Remzîye Karadaga ke Zîndanê Xarpêtî yê Tîpê T’yî de 76 rojî grevê vêşanîye de mende sey xeylî xoverdayoxanê bînan a zî nêna dermankerdene.

Karadage serra 2014’î de Zîndanê Mêrdînî ra dimayê 2 serran serbest ameye veradayene û mengêk ra dima reyna ameye tepiştene û ameye berdene bi Zîdanê qezaya Gurnê Reşî ya Riha. Serrêk ra dima Xarpêt rê ameye surgunkerdene. Dekewtişê zîndanî de raştê cigêrayîşê rutî ameye û vera naye vejîyaye, qebûl nêkerd. Nê semedî ra ci rê îşkence ame kerdene û cezaya hucre dîyaye ci. Karadaga ke 6’ê Teşrîna Verêne de  tehlîyeya xo pawena yewna dosya ra  ci rê  2 serrî caza ameye birnayene.

Karadage 1’ê Çele de  tewrê çalakîya grevê vêşanîye ya ke semedê wedartişê tecrîdê serê Rayberê Şarê Kurdî Abdullah Ocalanî hetê  tepişteyanê PKK û PAJK’î ra ameye destpêkerdene, bîye. Grevê vêşanîye 26’ê Gulane de bi vengdayîşê Ocalanî qedîyayî. Karadage û hîrê embazê ci ke pîya manenê heta nika teyna rayêk ameyî berdene bi nêweşxane.

Waya Remzîye Karadage, Zekîye Karadage ard ziwan ke gama ke waya aye û embazê ci hetê cendirmeyan ra ameyî berdene bi nêweşxane înan rê heqeret ameyo kerdene, nêngî ameyî çînayene û vat: ‘’Rîng de înan ra ameyo vatene ke înan rê tedawî çîn a. Xora dima ra cade peyser ameyî berdene bi zindan. Ma zî muracatê ÎHD û çend sazîyan kerd, la hema çîyêk nêame kerdene. Waya mi 16 kîlo  dayî, rewşa ci xirab a û nêna dermankerdene. Îdareyê zîndanî vano ‘Şima çalakîye viraşte ganî netîceyê ci zî biancê’. Reyna rîyê grevî ra 4 mengî cezaya qedexeyê pêvînayîş û qiseykerdişê telefonî dîyaya waya mi.’’