Endamê Komîteya Rayberdişî ya PKKyî Murat Karayilan roja şemeyî bi meymanê bernameyêkê taybetî yê Stêrk TVyî û cewab da persanê Arfîn Firatî.

Qiseykerdişê Karayilanî ra beşêk wina yo:

''Komployo Mîyanneteweyî şexsê Rayber Apoyî de seba tasfîyekerdişê Têgêrayîşê Azadîye yê Kurdîstanî û kurdanê azadan ame kerdene. Bi nê armancî têgêrayîşê ma ame dormegirewtene. 34 dewletî tewrê nê komployî bîyî. Armanco bingeyîn zî qedînayîşê ma bi.

Labelê Rayber Apo Zîndanê Îmraliyî de tewirêko bimana û tarîxî mojna. Hem bi xoverdayîşê xo û hem zî bi tewirê xo yê neteweyî, hem zî bi paradîgamaya xo ya demokratîke cewab da komplo. Rayber Apoyî no komplo pûç kerd. Têgêrayîşê ma zî ey reyde tewrê nê xoverdayîşî bi.

Komployo Mîyanneteweyî nêresa armancê xo. Labelê ganî ma bizanê ke komplo amebi pûçkerdene zî bi temamî werte ra nêame wedaritene. Bêguman wezîfeyê kadroyanê Têgêrayîşê Azadîye têna şermezarkerdişê bînê komployî nîyo. Wezîfeyê ma yo bingeyîn bi temamî çinkerdişê komployî yo.

Çinkerdişê komployî bi temamî têna bi azadîya Rayber Apoyî û Kurdîstanî bena. Çunke Rayber Apo û Kurdîstan yew parçe yê. Çinkerdişê nê komployî û tesîrê ci Kurdîstan de rojdemê ma yê. Ma her wextî ra zêdêr nêzdîyê çinkerdişê komployî yê. Nika vera Rayber Apoyî tecrîdêko mutlaq esto. Estbîyayîşê nê tecrîdî yeno manaya israr û dewamkerdişê komployî.

Sîstemê tecrîdî eke bêro rijnayene faşîzm zî do bêro rijnayene û demokrasî do bêro Tirkîya. Sîstemê tecrîdî hînî wayîrê na mana û girîngî yo. Têkoşînê ma zî nê esasî ser o yo.

Ma do serra 22î de têkoşînê xo xurtêr bikerê û komplo bi temamî çin bikerê.

Dewleta tirke wazena bi komployî pêro parçeyanê Kurdîstanî de  qirkerdişan bikera, şarê kurdî bêstatu biverda.

9ê teşrîna verêna 2019î de dewleta tirkî bi hemkarîya DYA netîceya bazarîya gemarie de hêrişê Rojawanî kerd. No hêriş zî newekerdişê Komployê Mîyanneteweyî bi. Înan waşt ke Şorişê Rojawanî bi temamî çin bikerê. La netîceya xoverdayîşê QSDyî û şaran de no komplo zî ame astengkerdene. 

Hêrişê vera Serêkanîyê û Girê Sipî zî seba mendekerişê komployî bîyî. Nê hêrişî ham zî dewam kenê. Labelê nê prosesî  de ame dîyene ke bingeyê komployî qels bîyo. 34 dewletî tewrê Komployê 15ê Sibate bîyî. O çax kesêk vengê xo nêvet. La nika pêro dinya vera nê komployê ke bi tabetî vera Rojawanî yenê kerdene qebul nêkenê. No zî nîşan dano ke bingeyê komployî qels bi. Eke ma bieşkê têkoşînê vera komployî bi xurtî bikerê, şert û mercê hîna başêrî estê ke ma nê hêzanê komplogeran werte ra wedarê û Komployê Mîyanneteweyî çin bikerê. Bêguman seba naye zî ganî ma têkoşîn bikerê.''