Fermandarê Qerargehê Merkezê Pawitişê Şarî Mûrat Karayilanî Stêrk TV’yî rê qisey kerd.

Karayilanî bale ante serê konseptê îşxalkarîye û qirkerdişî yê dewleta Tirkî yê hemverê şarê Kurdî û vat, „Tayê vanê ‚wa PKK şer nêravêrno Başûrî.‘ Şemzînan ra heta Dêrsim, Zagros ra heta Serhed ma her ca de hemverê dewleta Tirkî ya kolonyale şer kenê. Çar serrî yo ma şerêkê çetinî mîyan de yê. Dewleta Tirkî vat, ‚çimê ci Vakurê Iraqî yo‘ û hêrişê Başûrê Kurdistanî kena. Ma şer nêravêrnayo Başûr, dewleta bi xo şer ravêrnayo Başûr. Dewleta Tirkî sînor ra ravêrena û yena Başûr, na yewe ra ma Xakurkê de û Zap de şer kenê. Ê wazenê ma bi temamî raste ra wedarê, Vakur de nêeşkenê çin kero, vana ‚ma do înan Başûr de çin kerê.‘ No konseptêk o. Rastîya mesela wina ya.“

 'Şerê Ma Seba Heme Kurdan o‘

Karayilanî vist vîrî ke ê Vakurê Kurdistanî de şer kenê û vat: „Seba ke şerê ma yê Vakurê Kurdistanî dewlete tenge de verdaye, ê wazenê Başûrê Kurdistanî de provokasyonî bikerê û Kurdan hemverê yewbînan de bidê şerkerdene. Ma têgêrayîşêko fedaî yê. Na babete de ganî şarê ma yê Başûrê Kurdistanî ma rind fam bikero. Ma seba Başûrê Kurdistanî zî hêzêkê pawitişî yê. Seba azadîya Vakurê Kurdistanî şer kenê la no şerê ma seba heme Kurdan o. Eke no şerê ma bin bikewo do dewleta Tirkî tu cayêk de nêverdo ke Kurdî bibê wayîrê statuyêk. Ma wazenê na dewleta faşîste ya kolonyale bin fînê û nê de zî menfaatê şarê Kurdî esto. Ganî na yewe rind bêro zanayene.“

Karayilanî vat ke 2 hezar şehîdê înan Başûrê Kurdistanî de yê û ard ziwan ke tewr peynî hemrayê înan Helmet (Dîyar Xerîb) qey şarê xo canê xo feda kerd.

'Wa Vîr ra Nêkerê; Eke Ma Bin Bikewê do Dore Bêro Înan‘

Karayilanî vat ke kewtişê dewleta Tirkî yê mîyanê Başûrê Kurdistanî heman wextî de do seba înan bibo sebebê serkewtişî û vat, „Eke ma Başûrê Kurdistanî de înan bin fînê do Enqere de zî bin bikewê. No rejîmo faşîst do bin bikewo. Çunke şerê ma hendî dereceya tewr berze de yo. Nê şerî de ma birayanê xo ra, şarê xo ra wazenê ke ma rê nêbê asteng, eke înan ra yeno wa paştî bidê ma. Qe nêbo wa nêdî vernîya dişmenî, dişmenî rê hetkarî nêkerê. KNK’yî seba yewîya neteweyîye veng da. Ma nê qerarê înan pozîtîf vînenê, nê qerarî de ma înan dir ê. Verî ra ma bale ancenê serê muhîmîya yewîya neteweyîye. Nê demê tarîxî û krîtîkî de yewîya neteweyîye zaf lazim a. Na yewe ra gamêka winayêne amî eştene. Ma her tim yewîya neteweyîye rê amade yê.“

'Hesabê Îşxalkaran do Pê Nêgêrê‘

Karayilanî ard ziwan ke dewleta Tirkî gefanê pîlan Rojawanê Kurdistanî û Vakurê Sûrîye rê wanena û vat, „Bi kilmî ez eşkena nê vajî: Hesabê dewleta Tirkî ya îşxalkare na rey bica nênê. Dewleta Tirkî wayîrê ê hêzî nêya ke her cayo ke biwazo bigêro. Mesela nika wazena Başûrê Kurdistanî îşxal bikero, la bi asanî nêeşkena na yewe bica bîyaro. Di mengî yo rixmo ke heme hêzê xo seferber kerdê, nêeşkaya Xakurkê bigêro. Eke bieşkayêne do heta bi Zapî bigirewtêne. Ûca mabênê dişmen û embazanê ma de mesafeyêko kilm esto. Her roje sûyîqest hemverê yewbînan de kenê. Bêguman ganî dişmen qij nêro dîyene, hêzêkê xo esto, labelê bi xoverdayîşî o nêeşkeno cayo ke wazeno bigêro.“

Karayilanî vat, „bi vînayîşê mi ganî çew xo nêanco. Ganî her kes erdê xo ser o bimano. Erdogan vano do mîlyonêk merdim Rojawan de bica bikero. Seke Efrîn de kerd wazeno merdimanê ma vejo û tayê bînan bica bikero. Bi hawayêkê fermîyî vano ke do pakîya etnîkî bikero. Tewr peynî nameyê ‚korîdorê aşitîye‘ da planê xo ra. 45 serrî verê nikayî gama ke înan Qibris îşxal kerd nameyê ‚Têgêrayîşê Aşitîye yê Qibrisî‘ şuxulnabi. Nika zî planê îşxalê Rojawanî ra vana ‚korîdorê aşitîye.‘ Ma nînan rind nas kenê. Çîyo ke ci ra vana aşitî, îşxal o û qirkerdiş o. Na yewe ra ganî çew fek dewa xo ra vera medo, çew xo nêanco. Eşkenê ê cayî de dişmenî bin fînê. Çîyo muhîm no yo ke bi hêzê xo bawer bê û amadekarîyanê xo bi xurtî bifînê pratîkî.“

Karayilanî vat ke gama amadekarîyêka rinde bêro kerdene, xopawitişê şarî bêro xurtkerdene û şerê şarî yo şorişgêr bêro kerdene do dewlete her ca de bêro binfînayene û şoriş bêro biserfînayene.