Endamê Komîteya Rayberdişî ya PKKyî Murat Karayilanî kanalê xeberanê kurdkî KNK TVyo ke merkezê ci Sîlêmanî yo, cewab da persanê ci. Qiseykerdişê Karayilanî ra qismêk wina yo:

''Meseleya bingeyî aya ke badê şarê vera DAÎŞî kurdî Rojelatê Mîyanênî de vejîyayî vernî û dewleta tirke nê ra tersaye. Dewletbîyayîşê kurdan û parçekerdişê Tirkîya ra tesayî. Seba ke verê nê bîgêrê konseptê Osmanîyî yo newe vist dewre. Planê îşxalî kerdî.  Seba ke kurdî Rojawan de wayîrê statuyî mebê çîyo ke destê înan ra ame kerd. Bi bahaneye PKKyî hêriş kerd ke nê cayan de PKK çînêbi. Eslê xo de 2016 de vera kurdan şero gird da destpêkerdene. A roje ra nata ma vera dewleta tirke xover danê.

Ma no plan rêxistinanê Başûrê Kurdîstanî reyde pare kerd, ma vat wina tehdîtî est ê.  La ê bêveng mendê, pîya bi ma tênêgêrayî. Heta tayînan bi dewleta tirke hemkarîye kerde. Dewleta tirke sere de cayê ke ma tede yê wazena heme Başûrê îşxal bikero. Têna îşxal nê wazena îlhak bikero. Ça gena xo ya giredana û tede bena mendîye.

Vera nê hêrişê dewleta tirke ma zî metodê neweyî aver berdî. Nê koyan de xeylêk wexto tecrubeyê ma est o. Inkey şerêko zaf giran qewimîyeno. Dewleta tirke çekanê kîmyewîyan şuxulnena. No îdîa nê, raşt o. Senî ke wextê Terteleyê Dêrsimî de magarayan de çekê kîmyewîyî şuxulnayî inkey zî tunalan de vera gerîlayan çekanê kîmyewîyan şuxulnena. Seba ke ê nêeftanê bikewê tunalen wazenê pê çekanê kîmyewîyan netîce bîgêrê. Xora ma bi serran o raştê çekanê kîmyewîyan yenê. Coka ma tedbîrê xo girewtî. Astengkerdişî est ê, heme malzemeyî nêresenê destê ma la çîyo ke destê ma de yo ma pê nê xo pawenê.

Ma xeylêk rey semedê cigêrayîşê çekanê kîyewîyan veng da. Embazan dîmenî pare kerdî. Rêxistina Qedexekerdişê Çekanê Kîmyewîyan  (OPCW)  vana ganî dewlete muracat bikero û qet yew dewelte zî muracat nêkerd. Eke Hukmate Herême yê Kurdîstanî muracat bikero, yeno qebulkerdene la o zî muracat nêkeno. Xora înan cigêrayîşê heyetanê xosaran zî asteng kerdî. Destur nêdanê maskeyî zî biresê ma.

Inkey bi nameyê hukmatî Iraqî tay hêzî sînor de yê ke rolo ke ey kay kenê dinya de çîyo winayên çîn o. Dewleta tirke ameya herra înan îşxal kena ê zî dewleta tirke pawenê. Sînor nêpawenê. Êyê ke welatê înan îşxal kenê înan pawenê. Tay cayan de hende 30 km kewtê herra Kurdîstanî. Hukmatê Iraqî tam nêzano herême de sebeno. Hukmatê Herême yê Kurdîstanî zano la o zî wazenê serê ci bîgêro. Dewleta tirke wazena ke bikewo herra Başûrê Kurdîstanî. Semedê nê zî masrafêko xur kerd. Xora ma ra nêbîyenî par  tîya xo cakerdene û Hewlêr de çuyeyê xo têşanayêne. La ma di serrî yo şer kenê. Avaşîn de tay cayî girewtî la gerîlayî derûdorê înan de yê. Nêeşkenê rehet têbigêrê. Zap de zî rewşe wina ya. Eke ma tîya wina şer mekerê, dewleta tirke do dahîna aver şiro.

