Endamê Komîteya Caardişî ya PKKyî Mûrat Karayilan beşdarê 'Programê taybetî yê Stêrk TVyî  bî û cewab da persanê Serdar Yektaşî.

Karayilanî destpêkê qiseykerdişê xo de ard vîrî ke di şorişger û dîplomatê hêcayî 15ê teşrîna verêne de herêmêka nêzdîyê Silêmanî de bi hawayêkê namêrdî amey qetilkerdene û vat: “Hevre Demhat û Cemîlî bi rêzdarî ana xo vîrî û ma dîyar kenê ke gonya înan do erd de memana û ma sozê xo yê seba şehîdan tekrar kenê. Ma hêvî kenê ke selahîyetdarî seba roşnkerdişê nê komkîştişê namêrdî bibê hetkar. Karayilanî reyna şehîdê Şorişê Rojawanî ardî vîrî û nîşan kerd ke do bi xurtkerdişê têkoşîna azadîye ya Kurdîstanî vîrameyîşê înan ra wayîr vejîyê.

Karayilanî bale anite 1ê Teşrîna Peyêne ya Roja Kobane ya Dinya ser û vat: “Kurdan û dostanê înan nê her di rojê girîngî bi hawayêkê girseyî pêşwazî kerd. Reya verî na sewîye de bi mîlyonan merdimî têkoşîna azadîya şarê kurdan rê wayîr vejîya. Na yewe sewîyêka gelek girîng û hêca ya. Çîyo ke newe yo ke pêroyê dinya de merdimî kurdan rê wayîr vejîyenê. Ez her kesî yo ke Kurdîstanî de û her hetê dinya de tewrê Roja Rojawanî ya Dînya bîyê selam kena. No helwestê wayîrvejîyayîşî û paştgîrîye seba pêro xoverdayoxan do biba hêzeko pîl.

Nê prosesî de hîsê neteweyî yê şarê ma hîna zaf bî xurt, pêroyê Kurdîstanî de wayîrvejîyayîşêko pêt vejîya meydan û na yewe her ke şîye do hîna pêt biba. Bi taybetî şarê Başûrê Kurdîstanî nê prosesî de wayîrê rolêkê girîngî yo. Demê xoverdayîşê Kobane de şarê Kurdîstanê Vakurî bereyî wayîrvejîyayîşî rê kerdîbî. Nika zî bereyê wayîrvejîyayîşî rê keno. Bi taybetî kurdanê hêcayan yê Başûrê Kurdîstanî yê ke tewrê xoverdayîşî bîyê selam kena. Pêrûnan rê serkewtiş wazena.

Hêzê Rayapêroyî Hêzo Sereke Yo

Rewşêka zaf girîng a ke 2ê teşrîna peyêne sey Roja Rojawanî ya Dinaya ameya firazkerdene û pêroyê dinya paştgîrîya xurte nîşan daye. Na seserre de demo ke behsê hêz û dînamîkanê bingeyênan yeno kerdene, medya yanî hêzê rayapêroyî sey hêzo hîrêyin êno hûmaritene. Labelê serebûtê ke qewemîyayê musnenê ke hêzê rayapêroyî xurtêr beno û eke rast bêro xebitnayene beno hêzo sereke. Zextê hêzê rayapêroyî wayîrê desthilatdarîya pîle yo û naye ra  wayîrê rolêkê girîngî yo.

