''Kam pêkewtişê zereyî vejo kurdî do ey efû nêkirê''

KNKyî û Yewîya Parlamenteran a Kurdîstanî kombîyayîşêk organîze kerd. Mazlûm Ebdîyî ke kombîyayîş de qisey kerd vat: ''Kam beno wa bibo, kam ke pêkewtişê zereyî vejo kurdî  û tarîx do ey çirey efû nêkirê.''

KNKyî û Yewîya Parlamenteran a Kurdîstanî kombîyayîşêk organîze kerd. Bi nameyê “Şêwira Pêşxistina Diyaloga Navxweyî” (kombîyayîşê averberdişê dîyalogê zereyî) kombîyayîşêk kerd. Çar leteyanê Kurdîstanî û xeylêk cayanê bînan ê dinya ra temsîlkarê kurdan, sîyasetmedar, roşnvîr, akemîsyen û hunermendê kurdan tewrê ci bîyî.

Kombîyayîşo ke nizdê 200 kesanê tewrê ci bîyî teberê PDKyî de hema-hema pêroyê rêxistine, partî û organîzasyonanê kurdan ra temsîlkarî tewrê ci bîyî. Kombîyayîş de çar leteyan ra cinîyan zî cayê xo girewt. Kombîyayîşo ke rîyê Korona ra online ame kerdene de tewrbîyayoxanê kombîyayîşî waşt ke seba ke PKK û PDK wa pêvînayîş bikerê, wa heyetêk bêro ronayene.

Qiseykeridişê akerdişî Serekê Yewîya Parlamenteranê Kurdîstanî Cemal Qasimî kerd. Qasimî ard ziwan ke seba ke ê nê kombîyayîşî rê serkêşîye kenê kêfweş ê û vat: '' Ganî semedê çareserkerdişê meseleyan rayîrê dîyalogî bêro vîjnayene.''

Hemsereka KNKyî Zeynebe Murad zî vîst vîrî ke verê kurdan de fisetê muhîmî estê û vat: '' Ganî heme semedê pawitişê destkewteyanê kurdan têbigêrê.''

Endamê Polit Buro yê YNKyî zî bale ante ser ke şerê mabênê kurdan xeyalo tewr pîl ê dişmenî yo û vat: Ma zanê ke şero winayên heme kurdan ê dano vînîkerdene.''

Hemsereka KCDyî Leyla Guvena ke Amedî ra tewrê kombîyayîşî bîye ard ziwan ke ganî meseleyê bi rayîrê dîyalogî bêrê çareserkerdene û vat: ''Ganî me pêro cewbêkê hemparî bidê persê dişmenî kurdan kam o?''

Fermandarê Pêroyî yê Hêzanê Sûrîyeya Demokratîke (QSD) Mazlûm Ebdîyî zî semedê dîyalogî veng da û vat: ''PKK û PDKyî eşkenê bi dîyologî meseleyan çareser bikerî. Pêkewtişê mabênê nê wird hêzan zirar dano heme kurdan. Sere de zî zirar dano destkewteyanê Rojawanî. Kam beno wa bibo, kam ke pêkewtişê zereyî vejo kurdî  û tarîx do ey efû nêkirê.''

Temsîlkarê PKK-Iranî M. Saleh Qedrî zî vat: ''Şerê zereyî sey axû yo ke zirar dano hemo kurdan.''

Temsîlkarê Têgêrayîşê Goranî Bextîyar Omer Ewlê zî  vat: ''Ganî ma heme ziwanê hêrişîkarî caverdê. Ma pêkewtişê mabênê kurdan nêwezenê.''

Hemserekê Pêroyî yê Kongra-Gelî Remzî Kartal zî vist vîrî ke KCK û PKK wazenê ke krîz bêro çareserkerdene û vat: ''Heyetêk eşkena pêvînayîşan rê serkêşîye bikero.''

Hemsereka Meclîsê Demokratîke yê Sûrîye (MSD) Îlhame Ehmed zî waşt ke heyetêk bêro ronayene vat: ''Heme prosesanê tarîxî de kurdan rîyê xayînîye û pêkewtişanê zereyî ra vînî kerd.''

Beşê diyînî yê kombîyayîşî de sîyasetmedar, roşnvîr û hunermendan qisey kerd. Înan zî vera pêkewtişê zereyî nêrazîbîyayîşê xo ramojna û semedê dîyalogî veng da.