Endamê Komîteya Rayberdişî ya PKKyî Murat Karayilanî bi meymanê Stêrk TVyî û qala hêrişanê vera Garê û xoverdayîşê gerîlayan kerde.

Qiseykerdişê Karayilanî ra beşêk wina yo:

''Xoverdayîşê Garê nika ra sey destanêk tarîx de cayê xo girewt. Pê kede, çêrî û fedakarîya embazan no destan nusîya. Operasyonê îşxalê Garê asta berze de amebi plankerdene û rêxistinkerdene. Serekkomar, wezîr û fermandarîyê înan bi xo sere de vindertbî. Amadekarîya bi mengan ra dima hêriş ame kerdene.

Ma bi taybetî 6 mengan ra nata vera hêrişanê dewleta tirke şerêkê çetinî kenê. Rixmê hende îmkan û teknîkî artêşa tirke ser nêkewte. Rejîmê AKP-MHP-Ergenekonî de krîz esto. Ameyoxê înan binê tehlukeyî de yo. Înan waşt zimistan de derbe pirodê ma û wina payan ser o bimanê.

Eke ê nê hêrişan de ser bikewtêne do weçînayîşê verwextî bikerdêne. Na serre Vakurê Kurdîstanî de vera ma bi desan operasyonî ameyî kerdene. Nê pêro bênetîce mendî. Înan waştêne Garê zî îşxal bikerê û vera hêzanê ma bibê wayîrê pozîsyonêkê serdestî.

Dewleta tirke zanayêne ke esîrî herême de yê

Heman esîrî herême de bîyî. Nê war de adahîyê înan estbî Înan waştêne esîran weşû war bivisnê destî û şov bikerê. Înan asta tewr berze de no operasyon plan kerd. Erdoganî qumar kay kerd û bin kewt. O seba îşxalî amebi.  A raşte ey waşt ke Garê bivurno şovê sîyasî la nêeşka.

Rayberîya embazanê ma Şoreş, Rojhat û Seyfîyan de xoverdayîşêko pîl ame kerdene. Dişmenî gazî zî şuxilna. Eke hamnan bîyêne înan ra yew zî nêeşkayêne bixeliso. Ma bi nê hawayî netîceya gerîlatîya profesyonele dîye. No tecrubeyê Heftanînî Garê de virazîya.

Erdogan reya verêne mecbur mend ke vajo 'Ma bin kewtî'

Erdogan reya verêne seba Garê vat ê bin kewtî. No serkewtişê çêranê ma yo. Xora netîceyê girîngî yê nê xoverdayîşî estê. Ma çend qala Garê bikerê zî qîm nêkeno.

Goreyê agahîyanê embazanê ma nêzdîyê 20 droneyî, 41 teyarayê şerî Garê de perayî. Helîkopter û teyarayê Atakî ge ge kewtî dewre. Înan da bi desan cayan ro labelê têna embazêkê ma şehîd bi embaz Gelhat. Embazê ma yê ke şehîd bîyê, şer de bîyî.

Garê safhayêka newî ya

Gerîlayî heta peynî do teknîk û xîretan dişmenî pûç bikerê. Dişmen Garê de zaf çi musa. Devlet Bahçeliyî vat ke hînî ê ganî vajê Garê ra verî Garê ra dima. Yanî Garê safhayêka newî ya. Pê nê xoverdayîşî ma derbazê safhayêka newîye bîyî. Coka serra 2021î serra normale nêbena. Ma pê bawer ê ke ma do pêro serre pê nê metod û ruhî têkoşîn bikerê û ser bikewê. Garê de 2 netîceyî vejîyayî werte; 1-ruho fedayî yê Rayber apoyî, tewiro çêr. 2-Metodê têkoşînî yê gerîlatîye. Nê wirdan netîce girewt û destanêk aferna.

Operasyonê xelisnayîşê esîran nêbi, ê kiştişî bi

Operasyon se ra se xelisnayîşê esîran nêbi. Înan waştêne Garê de ca bidê xo. La ablûqa ra dima înan xo apey ant. No operasyon cara karê biaqilan nîyo. Merdim senî eşkeno pê gaz û bombayan bireso kampa binê erdî? Înan çend hêriş kerd zî Fermandar Şoreş û embazanê ci derb daye dişmenî ro coka înan kampe ra xo ant. Dima înan pê teyerayan kampe daye bombayan ver la reyna dişmenî xo ant. Yanî înan gazî ra dima zî bi desan reyan heriş kerd. Înan seba esîran çîyêk nêkerd. Eqsê ci kerdişê înan ra esîrî kişîyayî.

Ê zûran kenê vanê seba xelisnayîşê ameyî. Înan waştêne esîranê xo bikişê û îqtîdarê xo bidê dewamkerdene. Înan de wijdan çin o. Têgêrayîşê ma heta nika qet yew esîr nêkişt. Heta nika ma bi seyan esîrî girewtî û dima înan vera dayî.  Seba nê esîranê Garê kes mabênçîtî nêkerde. Çira? AKP û MHPyî nêverda. Goreyê agahîyanê ÎHD û dezgehanê bînan înan heyetî awan kerdbi û muracat kerd la destûr nêdîya înan. 