Komplo Vera Destkewteyanê Kurdan Pêrunan o

Karayilanî nîşan kerd ke galê ke 9ê teşrîna verêne ra bîyo vera Vakur û Rojhelatê Sûrîye ênê kerdene yew komplo yo û vat: “Nê galan bîlasebê 9ê teşrîna verêne de dest pênêkerd. No komplo hîna zaf hîra yo. No proseso newe yê komployî verî Rayber Apoyî xo rê keno hedef û vera destkewteyanê pêro kurdan o. Taybetmendîyêkê xo yo winasî esto. Îtîfaqê AKP-MHP rejîmê ergenokonî yo ke nika Tirkîya de desthilatdar o, nîjatperest û neteweperestan reyde îtîfaq kerdo û desthiladdarîyêka winasî yê elelede nîya. Nê hêzan seba prosesê neweyî yê vera azadî, estbîyayîş û destkewteyanê kurdan konsepteko newe afirnayo. Naye ra serkewte galî gelekî hîra yê. Seba ke armancê xo bîyarê ca rewşa jeo-polîtîk ê Tirkîya xebitnenê. Amerîka û Rûsya ke sey hêzê superî pênas benê bi metodanê xo tewrê nê komployî bîy. Kes nêzano ke Erdogan û Trumpî çinayî ser o qisey kerdo, kamcîn pazarîya qilêrine ameya kerdene. Na rewşe seba Putîn û Erdoganî zî wina ya. Înan pîya planêk amede kerd. Armancê nê planî çinkerdişê sîstemê netewa demokratîk ê şarê Vakur û Rojhelatê Sûrîye yo. Erdoganî vat ke ê do herêma biemnîyetî awan bikerê. Aseno ke înan hêzanê hegomanîkan reyde pêkerdo. Gladîyoyê NATOyî zî paştgîrîya înan keno. Dîyar o ke verê şarê kurdan planêko newe kerdo amede.

Vera hêzê diyîn ê tewr pîlî ê Natoyî , vera pêro teknolojîyê înan QSD 10 rojanê destpêkî de û 26 rojî ey ra pey xoverdayîşêko manadar nîşan da û hîna zî dewam keno. Ma nê xoverdayîşî selam kenê. Karayilanî nîşan kerd ke xoverdayîşê şarê kurdan o ke nê 7-8 serranê peyênan de vera El Nusra û DAÎŞî dayo tesîrê rayapêroyî yê dinya kerd. Naye ra serkewte rayapêroyî yê dinya kurdan ra wayîr vejîya. Karayilanî bale anite helwestê Amerîka û Rûsya ser û derheqê galanê îşxalî de vat: “seba şermazarkerdiş û vindarnayîşê galanê Tirkîya Konseyê Emnîyetî yê Neteweyanê Yewbîyayeyan de gelek kombîyayîşî amey kerdene, pêşnûmayî amey amedekerdene labelê Rûsya û Amerîka vera vinetî û veto kerdî. Nêverda ke bêrê qebulkerdene. Çîyêko balkêşo ke nê di hêzê ke zaf babetan de pê nêkenê na babete de pêkenê.” Karayilanî ard ziwan ke waştiş û armancê Tirkîya heta nika nîyamo ca la hîna zî armancê xo de israr kena.

Dinya Kurdan Reyde Ya, Xoverdayîşo Sîyasî, Leşkerî û Komelkî Dewam Keno

Karayilanî vat: "Beno ke Girê Sipî û Serêkanîye hetê îşxalkeran ra bêrê îşxalkerdene labelê şarê Rojhelat û Vakurê Sûrîye kewto zerrîya dinya û paştgîrîya xurte gêno. Xoverdayîşo sîyasî, leşkerî û komelkî dewam keno. Rewşe nîşan dana ke şarê kurdan payan ser o yo, armanc û planê îşxalkeran sernêkewtê, o yo ke ser kewto şar bi xo yo. Xoverdayîş do nê bingeyî ser o dewam bikero.

Meseleya Kurdan Çiqas Biba Mîyanneteweyî Hende Kurdan Rê Yena Piro

Amerîka û Rûsya pîya peymanan amede kenê û na zî musnena ke planê ke ameyê kerdene pîl ê. Çunke hêzê tewr pîlî yê dinya mîyanê nê karî de yê. Hêzê QSDyî zî yew sîyaset teqîb kenê. Rûsya ameye herême dima ra hêzê Sûrîye zî amey. Amerîka şîye la pey cû agêraye. Nê pêro musnenê ke mesala kurdan bîya mîyanneteweyî. Dewletê herême se serr o ke kurdan rê zulim kenê la kes vengê kurdan nêeşnaweno la nika vengê kurdan reseno her hetê dinya. Meseleya kurdan çiqas biba mîyanneteweyî do hende karê kurdan rê biba. Zaf hetê dinya de meseleyê sey meseleyanê kurdan ameyê çarekerdene. Amerîka, Rûsya, Ewrûpa de nê meseleyî ameyê halkerdene. Heqê ziwan, kultur û xoîdarekerdişî yê şaran û neteweyan heqêko xozayî yo. Şarê kurdan zî heqê xo wazeno. No waştişê heqî nika sey ‘teror’ êno namekerdene. Meseleya kurdan çiqas biba mîyanneteweyî do kurdan rê hendê bêro piro.

