Endamê Komîteya Rayberdişî ya PKKyî Murat Karayilanî hêrişê îşxalî yê dewleta tirke, Peymana Lozanî, bîlançoya şerê 8 serran û tecrîdê vera Rayberê Şarê Kurdî Abdullah Ocalanî ANFyî rê ercnayî.

Qiseykerdişê Karayilanî ra tay noqtayî wina yê:

''Tecrîdê Îmraliyî her ke şino beno giranêr. Dewleta tirke seba ke şarê ma û têgêrayîşê azadîye teslîm bigêra Rayberê ma tecrîd kena. Hetê bînî ra têkoşînê vera tecrîdî yo nikayên qîm nîyo. Hînî teyna wedaritişê tecrîdî ney azadkerdişê Rayber Apoyî zî zaf girîng o. Bara têkoşînê vera tecrîdî teyna wa  milê Rayber Apoyî de nêba. Ganî ma sey têgêrayîş, partî, gerîlayan, şarê ma û kadroyan têkoşînê vera tecrîdî pîlêr bikerê. Ganî ma metod û taktîkanê têkoşînî aver berê û bi nê hawayî bibê layîqê tewirê Rayber Apoyî.

Konferansê Peymana Lozanî konferansêko girîng bîyo. Peymana Lozanî bi înîsîyatîfê dewletanê Ewropa virazîyabî. Peymana Lozanî Kurdîstan parçe kerd û qirkerdişê kurdan da destpêkerdene. Konferansê Lozanî mojna ke kurdî na peymane qetî qebul nêkenê û rixmê qirkerdişan zî payan ser de yê. No konferans eşkeno bibo bingeyê yewîya neteweyîye. Naye ra pey zî ganî konferansêko neteweyî bêro kerdene. 

Dewleta tirke 24ê temmuza 2015î ra nata bi hawayêkê giranî hêriş kena. Dima ke Şorişê Rojawanî qewimîya, herêmê Cizîre û Kobanê yew bîyê û HDPyî se ra 13ê rayî girewtî dewleta tirke tersaye û Planê Çokdayîşî vist dewre. Heta 2018î dewleta tirke hêrişê Vakurî kerdêne la 2018 ra dima vera Rojawanî hêrişê îşxalî dayî destpêkerdene. 2020 ra nata zî hêrişê vera Başûrî (Herêmanê Pawitişî yê Medya) bîyê giranêr. Nika Vakur, Rojawan û Başûrê Kurdîstanî de hêrişî dewam kenê.  

Dewleta tirke armanc kerdêne ke pê destekê NATOyî û PDKyî nê hêrişan reyde gerîlayan tasfîye bikera, Rojawanî bi temamî îşxal bikera, destkewteyanê kurdan çin bikera û serrgêra Peymana Lozanî û Komara Tirkîya 2023 de meseleya kurdan pê qirkerdişî safî bikera. La dewleta tirke nêeşkaye armancê xo bîyara ca û 3 serrî yo nêeşkaye Zapî ra vejîya. Vera nê konseptê şerî şarê ma, têgêrayîşê ma, sîyasetê kurdan, Rayber Apoyî û gerîlayan xo ver da. Nê 8 serran de ma zî şerê xo aver berd, taktîkê xo newe kerdî û dest eşt teknîkî. Tewirê Rayber Apoyî û şerê gerîlayan planê dewlete pûç kerdî. 

Nê şerê 8 serran de 4 hezar û 906 embazê ma yê gerîlayî şehîd bîyî. Hêzanê Xopawitişî yê Vakurî (YPS) 616 şehîdî dayî. Bi temamî şehîdê HPG û YPSyî 5 hezar û 522 embaz ê. Rojawan de QSDyî şerê vera dewleta tirke de hezar û 496 şehîdî dayî. Rojawan de hêrişanê dewleta tirke de hezar û 57 sivîlî şehîd bîyî. Yanî hîrê parçeyan de ma 7 hezar û 18 embazî şehîd dayî. Ez vana qey Vakur de nê 8 serran de hezarêk û Başûr de zî 200 sivîlî şehîd bîyê.

Dewleta tirke vana ke ma şerê 8 serran de 38 hezar şehîdî dayê. Na hûmare zûrêka pîl a. Hetê bînî ra şerê 8 serran de, 2015 ra nata Vakurê Kurdîstanî û Herêmanê Pawitişî yê Medya de bi temamî 18 hezar û 606 leşker, payeberz, cergî ûsn kişîyayî. Rojawan de zî hûmara kişteyanê dewlete 4 hezar û 910 a. Yanî dewleta tirke 8 serran de 23 hezar û 570 kişteyî dayê. Dewlete vana ke teyna 2 hezar kişteyê ci est ê. Na zî zûr a. 

Artêşa tirke par neçare mende ke tay cayan ra xo bianca. Nika artêşa tirke reyna hêrişê nê cayan kena ke tede xo cabikera. Hêrişê vera Girê Cûdî, herêma Şehîd Zagrosî û herêma Şehîd Delîlî çarçewa nê planî de yenê kerdene. Heta nika ma Herêma Şehîd Delîlî de şehîdêk nêda. Dewleta tirke kena ke Şehîd Delîl de xo cabikera la do nêeşka. Xoverdayîşê gerîlayan dewam keno. Embazanê ma tîya de çalakîyê serkewteyî kerdî. 

Dewleta tirke kena ke pê fuhuş, tîryakî û pereyî ciwananê ma bikera ajananê xo. Ganî şarê ma mîyanê komelî de exlaqê xo yê komelkî û welatperwerî xorin bikero. Mîsal ganî ma nika bi taybetî wayîrê embazanê tepişteyan vejîyê, gerîlayan vejîyê. Şarê ma ganî bingeyê fedakarîye de têbigêro. Ganî şarê ma ne dewa xo de ne zî şaristanan de ajanan qebul nêkero. Dişmen bi taybetî keyeyanê şehîdan keno hedef û nînan ser o dafikan nano ro. Wa şarê ma hayîdar û hişyar bibo. Eke ma vera polîtîkayanê ajankerdişî, tîryakî û bêexlaqkerdişî têkoşînê komelkî bikerê ma eşkenê plananê dişmenî pûç bikerê.

Nê şerê 8 serran de têkoşîno tewr xurt û çetin Vakurê Kurdîstanî de ame kerdene. Dişmenî 2016 de vatbi ke ê do gerîlayan biqedînê. Dişmen hema zî wina vano. Dişmen vano qey o do pê teknîkî, droneyanê çekdaran û îstîxbaratî bieşko gerîlayan biqedîno. Vera hêrişanê dişmenî şehîdanê ma xoverdayîşêko pîl kerd. Ez înan bi rêzî yad kena. Tewr peyên dişmenî îdîa kerd ke Dêrsim de di embazê ma şehîd bîyê. Ma na îdîa cigêrenê. Botan de tewr peyên embazê ma Mîrza û Bengîne şehîd bîyî. Nê embazê ma gerîlayê serkêşî bîyî.

Xûlasa gerîlayê Vakurî bi fedakarî û bi ruhê fedayî xo ver danê, têkoşîn kenê. Ma do bi nê têkoşînî qetî do ser bikewê. Gerîlayê azadîye yê Kurdîstanî qetî do ser bikewê. Ez pêro embazanê ma selam kena û nînan rê zerrî ra serkewtiş wazena.''