Hemsereka Konseya Rayberdişî ya KCKyî bi wesîleya serrgêra Qirkerdişê Parisî eşkerayîyêke daye.

Eşkerayîye wina ya:

''Ma embazan Sara, Rojbîne û Ronahî bi rêzdarî yad kenê ke 9ê çeleyê 2013î de ameyî qetilkerdene. Ma sozê xo yê caardişê Kurdîstanê azadî û Rojhelatê Mîyanênî yê Demokratîkî dibare kenê. Ma embazan Sêvê Demîr, Pakîze Nayir û Fatma Ûyar zî bi rêzdarî û minetî yad kenê ke menga çeleyî de hetê dewleta tirke ra wextê xoverdayîşê xoîdarekerdişî de ameyî qetilkerdene. Pê nê şehadetan menga çeleyî bîye 'Menga Şehîdan ê Cinîyan.' Kurdîstano Azad û Xosero ke hesreta înan bîye qetî do bêro awankerdene.

Qirkerdişê Parisî hetê MÎT û Erdoganî ra ame plankerdene û rêxistinkerdene. Oyo ke fermanê nê qirkerdişî dayo Erdogan bi xo yo. 3 cinîyan ê şorişgêran zî Paris de bi hawayêkê legalî karê sîyasî kerdêne. 

Fîdane Dogan (Rojbîne)a ke buroyê Enfermasyonê Kurdan de xebitîyayêne tede kişîyayeç Embaze Rojbîne bi rayîrê buroyî xeylêk caran wezîr, sîyasetmedar û rêxistinan ê komelkîyan reyde pêvînayîşî kerdî. Fransa asayîşê nê cinîyan ra mesuldar bibi. Coka ganî Fransa dewleta tirke hukm bikera. Heta ke no nêbo û raştîyî eşkera nêbê kurdî do Fransa ra hesab bipersê.

Embaze Sakîne Cansiz (Sara) ronayoxêka PKKyî bîye. Seba ke PKK bibo partîya cinîyan aye zaf kede daye. Coka Rayber Apoyî vat 'Guleyê ke şîyî Sakîne mi rê erzîyayî.' Şexsê Sara de nê guleyî erzîyayî pêro cinîyanê dinya. Çunke embaze Sara têna raybera têgêrayîşê azadîye yê cinîyan nê rayberê cinîyanê dinya bîye. Coka mesuldarîya Fransa ya ke hesabê nê qirkerdişî pers bikera. Nêbo sere de cinîyê Parisî pêro cinîyê dinya hukmatê Fransa ra do hesab bipersê.

Mergê endamê MÎTî yo ke no qirkerdiş kerdo şikdar o. Merdim nêeşkeno vajo ke no kes bi hawayêkê normalî merdo. Fransa û Tirkîya pîya pê nê mergî şay bîyî. Seba ke Fransa xîret kena nê qirkerdişî mîyan bikera bena hemkarê ci. Heta ke no qirkerdiş nêro roşnîkerdene, dewleta tirke nêra hukmkerdene Fransa tim do bêra sûcdarkerdene.

Eke Kurdîstan, Tirkîya, Ewropa û pêro dinya de têkoşînê azadîye yê cinîyan xurtêr bibo o çax hesabê Qirkerdişê Parisî zî do bêro perskerdene. Ganî 9ê çeleyî bibo roja berzkerdişê têkoşînê azadîye yê cinîyan. Ganî 9ê çeleyî de Paris de serewedaritişê bi ruhê azadîye yê cinîyan bêro kerdene.

Ruho azad ê Sara hînî bîyo ruhê serewedaritişê cinîyanê dinya. Senî ke komelbîyayîşê destpêkî de cinîyan rayberîye kerdbi nika zî cinîyî pê waştiş û ruhê azadîye yê Sarayan merdimîye biresnê şaristanîya komelperwere ya demokratîke.

Cinîyan 2020 de bi vayê azadîye yê Sarayan dinya lerznaye. Serra 2021î de zî bi îdeolojîya azadîya cinîyan a Rayber Apoyî, têkoşînê azadîye yê cinîyan o ke kurdan dinya de rayber û mîsal o do bireso astêka newîye. Cinîyê dinya do têkoşînê xo yê vera serdestîya camêrdan, faşîzm, sîstemê kolonyalîstî serra 2021î de rayberîya cinîyan ê kurdan de xurtêr bikerê. Cinîyî do pê ruhê azadîye û pê waştişê xo merdimîye biresnê cuyêka azade û demokratîke. Serra 2021î  xceta azadîya cinîyan de biba serra azadî û demokrasî ya pêro merdimîye.''