Endamê Komîteya Rayberdişî ya PKKyî Murat Karayilanî pare kerd ke bira şinasnayîşê Qirkerdişê Êzidîyan a Belçîka û Hollanda pozîtîf a la qîm nêkena. Karayilanî vat dewletê ke tewrê nê qirkerdişî bîyî ganî bêrê muhakemekerdene.
Endamê Komîteya Rayberdişî ya PKKyî Murat Karayilanî derheqê bira şinasnayîşê Qirkerdişê Êzidîyan a Belçîka û Hollanda de ANFyî rê qisey kerd û bire ercnaye.
Ercnayîşê Karayilanî wina yo:
''Belçîka û Hollanda no qirkerdiş sey jenosîdî qebul kerd. Erey bi la reyna zî na birêka hol a. Goreyê na bire ganî nêzdîbîyayîşê sîyasî û ekonomîkî zî bêrê mojnayene. Verî ganî mesuldarê jenosîdî bêrê muhakemerdene. Şingal û şarê ci hewceyê newe ra awanbîyayîşîş yê. Şingalijî heta nika raştê zaf jenosîdan ameyî. Coka hewceyê înan pê 'xopawitişî' û îdareyê xoserî esto. No waştişê şarê Şingalî meşrû yo. Bira şinasnayîşê Qirkerdişê Êzidîyan a Belçîka û Hollanda pozîtîf a la qîm nêkena. Dewletê ke tewrê nê qirkerdişî bîyî ganî bêrê muhakemekerdene.
Endamê Komîteya Rayberdişî ya PKKyî Murat Karayilanî pare kerd ke bira şinasnayîşê Qirkerdişê Êzidîyan a Belçîka û Hollanda pozîtîf a la qîm nêkena. Karayilanî vat dewletê ke tewrê nê qirkerdişî bîyî ganî bêrê muhakemekerdene.
Hema zî dewleta tirke hêrişê Şingalî kena. Oyo ke DAÎŞ nêeşka bikero dewleta tirke wazena bikera û êzidîyan qir bikera. Eke hêzanê HPGyî verê DAÎŞî nêgirewtêne DAÎŞ do qirkerdişêko pîlêr bikerdêne. Ez bi taybetî na babete ser o fermandar Dilşêr Herekol yad kena. Seke zanîyeno 11 embazanê ma xo resna hewarê Şingalî. 3ê tebaxe de saete de xebere daye qerageh. 3-4 deqayan de embazan bire daye û 2 taburî kewtî rayî. Pê keda fermandar Dilşêr, Egîd Civyan û xoverdayîşê embazan û ewladanê Şingalî şarê ma xelisîya.
Semdo ke Rayber Apoyî ferman dayo ke wa şarê êzidîyan têna nêro verdayene PKK û HPGyî Şingal pawit. Dima korîdor ame akerdene û şerwananê YPG û YPJyî ra hetkarîye ameye waştene. Nê xoverdayîşê tarîxî verê qirkerdişî girewt. No jenosîdêko pîl bi, plankerde bi.
Çîyo ke dewleta tirke nika Efrîn de kena jenosîd o. Dewleta tirke dewan kena veng, sivîlan kişena, demografî vurnena. Dewletê Ewropa û hegemonîkî vera ney bêveng ê. Tewr peyên dewleta tirke rezaletêko pîl kerd û şehîdgehî kerdî hedef. Tede 67 şehîdî estbîyî. Dewleta tirke vato 'Tîya de qirkerdiş ameyo kerdene, no zî goro komkî yo.' Dewletê sey Rûsya, Amerîka sûcanê dewleta tirke yê vera Efrînî mîyan kenê. Almanya zî destek da nê sûcan. Hesabê nê kerdişan ganî bêrê persayene.
Hesabê qirkerdişanê Şingal û Efrînî ganî bêrê persayene. Kurdî ganî hîna bi cîdîyet vera dewleta tirke têkoşîn bikerê. Dewleta tirke wazena çîyê ke aye Efrîn, Şingal, Serêkanîyê de kerdî pêro Kurdîstan de bikera. La vera ney her roje têkoşînê ma yeno pîlkerdene. Şarê ma do ser bikewo.''
