Konseya Hemserekîya Pêroyîye ya KCKyî bi wesîleya rojbîyayîşê Rayberê Şarê Kurdî Abdullah Ocalanî mesajêk weşana.

Mesajê KCKyî wina yo:

''Ma rojbîyayîşê Rayber Apoyî 4ê nîsane sere de şarê kurdî, cinîyan û dostanê kurdan rê pêro şaranê dostan û dinyaya demokrasî rê fîraz kenê. Ma şehîdê 4ê Nîsane Mahsum Karaoglan û Mustafa Dagî bi rêzdarî û minetî yad kenê.

4ê Nîsane bîyayîşê Rayberîye seba şarê kurdî û cinîyan wayîrê manayanê xorinan o. Na roje seba şarê kurdî mîjdanê newe ra bîyayîşî yo; mîjdanê newe ra resayîşê estbîyayîşê kurdan o, mîjdanê cuya azade yo. Naye ra şarê kurdî û dostê înan her serre 4ê Nîsane bi coş û moralêkê pîlî fîraz kenê. Kurdî na roje sey newe ra bîyayîşê xo ercnenê û bi nê hawayî fîraz kenê.

Bi rêxistinî û asta girseyî de fîrazkerdişê 4ê Nîsane raştîyêk a ke Komployê Mîyanneteweyî ra dima vejîyaya werte. Verî îradeyê cinîyan ê kurdan bire daye ke na roje sey şayîye û çalakîyêka ekolojîke fîraz bikerê. Dima serkêşîya cinîyan de pêro şarê ma wayîrê 4ê Nîsane rojbîyayîşê Rayberîye vejîya û şayîyê 4ê Nîsane her serre vurîyayî bîyî tradîsyonî. Coka fîrazkerdişê 4ê Nîsane rojbîyayîşê Rayberîye hetêkî ra zî çalakîyêka cinîyan a, têhetameyîşê cinîyan û Rayberîye yo, îfadeyê heskerdiş, hesrete û perwerîya cinîyan a  bi Rayber Apoyî yo. Coka 4ê Nîsane serkêşîya cinîyan ê kurdan de roja verarşîyayîş û têhetameyîşê bi Rayber Apoyî ya.

Şarê kurdî heta ameyîşê Rayberîye mehkumê qederê qirkerdişî bibi, qirkerdişê kulturel û fîzîkî dîbî, raştê sîyasetê îmha û înkarî bibi û destûr dîyabi ke şarê kurdî têna mîyanê sînoranê bîyolojîkan de biciwîyo. Yanî welat û kulturî reyde nameyê kurdan zî tarîxî ra amebi pakîkerdene. 4ê Nîsane rojbîyayîşê Rayberîye destpêkê hîkayeya ê estbîyayîşê nê kurdan a. 4ê Nîsane rojbîyayîşê Rayberîye seba kurdan îmkanê Newrozbîyayîşî bi. 4ê Nîsane rojbîyayîşê Rayberîye a roje bîye ke şarê kurdî tîja xo ya vînîbîyaye newe ra dîye. Coka 4ê Nîsane rojbîyayîşê Rayberîye qedîyayîşê qederê qirkerdişî yê kurdan bi.

4ê Nîsane rojbîyayîşê Rayberîye bi destpêkê wextê neweyî yê kurdan û kerd ke şarê kurdî newe ra kokanê xo bivîno. Şarê kurdî newe ra mîyanê şaranê dinya de cayê xo yê rûmetînî gêno. Şarê ma rixmê qirkerdiş û dejan zî bi bedelan têkoşînê xo her roje pîl keno. Çunke şarê kurdî zanenoo ke xeta Rayber Apoyî tek rayîrê felatî yo. Coka şarê kurdî qerardar o ke dejanê xo bivurno çimeyê destkewteyan û rindîyanê neweyan.

Ganîbîyayîşê pîlî yê kurdan rojbîyayîşê Rayberîye de dest pêkerd û no ganîbîyayîş ganîbîuauîşê pêro şaranê Rojhelatê Mîyanênî yo. Rayber Apoyî kultur û ruho komunel ê şarê ma vet werte. Xêrê Rayber Apoyî ra şarî mîyanê ruhê wayûbiratîye de ciwîyenê û cografyaya Rojhelatê Mîyanênî de newe ra ganî benê. No ruh û hişmendîya ke Neteweya Demokratîke înşa kena zimistananê serdan ê netewe-dewlete rijnenê û kenê ke Newroza raştikêne û wisaro raştikên ê Rojhelatê Mîyanênî dest pêbikerê.

Şarê ma kerd ke Newroza 2022yî biba Newroza Rayberîye. Şarê ma meydanan de azadîya Rayber Apoyî bi qerardarî û vengêkê berzî waşt. Şarê ma bi zelalî mesaj da ke hedefê tewr pîl caardişê azadîya Rayberîye yo û no hînî nêno taloqkerdene. Mudaxeleyê rejîmê faşîstî zî nêeşka ke qîrayîşê 'Bê Serek Cuye Nêbena-Biciwîyo Serek Apo'yî yê mîlyonan asteng bikero.

Şarê kurdî dostanê xo reyde Newroza 2022yî de mesajê pîlî dayî. La mesajo tewr pîl no bi ke tecrîd wa cade bêro wedaritene û azadîya Rayber Apoyî bêra caardene. Şarê ma hînî wazeno ke mîyanê xo de Rayber Apoyî bivîno, meydananê Newroze de ey bivîno, ey reyde Newroze fîraz bikero û seba ke ney pratîze bikero qerardarî û îdîaya xo eşkera keno. Ganî hem hukmato faşîst ê AKP-MHPyî hem zî muxalefeto resmî yê Tirkîya nê waştişî hol bivînê û raşt fam bikerê. Ne dewleta tirke ya kolonyalîste, ne hukmato faşîst ne zî muxalefeto resmî hînî nêeşkenê na raştîye mîyan bikerê, na raştîye ra biremê. Çunke heta ke berê Îmraliyî amebê, tecrîd nêqedo û Rayber Apo azad mebo qet yew meseleya Tirkîya çareser nêbena.

Ma tewiro ke rixmê pêro astengîyan zî şarê ma Newroze de mojna selam kenê. Ma zerrî ra nê tewirê Newroze fîraz kenê. Şarê ma dostanê xo reyde na Newroze de derbêka pîle daye rejîmê faşîstî yê AKP-MHPyî ro û seke rejîmo faşîst şaş kerd.

Şarê kurdî do tewirê meydananê Newroze 4ê Nîsane rojbîyayîşê Rayberîye de û dimayê ci, temamîya serra 50. ya Rayberîye de do biresno hêzêkê pîlî yê rêxistinîye û asta çalakîyan. Ma zî sey têgêrayîşî caardişê azadîya Rayberîye û çinkerdişê tecrîdî bikerê esasê wezîfeyanê xo û bi perspektîfê Newroza 50. ya Rayberîye xebatanê xo bikerê. Nê esasî ser o ma venga cinî, ciwanan, şarê xo û dostanê xo danê ke seba ke tecrîd  bêro wedaritene û azadîya Rayber Apoyî bêra caardene têkoşîn berz bikerê, rêxistinîye pîl bikerê û çalakîyanê hîna bitesîran bikerê; her ca de daran ronê.''