Hemserekîya Konseya Rayberdişî ya KCKyî Serekkomarê Komara Mahabadî Qazî Mihemed û embazê ci yê ke hetê dewleta Îranî ra ameybî dardekerdene yad kerdî. KCKyî pare kerd ke ê do hesreta înan Kurdîstanê Azadî awan bikerê.
Hemserekîya Konseya Rayberdişî ya KCKyî bi wesîleya serrgêra dardekerdişê Qazî Mihemed û embazanê ey eşkerayîyêke daye.
Eşkerayîye wina ya:
''Ma Serekkomarê Koma Mahabadî Qazî Mihemed û embazanê ey ê ke 31ê adara 1947î de hetê dewleta Îranî ra ameybî dardekerdene bi rêzdarî yad kenê. Ma do hesreta înan Kurdîstanê Azadî qetî awan bikerê.
Ferasetê netewe-dewlete seserra 20. kerde seserra qirkerdişê kurdan. Şarê kurdî vera polîtîkayanê kolonyolîstan sere wedarit û azadîye waşte. Waştişê kurdan raştê dardekerdiş û qirkerdişan ameyî. Komara Mahabadî ya azade û xosere zî bi qirkerdiş û dardekerdişan ameye rijnayene. Polîtîkayê dardekerdiş û qirkerdişî yê Tirkîya û Îranî mojnenê ma ke seserra 20. de kurdan ser o zulm û înkarêko senîn est o. Ewro zî kurdan ser o polîtîkayê înkar, teda û zulmî est ê. Şarê kurdî wazeno şaranê herême reyde bi hawayêkê xoser û azadî biciwîyo la no waştiş nêno qebulkerdene. Netewe, kultur, şar, vîr û bawerîyan ser o ferasetê netewe-dewlete, polîtîkayê teda, zulm û qirkerdişê kulturelî dewam kenê.
Seserra 20 û 21. de warê çaresernêkerdişê dewaya kurdan de têna şarê kurdî nê dewletanê herême û şaran zî dej ant, nê nêeşkayî mîyanê krîzanê sîyasî û komelkîyan ra vejîyê. Seke Rayber Apo vano çaresernêkerdişê dewaya kurdan cezaya vera Rojhelatê Mîyanênî ya. Welatê herême û Rojhelatê Mîyanênî seba ke krîzan ra vejîyê nê waran de îstîkarar û haştîye bîyarê ca ganî dewaya kurdan bêra çareserkerdene.
Meseleyê sîyasî û komelkî yê Îranî ewro çaresernêkerdişê dewaya kurdan ferz kenê. Na raştîye mojnena ma ke Kurdîstano Azad û Îrano Demokratîk mumkîn û nêzdî yê. Nê hetî ra şehadetê pêro parçeyanê Kurdîstanî do Kurdîstanê Azadî de manadar bibê. Ê do sey bêmerganê Kurdîstanî tarîx de ca bigêrê.''
