Hêrişê dewleta tirke ya îşxalkere yê vera Zap, Metîna û Avaşînî dewam kenê. Fermandarê Qerargehê Merkezê Pawitişê Şarî (MPŞ) Murat Karayilanî bi cîhazî xîtabê gerîlayan kerd û çalakîyê serkewteyî yê gerîlayan fîraz kerdî.

Qiseykerdişê Karayilanî wina yo:

''Ez pêro embazan bi heskerdişî selam kena. Embaza ma Aysele Dogan şehadetê xo ra verî vatbi 'Ez bena qurbanê xoverdayoxanê Zapî, zerrîya mi înan der a. Ez înan rê serkewtiş wazena.' Nê mesajî rê zî aseno ke ewro çimê pêro şar û dostanê ma Zap de yo. 

Embazê ma yê ercîyayeyî; 17ê nîsane ra nata dişmen hêrişê Zapî keno. Dişmen 39 rojî yo seba ke Zapî îşxal bikero hêrişê Zapî keno. La xoverdayîşê embazanê ma rayîr nêda îşxalî û dişmen ser nêkewt. Dişmenî waşt ke îşxalê Herêmanê Pawitişî yê Medya ra dima Rojawan û Şingalî zî îşxal bikero. La dişmen Zap û Avaşîn de gina piro, tede mend, Çîyareş û Kurojahro de embazan ra derbê giranî werdî. Dişmen zî neçare mend ke planê xo bivurno. Coka dişmen seba ke Zapî ra vejîyo hêrişê rojawanê Zapî keno; Girê Cûdîyî, FM û Hekarî zî daxîlê planê xo yê îşxalî kerdî. Bi nê hawayî dişmen wazeno hêrişanê xo hîra bikero û Herêmanê Pawitişî yê Medya de hîna zaf teng nêbo.

Hetê bînî ra dewleta tirke wazena şerê Ukrayna-Rûsya bivurna firsendî û Rojawanî newe ra îşxal bikera. Dewlete dî ke  Herêmanê Pawitişî yê Medya de ser nêkewena coka nika ra verê xo da Rojawanî. La dewlete Rojawan de zî do cewabê îşxalî bigêra. Ma eşnawenê ke hêzê Rojawanî hê amadekarîyê vera îşxalî kenê. 

25ê gulane ra nata îşxalkeran Girê Hekarî, Girê FMyî û Girê Cûdîyî de derbê giranî werdî. Înan waştêne tengîye ra bixelisîyê la hîna zaf teng bîyî. Ma Hemleyê Şorişgêrî yê Cengê Xabûrî û Şehîd Savaş Maraşî dayî destpêkerdene. Nê hemleyî mexlûbîyetê dişmenî do giranêr bikerê. Embazanê ma Girê Hekarî, Girê FMyî û Girê Cûdîyî de çalakîyê serkewteyî kerdî. Ma nînan fîraz kenê. Xoverdayîş û têkoşînê embazan resayê astêka pîle. Xora kêmasîyê zî est ê la ruhê înan ê xoverdayîşî bingeyê serfîrazîye awan keno.

Girê Hekarî de serkêşîya embazan Sîyabende, Hêzile, Laşer û Sarene de xoverdayîşêko pîl ame mojnayene. Xêrê nê şehîdanê çêran de uca de xoverdayîşêko pîl virazîya. Ez înan bi rêzdarî yad kena. Girê Cûdîyî de 27ê gulane de serkêşîya embaze Nalîne Firar de xoverdayîşêko pîl qewimîya. Ez pêro embazanê nê xoverdayîşî fîraz kena. 

Dişmen xîretê 45 rojan ra dima ancax resa Girê Karkerî. La embazanê ma tîya de zî da dişmenî ro. Ma xoverdayîşê Girê Karkerî fîraz kenê. Şikefta Birîndaran de destpêkî ra nata şerêko giran est o. Embazanê ma tîya de tewr peyên helîkopterêk ard war. Girê Şehîd Şahînî de bi taybetî tunelanê Şehîd Berxwedanî de 27ê gulane de embazî şîyî cenazayanê dişmenî ser, derbê giranî dayî dişmenî ro. Ez nê pêro embazan zî fîraz kena.