Embazanê ma semedê pawitişê esîran xo feda kerd

Yanî seba xelisnayîşê esîran çew nêame cayê ma. Wa esîrî ney hol bizanê. Ma sey têgêrayîş goreyê krîteranê şerî têgêrenê. Embazanê ma seba pawitişê esîran xo feda kerd. Ma esîran sey meyman vînenê. Mesuldarê kişîyayîşê nê esîran bira nê operasyonî daye. Mesuldarî Erdogan û Hulusî Akar ê. Eke Tirkîya de huqûq estbîyêne înan îstîfa kerdêne. Çira înan ra hesab nêno persayene?

Wa yew heyeto xoser bêro herême de cigêrayîş bikero

Ma heta nika zaf reyan seba pawitişê esîran fedakarîye kerde. Warê ma akerde yo. Wa heyetê xoserî bêrê biewnê. Ê eşkenê cenazayanê embazanê ma yê şehîdan ra numûne bigêrê û kampe de cigêrayîş bikerê. Ma venga înan danê ke wa bêrê cigêrayîşan bikerê. Wa bivînê faşîzmê dewleta tirke se kerdo.

Cotyar Merdimê ma bi

Ez wazena bale biancê babetêke ser. Merdimê ma yê bi nameyê Cotyarî zî tîya de bi. Embazan amadekarîye kerdêne ke ey berê. A raşte o hetê embazan de bi tam zî meyman nêbi. Merdimê ma bi. Bêguman mesuldarî reyna yê ma ya. La mesuldara qirkerdişê ey dewleta tirk a. Bêwijdanî û bêrehmîya înan bîye sebebê serebûtêkê winasênî.

Ê têna babeta kurdan de pêkenê

Ma prosesêkê tarîxî de yê. Dewaya azadîye safhaya girînge de ya. Kurdî Rojhelatê Mîyanênî de bîyî wayîrê îradeyî. Hînî ê raştîyê xo zêdêr zanenê. La belê sere de dewleta tirke dişmenî ney ra ecîz ê. Tirkîya û Sûrîye 10 serrî yo gonîya yewbînan wenê. La pêvînayîşan zî kenê. Îran û Iraq zî pêvînayîşan kenê. Çira? Babete kurd ê. Mabênê nê dewletan de zaf meseleyî estê la ê têna babeta kurdan de pêkenê.

Mîyanê sîstemê dewlete yê Tirkîya de baskê cîyayî estê pênêkenê. Nîjadperestî, neteperwerî, îslamîstî, NATOperestî ûsn estê. La nê baskî zî babeta kurdan de pêkenê. Eke şerê vera kurdan biqedo no rejîm rijîyeno. Çunku Erdogan, Bahçelî, Dogu Perinçek û Hulusî Akar vera kurdan bîyî yew. Babeta kurdan de nê la babetanê bînan de înan zaf pêkerd. Rewşa dewletan ê bînan zî wina ya.

Ganî ma vera plananê dişmenî bibê yew

Eke dişmenî vera ma benê yew ganî kurdî zî bibê yew.  Nê prosesê girîngî de eke ma sey kurdan meseleyanê xo safî bikerê, tewirêkê neteweyî bimojnê, tarîx ma mehkum nêkeno. Şarê ma sîyasetê kurdan ra yewîye wazeno. Ganî ma vera plananê dişmenî bibê yew. 

Qetilkarê kurdan Agar peyê provokasyonî de yo

Şero psîkolojîk dewleta tirke de aver o. Andullah Agar kadroyanê nê şerî ra bi. No kes 6-7 televîzyonan de gêreno û qisey keno. Ey wextêk kurdî kiştêne, kiştox o. Nika zî propaganda keno vano 'Pêşmergeyî PKKyî ra ecîz ê coka kinê leşkeran danê xo rê  û artêşa tirke de ca gênê.' Çîyêko winasên çin o. Ma na babete de eşkerayîyêke dabi. Armancê nê merdimî çita yo? Ê wazenê provakasyonan bikerê.  Dişmen wazeno kurdî xo mîyan de şer bikerê. Wa kes denêkewo na dafike. Nê prosesî de mojnayîşê tewirê neteweyî zaf girîng  û heyatî yo. Tîya de mesuldarî kewena milê her kesî.

Ma tim yewîya kurdan wazenê

Ma tim seba yewîye veng danê. Tay kesî vanê PKK hewceyê yewî yo. Ney, ma pêro hewceyê yewî yê. Mîyanê her şert û mercanî de ma eşkenê şer bikerê, xo bipawê û dewaya xo rê dewam bikerê. La ma hewceyê sîyasetê hemparî yê. Na babete de mesuldarî milê her kesî de ya. Yekgirtûy, Goran, Komela, pêro partîyê Rojawan û Başûrî; nê pêro mesuldar ê. Labelê tîya de mesuldarîya ma û ya PDKyî ya ke têkilîya xo xurt bikerê.''