Hemserekîya Konseya Rayberdişî ya KCK’yî  derheqê pêvînayîşê avûkatanê Rayberê Şarê Kurdî Abdullah Ocalanî yê 2’ê Gulane de eşkerayîyêk daye û nê parê kerdî:

‘‘Rayber Apo 27’ê Temmuze 2011 ra nata nêeşkeno avûkatanê xo dir pêvînayîş virazo. 5’ê Nisane 2015 ra nata tecrîd ame xorîkerdene û merdimê ey zî nêeşkenê ey vînê. 3 tepişteyê binî ke Îmrali de yê ê zî 5’ê Nisane 2015 ra nata nêeşkenê merdimanê xo vînê. Xorîbîyayîşê tecrîdî ya pîya polîtîkaya şerî ya vera Kurdan zî bi girdbîyayîşî yena domanyene.

Ewro rayberîya Leyla Guvene de bi şîarê “Ma tecrîdî bişiknê, faşîzmî birijnê û Kurdistanî azad bikerê”  zîndanan, Kurdistan û Ewropa de grevê vêşanîye bi xurtbîyayîşî vila benê. Rojeyê mergî yê 15 tepişteyan zî dewam keno.

Netîceyê xurtbîyayîşê xoverdayîşo ke şexsê dayîkanê Kurdan de vila beno, 8 serran ra dima destûrê şîyayîşê Îmraliyî dîya avûkatan. La destûr nêdîyo înan ke ê pêvînayîş de not tepişê û tepişteyanê bînan zî vînê. Eşkerayo ke no tena pêvînayîşêk o. Îqdîtîdar bi naye wazeno ke xoverdayîş bişikno û zextê rayapêroyî yo ke înan ser o, nê ra bixelisîyo. Rayber Apo sey her pêvînayîşî na rey zî vindertişê xo yo sîyasî ramojnayo. Bi berpisîyarîya tarîxî rayîrê çareserî ramojnayo. Ercnayîşê Rayber Apoyî esasî de  şar û hêzanê demokrasî yê Tirkîya rê mesajêk o. Weçînitişê 31’ê Adare zî ramojna ke şarê Kurdî û hetê demokrasî vera îqtîdarê faşîstî yê.

Vatişanê avûkatan ra yeno famkerdene ke tecrîd nêqedîyo, waştişê xoverdayoxan nêameyî ca. Tena seba ke xoverdayîş bêro şiktine pêvînayîşê avûkatan ame plankerdene. Ma zî qerarê  xoverdayoxanê zîndanan û heme çalakwananê bînan ê ke bi şîarê “Ma tecrîdî bişiknê, faşîzmî birijnê û Kurdistanî azad bikerê” xover danê, raşt vînenê û vanê ke tecrîd dewamkeno û vera naye ganî xoverdayîş bêro girdkerdene.‘‘