îtîfaqê AKP-MHP-PDKyî armanc kerdêne ke PKKyî îmha bikero la nêeşka. Nika Amerîka zî paştî dana nê îtîfaqî. Amerîka PKKyî verê xo de sey astengêkî vînena û seba ke Rojhelatê Mîyanênî de plananê xo bîyara ca wazena PKKyî îmha bikera. 

Ewro desteko tewr pîl hetê PDKyî ra dîyeno îqtîdarê AKP-MHPyî. Dewleta tirke Başûr de ha sivîlan kişena, keyeyan vêşnena ûsn la PDK zî rayîrê ney akeno. Şarê Başûrî vera vera beno xizan la Barzanîyî vera vera benê zengîn. Hemkarîya MÎT-Parastinî zî newe nîya. Bi desan serran o ê mutefîq ê. 2018 ra nata pêro hêrişanê şeş serranê peyênan de engişta PDK-Parastinî est a. MÎT û PArastin Başûr de têzere bîyê.

Nê 6 serran de dewleta tirke Başûr de bi desan şerwanê azadîye qetil kerdî. Nê pêroyî bi îstîxbaratê Parastinî ameyî qetilkerdene. PDK kewt gonîya nê şerwananê azadîye. Hinî rîyê PDKyî yo xayîn vejîyayo werte.

Vakur de zî Huda-Par bîyo PDK. Erdogan û Bahçelî Huda-Parî sey hêzê xo yê çeteyan şuxilnenê. Yê PDKyî zî yê Huda-Parî zî kurdayetîye nîya. Nê têkoşînê azadîye roşenê. Wa her kes verê PDKyî de zî verê Huda-Parî de zî hişyar bibo. 

1ê êlule rê vanê roja haştîye la seke roja şerî ya. Her cayê dinya de şerî est ê. Haştîye ancax do bi demokrasî û azadîye bêra caardene. Ganî seba haştîye û demokrasîyî ma têkoşîn bikerê. Tirkîya zî ganî hêverî demokratîk biba, meseleya kurdan çareser bikera û azadîyan bîyara ca ke haştîye do bêra ci. Ganî cinî, ciwan, hêzê demokrasî û azadîye yê Tirkîya yew bibê û seba haştîye vera faşîzmê AKP-MHPyî têkoşînêkê xurtî bikerê.

Frankfurt de do Festîvala Kulturê Kurdan a 32ine bêra kerdene. Na festîvale zaf girîng a ke çunke wextê serrgêra yewine ya Hemleya Azadîye de do bêra kerdene. Şarê ma yê Ewropa û dostê ma ganî tewrê na festîvale bibê û tede Hemleya Azadîye bivisnê leweyî. Ciwanê ke serkêşîya têkoşînê azadîya Rayber Apoyî kenê festîvale ra ver Rayraşîyayîşê Dergî do bidê destpêkerdene. Ciwanî ganî bi xurtî tewrê xebatanê festîvala Frankfurtî zî bibê. Ez venga her kesî dana ke tewrê na festîvale bibo.''