Kampa Multecîyan a Şehîd Rustem Cudîyî ya  Mexmûrî nizdê serrêk o ke binê ambargoyî de ya. Rîyê ambargoyî ra nika rîsko gird ê Korona esto.

Dimayo ke 17ê temmuze de Hewlêr de îdarekarê  MÎTê tirkî Osman Kose  ame kiştene, Kampa Koçberan Şehîd Rustem Cûdîyî ya Mexmûrî ser o qedexeyê vejîyayîş û dekewtişî ame bicaardene. Ambargo  o wext ran ata dewam keno. Kampa ke binê  pawitişê Neteweyê Yewbîyayeyî (NY) de ya 12 hezar kurdî tede ciwîyene. Hemwelatijî  hem hetê weşîya hem hetê hewcedarîyanê cuyakî ra tengayîya girde ancenê. Bi vilabîyayîşê janê Korona qesawetê şarê kampe zî zêdîya.

Cuya şarê Kampa Mexmûrî xemê kesî de nêyo

Komîteya Karanê Teberî ya Kampa Mexmûrî ra Neda Muhamed Ahmed ard ziwan ke înan rîyê ambargoyî ra qet amadekarîyêke nêkerda û hewceyê înan erzaq û dermanî esto. Amede ard ziwan ke heme pêvînayîşê înan ê semedê wedartişê ambargoyî bêpeynî mendî û vat:  ''Kampe de nêweşê kronîkî û extîyarî estî. Ganî ambargo cade bêro wedartene û hetkarîya merdimî bireso. '' Amede ard ziwan ke şar rîyê janê Korona ra zaf qerqilîyeno û best pa: ''Eke nêweşîye bireso tîya dramêkê merdimî do bêro ciwîyayene.  Ma 2 rey walîyê Hewlêrî de qisey kerd la sebebê ambargoyî nêmusayî. YNyî statuyêk dayo kampe la pratikî de no nêno caardene, ê berpirsîyarîya xo nêanê ca. Cuya kesanê ke tîya ciwîyenê xemê kesî de nêyo. Destûr nêdîyeno ke hetkarîye bêro. Ma semedê derman û malzemeyê pakîye dezgehanê hetkarîye de qisey kerd la rîyê ambargoyî ra nêeşkenê hetkarîye biresnê ma.''

Kampe de malzemeyê weşîye û pakîye nêmendo

Doktor Muhamed Unverî zî amboryo ke hetê PDKyî ra yeno caardene vist vîrî û vat: ''Nêweşxaneyanê ma de derman nêmend û destur nêdîyeno ke ma semedê dermanî vejê teberê kampe. Hêdî hêdî ambargoyî kenê pîtêr. Ma bi îmkananê xo tedbîran gênê la malzemeyê ma yê weşîye kêm o. Hewlêr, Dohuk û Kerkûk de tedbîrî ameyî giretene la semedê kampa ma gamêk nêna eştene. Dikanan de malzemeyê pakîye nêmendo. 9 aşmî yo ma binê ambargoyî de yê.  Heta nika ma 70 kesî girewte binê çimdarî la heta nika kampe de nêweşîye nêameye tesbîtkerdene. Ma reyna veng danê YN û PDKyî ke wa no ambargo bêro wedartene. Reyna venga heme dezgehanê hetkarîye yê mîyanneteweyî danê ke wa hetkarîya merdimî biresnê kampa ma.''