Endamê Konseya Rayberdişî ya KCK’yî Mûstafa Karasûyî derheqê Roşanê 1’ê Gulane yê Kedkaran de ercnayîşî kerdî.

Karasûyî ANF’yî rê qisey kerd û nê vatî:

“Do 1’ê Gulan a ke seba Tirkîya, Kurdistan û hemeyê merdimîye muhîm o bêro pîrozkerdene. Roja 1’ê Gulane de karkerî û kedkarî seba dinyayêka azade mucadele kenê. 1’ê Gulane de bawerîya kedkaran bi înan virazêna û bin ê hawayî bawerîya înan a ameyoxê azadî hîna bena zêde.

Ma eşkenê vajê ke Tirkîya de 1’ê Gulane xeylî welatanê bînan ê dinya ra hîna zaf wayîrê mana yo. Çîyo ke na mana daya qezenckerdene zî şehîdê 1’ê Gulane yê, xoverdayîş ê. Helbet hetê Kurdistanî ra zî 1’ê Gulaene muhîm o. Çunke demokratîkbîyayîşê Tirkîya seba şarê Kurdî muhîm o. PKK tim 1’ê Gulane rê wayîr vejîya. Qebûl nêkerd ke beyraqa 1’ê Gulane bifînîyo warî.

Fehmê azadîya cinîye yê Rayber Apoyî zî hendî bîyo nîşanê tewr berzî yê sosyalîzmî. Xorîbîyayîş û vilabîyayîşê Sosyalîzmî ewro saya xeta azadîye cinî û cimatê ekolojîkî de bica yenê. Naye ra ma xo rê esas gênê ke no 1’ê Gulane platformanê hîna hîrayan de bêro pîrozkerdene.

Nika Tirkîya û Kurdistan de faşîzm esto. Faşîzm dişmenê kedkaran o, Kurdan o, cinîyan o û dişmenê ekoloji yo. Dişmenê her tewir ercê merdimîye û kulturî yo. Nê hetî ra îqtîdarê AKP-MHP’yî yo faşist zî dişmenê heme şar, kultur û grûbanê eciqnayeyan ê Tirkîya yo. Dişmenîya nê sîstemî yê cinîyan raste de ya. Naye ra senî ke weçînitişê cayîyî yê 31’ê Adare de heme hêzê demokrasîyî ameyî têhet û bi faşîzmê AKP-MHP’yî da vînîkerdene, ganî 1’ê Gulane de zî hêzê ke hemverê AKP-MHP’yî de yê û hêzê antî-faşîstî bêrê têhet û a roje hêzê xo bikerê yew.

Ganî şaro Kurd her cayo ke tede yo bi dereceya tewr berze tewrê 1’ê Gulanan bibo. Ganî nê 1’ê Gulane de hemverê tecrîdî de mucadeleyî hîna bikero pîl. Ganî mucadeleyê hemverê tecrîdî û mucadeleyê demokrasîyî yê şaranê Tirkîya pîya bêrê rayraberdene. Ganî şarê Tirkîya û hêzê demokrasîyî yê Tirkîya waştişanê şarê Kurdî û hesretanê ci bivînê; şaro Kurd zî azadîya şarê xo demokratîkbîyayîşê Tirkîya de bivîno û pîya bi şaranê Tirkîya û hêzanê demokrasîyî mucadeleyî hîna bikero pîl.

Nê bingeyî de ez Roşanê 1’ê Gulane yê heme şaranê dinya û yê kedkaran pîroz kena. Na çarçewaye de şaro ke Tirkîya de do bêro têhet û 1’ê Gulane pîroz bikero zî bi hurmet silam kena.”