Embazanê ma vat ke dişmenî verî waştêne kutikan bişawê tunelan, nika wazeno leşkeran bişawo la leşkerî nêwazenê. Dima 4 leşkerî ameyî nînan ra 2 tenî fekê tunelî de xo erzenê war û mirenî. Wa embazê ma venga nê leşkeran bidê ke wa teslîm bibê. Her leşkero ke yeno tunelî wa teslîm bibo. 

Nika qederê nê hukmatî pabesteyê şerê Herêmanê Pawitişî yê Medya yo. Ganî ma nê şerî warê îdeolojîk, psîkolojîk, kulturelî de bikerê. Wa embazê ma pêro çalakîyanê xo qeyd bikerê. Çunke dişmen raştîyan nimneno. Ganî ma nê raştîyan biresnê şarî. 

Embazê ma yê ercîyayeyî; aseno ke dişmen do giranîye bido gazanê kîmyewîyan û nê gazan bierzo zereyê tunelan. Embazê ma yê tunelan ganî vera ney tedbîranê xo hol bigêrê. Ma nêwazenê nê şerî derg bibo. Embazê ma wa malzemeyanê xo yê şerî bi îradeyî bişuxilnê. Wa embazê ma bi plan û dîsîplînî têbigêrê û xo hol bipawê. Ma armanc kenê ke pê vînîbîyayîşanê qijan nê şerî biqedînê. Ganî no şer pê pawitişê aktîfî bêro kerdene. Na babete de gerîlayê YJA-Starî yê Girê Karker û FMyî vejîyayî vernî. Ez tîya ra pêro gerîlayanê YJA-Starî selam kena.

Ganî ma di çîyan rê zaf dîqat bikerê. Yew; taktîkanê neweya biafernê yanî bi sebr, çêrî û planî têbigêrê. Di; şerê pawitişê aktîfî aver berê. Tîmê hereketînî wa wina têbigêrê ke tewr nêasê. Nişka ra vejîyê teber û bidê dişmenî ro. Sey birûskî têbigêrê.

Ganî têna Girê Hekarî nê pêro herêma Metîna şer bikera. Ganî fermandarê Metîna paştî bidê Girê Hekarî. Zap û Avaşîn de zî wa embaz û fermandarê ma şerî seyr mekerê. Her kes wa mesuldarîya xo bîyaro ca. Embazê ma wa tedbîranê xo bizêdînê. Şehîd Tolhildan de xoverdayîşêko tarîxî qewimîya. Ma fam kerd ke çira şehîd û zeafê ma est ê. Eke ma netod û rayîranê raştan bîyarê ca ma do bêvînîbîyayîş dewam bikerê. Ez pê bawer a ke embazî kêmasîyan ra dersê xo vejenê.

No şerêko tarîxî yo. Ganî ma nê şerî de cewab bidê hesreta şehîdan, hêvîyanê Rayber Apoyî, dadîyanê Kurdîstanî, şarê Kurdîstanî. No erkê ma yo. Xo mekerê hedefî. Ma wazenê nê şerî de ser bikewê coka ganî taktîkan de ma aver şêrê. Wa her kes taktîkanê Zap, Avaşîn û Metîna ra îstîfade bikero. Dişmenê xo ne qij ne zî pîl bivînê. Wa her kes rolê xo bîyaro ca. 

Ganî her kes nê prosesê tarîxîyî de berpirsîyara û fedakarîya ke hewce kena bimojnê û şarê ma bi serkewtişêkê newîyî şa bikero.''. Embazê ma mesuldarîyanê xo hol zanenê. Ê do erkanê xo bikerê û ser bikewê.

Nê esasî ser o ma vanê 'Bijî Bijî Berxwedana Zapê û Avaşînê', 'Bijî Bijî Berxwedana Metîna, Girê FM, Girê Cûdî', 'Bijî Bijî Berxwedana Gerîla', 'Bijî Bijî Berxwedana gelê me', 'Bijî Bijî Serok Apo' ''