Eke dewleta tirke Iraqî raşta berê sînorî biqefilno ma vera nê nîyê. Ma wazenê ke wa sînor bêro pawitene. Îdîayê PKK sînorê Iraqî ra ravêrt û hêrişê Tirkîya kerd raşt nîyê. PKK Dêrsim, Botan, Serhat de şer keno. Tirkîya berê sînorî ra ravêrena û hêriş kena PKK nê. Senî ke tay vanê PKKyî şer nêard Başûr, Tirkîya wazena Başûrî îşxal bikero. PKK vera nê şer keno, Başûrî paweno.  Şerê PKKyî şerê pawitişê herra Kurdîstanî yo. Coka eke sînor yeno qefilnayene wa biqefilîyo, ma vera nê nîyê. Îdîayê dewleta tirke zûr ê, seba ke konseptê îşxalî bîyaro ca PKKyî kenê bahane. Dewleta tirke Heftanînî ra heta Xakurkê, Zap, Metîna û Avaşînî yew sereyî ra heta sereyî bînî 128 baregehî viraştî. Nê baregehan de 30 hezar leşerî est ê. Seba ke dewleta tirke tîya ra vejîyo,têkoşîno xurt ê leşkerî û sîyasîyî hewce keno.

Meseleya kurdan meseleyêka komelkî û sîaysîyî ya. Yanî pê hêzê leşkerî nîna çareserkerdene. Dewleta tirke kena ke pê şîdetî çareser bikero. No mumkun nîyo. Eke Iran zî eynî metodî bişuxulnê, hêriş bikero no xelet o. Ma çirey pê şîdetî çareserî nêwazenê. Ganî Komara Îslamî ya Îranî zî wina têbigêro. Şarê Rojhelatî û Îranî bi aşman o kuçeyan de azadîye wazeno. Problem ho zereyê Îranî de yo Başûr de nîyo.

 Embaz Cemîl Bayikî mektûbê xo yo ke partîyanê sîyasîyan ê Dukanî rê şawit de semedê yewîya neteweyîye veng da. Nê prosesî de her wextî ra zafêr ma hewceyê yewîya neteweyîye yê. Ma se KCKyî semedê pawitişê statuyê Başûrî destkewteyanê şarê Kurdîstanî berpirsîyarîya xo anê ca. Senî ke wextê hêrişê DAÎŞî de ma şîyî Kerkuk, Mexmûr, Duhak û Şingal ma ewro zî vera îşxalê dewleta tirke Başûrî pawenê.

Ganî heme partîyê sîyasîyî yê Başûrî bibê aktîf û semedê pawitişê erdê xo têbigêrê. Hukmatê Heremê yê Başûrî pîya bi dewleta tirke sîyasetêk rayra beno. No raşt nîyo û xizmetê şarê kurdî nêkeno. Erdoganî bi xo vat înan xeletîya ke Başûr de kerda do Rojawan de mekerê. Belka inkey vera PKKyî taktîk aver beno la siba do Başêrû Kurdîstanî hedef bîgêro. Coka ganî her kes berpirsîyarîya xo bîyaro ca û vara talanê dewleta tirke bêveng memano.

Dewleta tirke emser nîsane ra hêrişê Zapî kerd ke pê hîkayeya serkewtişî şiro vîjnayîşê rewî. La ser nêkewte, coka verê xo da Rojawanî. Qetî ê do hêrişê Rojawanî bikerê. Goreyê konjonkturê sîyasîyî, bazarîye, hesabî yenê kerdene la wazenê pê şerê vera kurdan şirê vîjnayîşî. Erdogan hole zano bê şerî nêeşkeno ser bikewo. Hesabê Başûrê Kurdîstanî nêtepişt, narey Rojawanî ser o hesab keno. No hukmat wazeno serê îmhayê kurdan de payra bimano. Îqtîdar wazeno HDPyî zî tasfîye bikero  û kurdan bêîrade biverdo. La ê zî zaf hol zanê ke heta ewro çend partîyê kurdan ameyî qefilnayene la kurdî tim wayîrê îradeyê xo vejîyenê.

 Rayber Apo semedê kurdan têkoşîn keno û binê zextanê giranan deyo. Coka ma qergilîyenê. Ma veng danê heme şarê xo ke wa Rayber Apoyî têna meverde. Ganî her kes vejîyo kuçeyan semedê pêvînîyaşî merdiman û avûtanê ey vengê xo berz bikero.  Ewropa û tay waranê Kurdîstanî de çalakîyê benê la ma şarê xo yê Başûrê Kurdîstanî ra wazenê ke wa vengê berz bikero.

Dewleta tirke her hetî ra hêrişê ma kena. Coka adirbirnayîş rojdemê ma de nîyo. Ma çareserîya sîyasîye wazenê. Ma têkoşînê sîyasîyî rayra benê.  Dewleta tirke wazena pê şîdetî mesela çareser bikero. Înan adirbirnayîş xeripna, projeyê çareserî û dîyaolî vindarna û hêrişê ma kerd.  Eke nê hêrişî vinderê, proje vejîyo werte beno ke adirbirnayîş reyna bêro rojdem la inkey çîyo winayên çîn o.''