Konseya Serekîya Pêroyî ya KCKyî bi wesîleya serrgêra 21. ya  komployê mîyanneteweyî ya 15ê Sibate ya vera Rayberê Şarê Kurdî Abdullah Ocalanî eşkerayîyêka nuştekîye weşanaye.

Eşkerayîya KCKyî wina ya:

''Komployo Mîyanneteweyî yê 15ê Sibate yo ke şexsê Rayber Apoyî de vera şarê kurdî û têkoşînê azadîye keweno serra 22. Ma reyna bi nefret û nalet komplo şermezar kenê. Ma Rayber Apoyo ke vera komployî xo ver dano rê selam danê. Ma şexsê şehîdanê 'Şima nêeşkenê roja ma tarî bikerê' de pêro şehîdan yad kenê. Ma sozê çinkerdişê komployî danê. 

Hukmatê AKPyî yo faşîst seba menfaatanê xo her wext komplo ganî keno û wazeno newe ra bikero. Dezgehê sey DMME, Konseya Ewropa û CPT vera nê kerdişanê îqtîdarê faşîstî, qirkerdişê kurdan bêveng manenê. Ma venga nê dezgehanê heqanê merdiman ê mîyanneteweyîyan danê ke vera tecrîdê Îmraliyî û vera faşîzmê îqtîdarê AKP-MHPyî hîsger bibê û rolê xo bîyarê ca.

Komployo mîyanneteweyî sey sîyasetê tecrîdî û caardişî dewam keno. Xîretê derbeya 15ê temmuza 2016î xo rê bahane kenê. Vera nînan şarê kurdî her tim xo ver dano. Grevê vêşanîye yê bi rayberîya Leyla Guvene nê xoverdayîşan ra yew o. Netîceya nê xoverdayîşî û îradeyî de Rayber Apoyî avûkatanê xo reyde pêvînayîş kerd. Dima reyna tecrîdê vera Rayber Apoyî ame girankerdene. Tebaxa 2019î ra nata zî Rayber Apo ra xeberêke nêameye girewtene.

Armancê komployî no bi ke kurdê bêserek, bênasname û bêstatu bimanê. Wazenê ke kurdî seserra bîne zî wayîrê dewletêke nêbê. Sayê Rayber Apoyî destkewteyê şarê kurdî pîl bîyî. Bi nê hawayî tecrîdê Rayber Apoyî ame xorinkerdene. Seba ke kurdî bibê wayîrê hêz û îradeyî Rayber Apoyî ra hesab yeno persayene.

Şarê kurdî esaretê Rayber Apoyî sey esaretê xo qebul keno û azadîya xo zî sey azadîya ey vînenê. Bi heskerdişêkê pîlî pabesteyê Rayber Apoyî yê. Coka wazenê ke Rayber Apo azad bibo û coka xo ver danê. Nê xoverdayîş û waştişê şarê kurdî zî meşrû yo. Şarê ma senî ke no komplo pûç kerd bi heman hawayî do komplo bin bikero.

Sîyasetê tecrîdî hînî bîyo  sîyasetê îdarekerdişê welatî. Coka nameyo bîn ê nê tecrîdî faşîzm o. 

Tirkîya de huqûq, sîyaset, komelê sivîlî, kulturî û komelkî binê faşîzmî de yê û nêeşkenê nefesêk bigêrê. Nêrazîbîyayîşê vera na rewşe bi îşkenceyan, tepiştişan, destbendkerdişan yenê cezakerdene. Tirkîya de zîndanî bi roşnvîran, nuştoxan, rojnamegeran, sîyasetmedaran pirr ê. Tirkîya de nika yew qesawetê ameyoxî yo xorin esto. Îqtîdarê faşîstî bi polîtîkayanê xo yê şîdetî û teda dormeyê şarî girewt. Çareserîya xelisîyayîşê nê dormegirewtişî ra yewîya hêzê komelkî û awankerdişê blokê demokrasîyî ya.

Caardişê yewîya neteweyîye ya demokratîke seba şarê kurdî şerto bingeyî yê binkerdişê komployî yo. Eke kurdan yewîya xo awan bikerê hesabê komplogeran do pûç bibê. Ked û xîretê Rayber Apoyî yê seba yewîya neteeyî yenê zanayene. Armancanê tecrîdî ra yew zî no yo ke yewîya kurdan nêra awankerdene. Coka ganî pêro hêzê kurdan vengdayîşê Rayber Apoyî yê seba yewîya neteweyî ya demokratîke rê cewab bidê. Têna rayîrê pawitişê  destkewteyan esto ke o zî yewîya neteweyî ya demokratîke yo.

Sîyasetê tecrîdî vera Kurdîstan û Rojhelatê Mîyanênî yeno xebitnayene. Rojhelatê Mîyanênî de fikrê yewîya şaran, bawerîyan, kulturan aver şino. Coka hêzê mîyanneteweyî vera tecrîdê Rayber Apoyî bêveng ê. Pêro hêrişê vera Rojawanî, Mexmûrî, Şengalî, Başûrî, Vakurî zî naye ra semed ê. 

Pawitiş, geşkerdiş û pîlkerdişê nê averşîyayîşê seba şaran, rejîmanê statukoperweran ê ke rejîmo faşîst ê tirkî tira rayberîye keno yew bi yew birijnê, firsendê yewîya konfederal û demokratîke yê Rojhelatê Mîyanênî awan bikerê.

Serrgêra 22. a komployî de rol û mîsyonê tewr pîlî kewenê milê cinîyan û ciwananê kurdan. Nê esasî ser o sere de cinî û ciwananê kurdan ê çar parçeyanê Kurdîstanî û yê teberî ma venga pêrp şarê xo yê welatperwerî û dostanê xo danê ke bi qerardarîya şiknayîşê tecrîdî û çinkerdişê komployî têkoşîn geş bikerê, rêxistinbîyayîşê xo xurt bikerê, çalakî û têkoşînê xo dewam bikerê.''