Endamê Komîteya Rayberdişî ya PKKyî Murat Karayilanî Fermandarê Eyaletê Mêrdînî yê HPGyî Hewram Awyerî (Hasan Mahmud) bi eşkerayîyêke yad kerd ke o Rojhelatê Kurdîstanî ra bi û 29-30ê adara 2021î de Mêrdîn de şehîd bi.

Karayilanî vat: ''Embaz Hewramî ciwanîya xo de têgêrayîşê ma şinasna. Ey Zanîngehê Kurdîstanî yê Sine de beşê komputurî de wendêne. Ey bi serran zanîngeh de têgerayîşanê Kurdîstanî ser o cigêrayîşî kerdî. Ey dî ke Rayber Apoyî tesbît kerdo ke çira têgêrayîşê kurdan ser nêkewtê. O zî mîyan de 5-6 embazî zanîngeh verdenê û 2006 de tewrê gerîlayan benê. Çunke ê serkewtiş mîyanê PKKyî de vînenê.

O waştişê xo ser o 2013 de Botan de ame cakerdene û tewrê Fermandarîya Besta bi. Dima derbazê Cûdî bi û tîya de fermandarîye kerde. Wexto ke Fermandar Gelhat şibi Xoverdayîşê Kobanê embaz Hewramî cayê ci girewt. Embaz Hewram Botan de tewrê xeylêk operasyonana bi. Cizîre, Silopî û Elkê de tewrê xeylêk çalakîyan bi. Ey wextê xoverdayîşê xoîdarekerdişî yê Botanî de erkê xo ardî ca. O xoverdayîşê Cizîre û Silopî de eleqedar beno. Dişmen 9 rojan nêeşkabi debikewo taxanê Cizîre, embaz Hewramî serkêşîya nê xoverdayîşî kerdbî. 

Qirkerdişanê Cizîre û Silopî ra dima embaz Hewram 60 embazanê bînan reyde 4ê nîsane de kewt3i Silopî, 2 rojan şer kerd û dişmenî ra hesab persa. Dima hêzanê xo reyde agêra koyan. Dima o bi fermandarê Elkê. Wextê hêrişanê giranan ê vera warê Kato Jîrka de embaz Hewram bi giranî birîndar bi. Embaz Hewram tedawî ra dima reyna agêra Botan. ey şerê Botanî de serkêşîye kerde. 

Embaz Hewramî şorişgêrê Kurdîstanî bi. Ey xo Botan de xerîb hîs nêkerdêne. O bi cewherê xo bi wayîrê nasnameyêkê neteweyî. O wexto ke bi Fermandarê Eyaletê Mêrdînî zî her kesî zanayêne o do uca de têkoşîn bikero. Tewrbîyayîşê ey ra dima pêro keyeyê ci zî tewrê gerîlayan bi. Ey dima ke tedawî bi serrêke Akademîya Apolloyî de dersî dayî. Senî ke Fermandar Simko Rojhelatê Kurdîstanî ra şibi heta Dengizê Reşî, Dêrsim, embaz Hewramî zî rayîrê Simkoyî teqîb kerd. 

O embazêko zaf qehreman bi. Coka o her ca de asayêne. No zî a raşte hetê ma ra amebi rexnekerdene. Heta şehadetê ci zî nê sebebî ra bi. Çunke dişmenî o teqîb kerdêne. Embaz Hewramî wextêke venga fermandar Rêberî da ke şibi Amed. Dişmenî o çax Bagok da bombayan ver, dima zî erdî ra hêrişêko pîl kerd. Uca de embaz Rûstem, Rêber û Egîd şehîd bîyî. Şehadetê embaz Hewramî zaf tesîrê ma kerd. Ey waştêne her çi bi xo bikero, no zî bi sebebê meseleyanê asayîşî. 

Her şehadet ma rê mesajêk o. Şehadetê embaz Hewramî ra dima heman cayî de 6 embazî şehîd bîyî. Ganî ma wayîrê vîrameyîşê înan bibê. Embaz Hewram gêra raştîye û bi nê hawayî xo resna PKKyî. Ey sey ciwanêkê kurdî waşt tewrê şorişî bibo û bi. 

Jawero, Hewramanî ra vejîyayîşê embazêkê sey Hewramî seba keyeyê ey rûmetêko pîl o. Hemleya embaz Hewramî normal nîya. O wextêkê kilmî de pê kede û xîretê xo bi fermandarê eyaletî. Ciwanê Kurdîstanî ganî sey embaz Hewramî têbigêrê û bikewê rayîr. Cuya ke embaz Hewramî mîyanê têgêrayîşê ma de 16 serran temsîl kerda seba her kesî vengdayîş bi. Ganî ma bi azadîya Kurdîstan û Rayberîye wayîrê vîrameyîşê ci vejîyê. Şehadetê qehremananê sey ey ma rê ferman o. Sey embazanê ey ma do dewaya ci ser bivisnê û bi nê hawayî ey bêmerg bikerê.''