Endamê Komîteya Rayberdişî ya PKKyî Murat Karayilanî derheqê xeylêk babetan de cewab da persanê ANFyî û rojdem ercna. Beşê diyînî yê roportajê Karayilanî ra tay noqtayê girîngî wina yê:

''Ma bîlançoya şerî ya 2022yî vila kerde. Serra 2022yî serra têkoşîn û xoverdayîşî bîye. Bîlançoya ma ya şerî raşt a. Rejîmê AKP-MHPyî plan kerdêne ke 2022 de çend mengan de Herêmanê Pawitişî yê Medya îşxal bikero, dima verê xo bido Garê, Qendîl, Şingalî ûsn la Zap de teng bîyo. Înan nameyê operasyonê xo  kerd 'Pençe-Kilit' la Zap de kilîd bîyî. Dewleta tirke rixmê hêrişanê îşxalî, destekê hukmatê Iraqî û PDKyî zî nêeşkaye Herêmanê Pawitişî yê Medya îşxal bikera. Planê înan hetê xoverdayîşê gerîlayan ra ame pûçkerdene.

Dewleta tirke sey her serre 2022 de zî vat ke 'ma do Vakur de gerîlayan biqedînê.' La reyna nêeşkaye. Wezîrê Şerî yê dewleta tirke pê zûran rayaumûmîye xapîneno. Vano gerîlayan 4 hezar şehîdî dayê. Ma 2022 de 301 şehîdî dayî. Artêşa tirke ma ra 10 qatî zêdeyêr kişteyî dayî. Hulusî Akarî vat 'Operasyonê Pençe-Kilitî temam bîyo' yanî înan îşxal kerdo temam. No raşt nîyo. Zap de hema zî pêkewtişî est ê û dewleta tirke nêeşkena uca ra vejîya. Ez Akarî ra persena ke madem ê hende serkewte yê çira destê gerîlayan de cenazayê leşkerî est ê, çira cenazayanê xo 11ê êlule de vêşnayê, çira xo Girê Cûdî, Sêdarê û Girê Amedîyê ra apey girewt, senî şima serê binkewtişê xo yê rojawanê Zapî bigêrê, pêkewtişê Çemço û Sîda yê Zapî senî dewam kenê? Hulusî Akar û Erdogan seba menfaetanê xo bîyî sebebê mergê leşkeranê ciwanan.

Ez reyna veng dana ke eke şima hende pê xo bawer ê wa heyetê xoserî bêrê Sîda de derheqê hêrişanê kîmyewîyan de cigêrayîş bikerê. Saca de 11 ewladê şarê kurdî pê çekanê kîmyewîyan ameyî qetilkerdene. Akar û hemkarê ci PDK do nêeşkê serê ney bigêrê. Tunelanê şerî yê Şehîd Xursîyî de nê 11 gerîlayê qehremanî pê çekanê kîmyewîyan qetil bîyî. Nê gerîlayî seba ke xo hêrişanê kîmyewîyan ra bipawê yew odaya tunelî de ameyê pêser. Embazanê ma dima ke şîyê uca dîmenê meyîtanê înan girewtî. Bedenê înan de rêçê yew guleyî zî çin o. Şarê ma qetî do hesabê ney biperso û nê gerîlayanê qehremanan xo vîr a nêkero. Ma do qesasê nê embazanê xo bigêrê.

Mi bernameyêkê televîzyonî de vatbi ke 'Eke leşkerê tirkî Amedîyê ra xo apey nêgêrê do bimirê. Rayîrêkê înan o bîn çin o.' Raşta zî dima ke dişmenî derbê giranî werdî tîya ra xo apey girewt. Eke dişmen roja bîne uca de bimendêne do îmha bibîyêne. Coka ez vana Akar nê leşkeran şaweno mergî.

Artêşa tirke îrade û felsefeya gerîlayan hesab nêkerd û pê destekê PDKyî û teknîkê xo bawer kerd. La qerardarîya gerîlayan ê bin kerdî. Artêşa îşxalkre payîzê 2021î de Girê Sorî û Werxelê de bombaya nuklere ya taktîke şuxilnaye. Coka ma tîya ra hêzê xo apey antî. Artêşa tirke zî vat qey ê na bomba bişuxilna ma do tim xo apey gênê. La no yew taktîk bi. Dewleta tirke vatêne qey pê çekanê kîmyewîyani bombayanê qedexekerdeyan û teqaberan gerîlayan tasfîye bikera. La embazê ma tedbîrê xo girewtî û taktîkê xo pratîze kerdî.

Artêşa tirke teyna hetê hewayî ra wayîra avantaje bîye. Vera ney; ma esasê şerê erazîyî de, bi tîmanê qijan têgêrayî û tunelê şerî viraştî. PKKyî bi nê tedbîranê xo tecrubeyê xo yê şerî û serkewtişê xo eşkera kerdî. Artêşa tirke seba îşxalêkê mendeyî ameye la tay cayan ra xo apey ant. Gerîlayan vera nê teknîk û teknolojî û hêrişanê bêmabênan xoverdayîşêko pîl mojna. Rejîmê îqtîdarê AKP-MHPyî wina pere û budçeya şarî dano şerî.

Perspektîfê şerê emserînî yê gerîlayan eke Rojawan de bêro caardene dewleta tirke do Rojawan de zî bin bikewa. Hînî perspektîfê ma bîyo qetî. 2022 de xoverdayîşêko pîl qewimîya. 2023 de no xoverdayîş do bibo pîlêr û netîce bigêro. 2023 de xoverdayîşê gerîlayan, xoverdayîşê Îmraliyî yê Rayber Apoyî, xoverdayîşê zîndanan û şarê ma do netîceyanê girîngan bido. Dewleta tirke Zap de teng bîye, kilîdkerde mende. Dewleta tirke seba ke tîya de bin kewta û gêrena yew hîkayeya serkewtişî verê xo da Rojawanî. Hetê bînî ra serewedaritişê 'Jin, Jiyan, Azadî' yê Rojhelatê Kurdîstanî zî mujdeyan dano

Weçînayîşan rê tay mend. Her ke weçînayîşî benê nêzdî hêrişê faşîstî zî do bizêdîyê. Rejîmê AKP-MHPyî yo faşîst armanc keno ke têgêrayîşê ma tasfîye bikero, hêrişê şarê ma û hêzanê demokrasî bikero û bi nê hawayî ser bikewo. Coka têkoşînê gerîlayan, şarê ma û hêzanê demokrasî zaf girîng o.

No proses prosesêko tarîxî û girîng o. Ma neçare yê ke 2023 de ser bikewê. Ma kenê ke mesuldarîyanê xo bîyarê ca. Ma planê xo kerdî ke 2023 de qetî ser bikewê. Nê prosesê girîngî de sere de cinî û ciwanî wa her kes tewrê xoverdayîş û têkoşînî bibê. Wa her kes erk û mesuldarîya xo bîyaro ca.''