Çîyo ke Erdogan Keno Qirkerdiş o

Karayilanî nîşan kerd ke çîyo ke Erdogan keno qirkerdiş o û vat: “Erdogan bi hawayêko eşkera jenosîdî parêzeno û na yewe her kesî rê ferz keno. Kombîyayîşê mîyanneteweyî de xerîteyêk nîşan daye û dîyar kerd ke Tirkîya do Vakur û Rojhelatê Sûrîye îşxal bikera û koçberan tîya ca bikera. O taw kesî çîyêk pers nêkerd û nêvat ke çi heqa Tirkîya esta ke erdê Sûrîye îşxal bikera? Sekreterê Neteweyanê Yewbîyayeyan vera nê pêşnîyarî de bêveng maneno û no kî musneno ke no sazgeh zî hemparê nê qirkerdişan o. Rastîye wina ya. Ma kurdî seba ke dewlet nîme çi bikerîme sey teror êno nîşandayene, îşxalê vera şarê kurdan zî sey heq êno dîyene. Gelo çîyêko winasî mumkun o? Vera şarê ma her roj teror êno kerdene Domanê ma, merdimê ma her roj ênê qirkerdene. Winî aseno ke Neteweyê Yewbîyayeyî menfeatanê dewletanê endamanê xo esas gênê. Sûrîye de derfet kewt destê kurdan ke statu bigêrê labelê Tirkîya nêverdana.

'Ma Kurdî Pêro Eynî Keştîye De Yê'

Karayilanî nîşan kerd ke meseleya tewr pîle ya kurdan yewîya neteweyî ya û vat : “Ma kurdî pêro eynî keştîye de yê. Eke ma noqê binê awe bibîme ma do pêro bibîme. Ma tena pîya eşkenîme ke ser bikewerîme. Nê demî de firsendêko girîng esto. Ewro bi xoverdayîşê Rojawanî vengê kurdan reseno her hetê dinya. Sîstemê dinya pêro na mesela ser o vindeno. Eke kurdî sîyaset û stratejîyêka hempare biafirnê ê do ser bikewê.”

'Tehlîkeyê Dest Vera Destkewteyanê Başûrî Ser Nayîş‘

Karayilanî bale anite ser ke tehlîkeyê vîndîkerdişê destkewteyanê Başûrî esto û vat “Iraq de qanunê bingeyênî yê neweyî ser o munaqeşeyî yenê kerdene. Herêmê ser o hesabê Dewleta Tirkan estê. Yeno vatene ke zaf kesî Kerkûkî ra berdê û perwerde kerdê. Tirkîya cad kena ke sûnîyan organîze bika Û DAÎŞî rê amedekarîya herême kena. Nê pêro musnenê ke tehlîke zaf pîl o.

'Seba Yewîya Neteweyî Ma Ganî Gamêka Girînge Berzê‘

Karayilanî nîşan kerd ke ganî bingeyê yewîya neteweyî ser o gamê girîngî bêrê eştene û pêşnîyarê winasî kerdî: “Nika KNK esto, bi rayîrê KNKyî roşnvîr, nuştox, hunermendê bêhetî yê Kurdîstanî eşkenê komîsyonêk awan bikerê. Wa no komîsyon pêro partîyanê kurdan reyde yewbîndîyayîşan bikero û înan ra biwazo ke xeta yewîya neteweyî ser o bibê kom. Kam na xete ra agêreno ganî bêro rexnekerdene û helwestêk bêro nîşandayene.