Endamê Konseya Rayberdişî ya KCKyî Mustafa Karasuyî ANFyî rê rojdem ercna.

Qiseykerdişê Karasuyî ra tay noqtayê girîngî wina yê:

''Îmrali merkezê polîtîkayanê qirkerdişê kurdan o. Hêzê qirkerî xîret kenê ke hêverî îradeyê Rayberê ma bişiknê û ey bêtesîr bikerê ke kurdan qir bikerê. Yanî polîtîkayê qirkerdişî hêverî vera Rayber Apoyî yenê ceribnayene. Coka têkoşînê vera tecrîdê Îmraliyî û caardişê azadîya Rayber Apoyî yeno manaya têkoşînê seba azadîya kurdan. Şarêk eke wayîrê Rayberê xo yê esîrî nêvejîyo nêeşkeno têkoşînêkê raştî bikero. Ganî Îmrali bibo merkezê têkoşînê ma.

Têkoşînê seba azadîya Rayber Apoyî beno pîlêr. Hemleya Azadîye ya 10ê Teşrîna Verêne hemleyêka girîng a. Şarê ma ganî hîna bi aktîfî nê têkoşînî bikero. Eke Rayber Apo azad bibo şarê kurdî zî do azad bibo û Tirkîya do biba welatêko demokratîk. Ganî tecrîd bêro teşhîrkerdene la bi vengdayîşê seba CPT û Konseya Ewropa netîce nêna girewtene. Ganî sere de ciwanî pêro kesî xo rêxistin bikerê, çalakîyanê afernayoxan bikerê.

Sey her wextî ewro zî zîndanan de xoverdayîşo girîng est o. Embazê ma yê zîndanan bi xoverdayîşê xo wayîrê Rayber Apoyî vejîyenê. Embazê ma çarçewa grevê vêşanîye de nika pêvînayîşanê akerdeyan û telefonan boykot kenê. Ruhê zîndanan hema zî ruhê 14ê Temmuze yo. Keyeyê tepişteyan zî hetêkî ra têkoşîn kenê û paştî danê domananê xo. Tewirê dadîyan îksîrê têkoşînê bêmexlûbî yo! Bi na wesîle ez Mayanê Şemeyî zî selam kena ke çalakîya xo de hewteyo hezarin temam kerdo. Girîng o ke ma wayîrê xoverdayîşê zîndanan vejîyê. Ganî ma têkoşînê tepişteyan teyna nêverdê. Embazê ma yê zîndanan rûmetê kurdan temsîl kenê. 

Dewleta tirke bi serran o hêrişê Herêmanê Pawitişî yê Medya kena. Nê hêrişî hêrişê îşxalî yê û dewleta tirke do nê cayanê îşxalkerdeyan ra nêvejîya. Heyf ke PDK hemkarîya dewleta tirke ya îşxalkere û îqtîdarê AKP-MHPyî yê qirkerî keno. Gerîlayî hê derbanê giranan danê artêşa tirke ro. Coka dewleta tirke kena ke PDK hîna bi aktîfî tewrê şerî bibo. PDK hetê lojîstîk û îstîxbaratî ra cara destek dano dewleta tirke. Nika PDK û dewleta tirke gêrenê ke YNKyî bikerê hemkarê hêrişanê xo. PDK bi xayînîya xo qîm nêkeno; wazeno partîyê Başûrî yê bînî zî sey ci xayînîye bikerê. Vera na xayînîya PDKyî tewiro raşt nêno mojnayene. Vera xayînîya PDKyî vejîyayîş erkê welatperwerîye yo. 

Dewaya Kobanê dewaya kumpasî ya. Na dewa de cezayê giranî dîyayî sîyasetmedaranê kurdan. Bi nê hawayî eşkera zî bi ke îdareyê mehkemeya destê îqtîdarê AKP-MHPyî de yê. Bi dewayanê winayênan û operasyonanê qirkerdişê sîyasîyî yeno waştene ke çimê sîyasetmedaran û şarê kurdî bitersê. Dewlete bi cezayanê na dewa têkoşînê şarê kurdî kerd hedef. Goreyê dewlete kurdan rê sîyasetkerdiş qedexe yo. Qanûnê dewlete zî naye ser o virazîyayê. Xûlasa bi biranê Dewaya Kobanê yeno armanckerdene ke kurdî bê serkêşan bimanê û bitersê.

Weçînayîşan ra verê cû îqtîdarî xîret kerd ke bi weadê 'nermbîyayîşî' kurdan bixapîno. Ma zanayêne ke AKP-MHP do qetî kurdan rê hol nêbo. Wa çew nînan ra 'nermbîyayîş'î mepawo. Birê Dewaya Kobanê îsbatê polîtîkayanê îqtîdarî yê. 

Îqtîdarê AKP-MHPyî do qetî 'Qanûnê Bingeyî yê Sivîl û Demokratîkî' nêvirazo! Ê kenê ke qanûnê 'ajanîye' vejê û bi nê hawayî rejîmê xo yê faşîstî xurtêr bikerê. Bi nê qanûnî îqtîdar û mehkemeyê ci kurdan narey bi bahaneya 'ajanîya PKKyî' bierzê zîndanan. Qet yew çîyo ke do îqtîdarê AKP-MHPyî reyde bêro kerdene hol nîyo. AKP-MHP îqtîdarê xirabîyan o. Teyna bi rijîyayîşê nê îqtîdarî merdim eşkeno nê xirabîyan ra bêro xelisnayene.''

Vera îqtîdarê AKP-MHPyî ganî şarê Tirkîya, hêzê demokrasîyî û şarê kurdî ganî îtîfaqê têkoşînê demokrasîyî bikerê.

9 serranê peyênan de polîtîkayê şerê taybetî  yê sey 90an zêdîyayî. îqtîdarê AKP-MHPyî û dewleta tirke her cayî ra hêrişê kurdan kenê. Vera komelê kurdan şerêko topyekûn yeno kerdene. Tirkîya bîya welatê çeteyan û mafyayan. Şerê vera kurdan tesîrê pêro şaranê Tirkîya keno. 

Îsraîl bi giranî hêrişê Filîstînî keno û qirkerdişêkî ano ca. Ma heta peynî hetê şarê têkoşînê Filîstînî de yê. Ma kerdişanê Hamasî qetî tesdîq nêkenê. La nêno a mana ke ma do paştî nêdê şarê Filîstînî. Erdogan seke ê paştî danê Hamasî têgêreno û bi rayîrê ney Îsraîlî rê şantaj keno. Dewleta tirke Rojhelatê Mîyanênî de haştî û aramîye nêwazena. Îqtîdarê AKP-MHPyî zî wazeno ke şer vilayê pêro cografya bibo. Şarê Filîstînî xemê Erdoganî de nîyo. Bi serran o îqtîdarê AKP-MHPyî dewleta Îsraîlî reyde têgêreno û bazirganîye keno. Wa şarê kurdî û hêzê demokrasîyî nê raştîyan bivînê.''