Fermandarê Merkezê Pawitişê Şarî Murat Karayilan rojnameyê Yeni Ozgur Polîtîka rê qisey kerd. Beşê diyînî yê roportajê Karayilanî ra tay noqtayê girîngî wina yê:

''9 serrî verî, 5ê nîsana 2015î de bi girankerdişê tecrîdê Îmraliyî prosesê şerî zî giran bi. 2015 de vera Herêmanê Pawitişî yê Medya hêrişê giranî dîyayî destpêkerdene. Vera nê 'Planê Çokdayîşî' yê dewleta tirke bi sloganê Xoserîya Demokratîke şaristanan de xoverdayîşî ameyî kerdene. Nê xoverdayîşanê xoîdarekerdişan 10 mengan dewam kerd la heyf ke nê nêresayî armancê xo. 2016 de Anqara, Îstanbul, Kayserî, Cizîre, Şemzînan û xeylê cayan de çalakîyê fedayîyî ameyî kerdene. Nînan ra 27 çalakîyê fedayîyî ser kewtî. 

26ê tebaxa 2016î de Cerablus ame îşxalkerdene, 31ê tebaxa 2016î de Çelê ra ver bi Ertûş û Herêmanê Pawitişî yê Medya hêrişê giranî dîyayî destpêkerdene. Dewleta tirke vera têgêrayîşê ma bi destekê NATOyî şerêko hîra da destpêkerdene. NATOyî o çax teknolojîya SÎHAyan da artêşa tirke. Nê SÎHAyî qewimîyayîşê şerî vurna. 2017-2018 de sere de eyaletanê Vakurî de xeylê cayan de xoverdayîşê tarîxî yê pîlî ameyî kerdene. 2017 de dewleta tirke dest pê îşxalê Başûrê Kurdîstanî kerd. 2017 de Xakurkê, 2018 de Efrîn, 2019 de Serêkanîyê ameyî îşxalkerdene.

Dewleta tirke seba ke gerîlayan qels bikera, Rojawan û Başûrî îşxal bikera armanc kerd ke kadroyanê ma yê îdareyan çin bikera. Coka 10ê sibata 2021î de bi destekê PDK û Iraqî hêrişê Garê kerd. Garê de dewleta tirke bin kewte la ancî zî vera Metîna, Avaşîn û Zapî 23yê nîsana 2021î de hêrişê hîrayî dayî destpêkerdene.

Xora nê serran de gerîlayan zî bi taybetî 2017-2018 de çarçewa newe ra awanbîyayîşî de xo aver berd. 

-Gerîlayan sîstemê xo bingeyê tîmanê pisporan, şerê tîmanê koordînakerdeyan de awan kerd.

-Metodê şerê erazîyan, tîmanê hereketînan û şerê tunelan ameyî afernayene. No taktîk hêverî Garê de ame ceribnayene û ser kewt.

-Bingeyê ercnayîşê Rayber Apoyî 'Teknîko tewr pîl merdim ê' de perwerdeyê xorinbîyayîşî, fedayîbîyayîşî, îdeolojîlî ameyî dayene.

-Stratejîya pawitişî ya bi tekbolojîya moderne ameye averberdene. 

Îşte nê 4 serran de nê xoverdayîşî ra dewleta tirke rixmê destekê PDK û NATOyî zî teng bîya. Na netîceyêka girîng a û mojnena ke xoverdayîşê gerîlayan eşkeno heqê her çî ra bêro. 

Nîsana 2024î de mabênê dewleta tirke, PDK û Iraqî de peymanêke ameye kerdene. Bi na peymane dewleta tirke senî Vakur de têgêraya Başûr de zî dest pê nê têgêrayîşî kerd. 3yê temmuze ra dima artêşa îşxalkere bi eskortîya PDKyî sînorî ra bi rehetî derbaz bîye. Artêşa îşxalkere Serê Metîna de îşxalê xo hîra kerd, Girê Biharî de dest pê îşxalkerdişî kerd. Nê pêroyî artêşa îşxalkere bi destekê PDKyî kerd. Artêşa îşxalkere nê têgêrayîşanê xo de pêşmergeyî zî girewtî mîyanê xo. Na babete de hêzanê PDKyî nameyê kurdayetîye rêzil kerd. Heyf ke PDK bi destê îşxalkeran têgêreno, fermanan ano ca. 

Ancî Başûr de dewleta tirke bi destekê PDKyî suîkastî bi rehetî kerdî. Nê prosesî de artêşa îşxalkere Lelîkanî ra ver bi Xinêre aver şîye, Girê Hemînî ra ver bi Sînênê aver şîye û Koyê Şekîfî newe ra îşxal kerd. Xûlasa 3yê temmuze ra nata bi ardimê PDK û Iraqî qewimîyayîşî zêdîyayî.

Koyê Garê cayê Başûrî yo tewr stratejîk o. Garê serdesta Mûsil, Hewlêr û Dihokî ya yanî qelbê Başûrî ya. Gerîlayî qerardar ê ke  teyna Garê de ney pêro Behdînan de artêşa îşxalkere bin bivisnê. Binkewtişê Behdînanî do bibo binkewtişê rejîmê dewleta tirke. Şero ke nê 4 serran de yeno kerdene, qerardarîya gerîlayan xurtêr kerde. Behdînan do artêşa tirke û rejîmê AKP-MHP-Ergenekonî rê bibo gor.''

Do dewam bikero...