Hemserekîya Konseya Rayberdişî ya KCKyî serrgêra Qirkerdişê Pirsûsî de eşkerayîyêke daye û vat: ''Şarê Rojawanî û şorişgêrê ci do raywananê xeyalî vîr a nêkerê, hesreta înan pê pawitişê Rojawanî bîyarê ca.''
Hemserekîya Konseya Rayberdişî ya KCKyî derheqê serrgêra Qirkerdişê Pirsûsî de eşkerayîyêke daye. Eşkerayîye wina ya:
''20ê Temmuza 2015î de 33 raywanê xeyalî Pirsûs de pê hemkarîya MÎT-DAÎŞî ameyî kiştene. Ma pêro ciwananê sosyalîstan ê şehîdan bi hûrmetî yad kenê û sozê xo dibare kenê ke xeyalanê înan têkoşînê xo de bidê ciwîyayene û hesreta înan a Kurdîstanê Azadî, Tirkîyaya demokratîke bîyarê ca. Ma gazîyanê Pirsûsî rê zî serkewtiş wazenê.
Dima ke Erdoganî Mutabaqatê Dolmabahçe red kerd, 5ê nîsane de tecrîdê vera Rayber Apoyî da destpêkerdene, 5ê hezîrane de Amed de qirkerdiş kerd û 7ê hezîrane de weçînayîş çin hesibna Qirkerdişê 20ê Temmuze ame kerdene. No qirkerdiş hetê plansazîya MÎTî ra ame kerdene. Dima ke mutabaqat ame redkerdene, 2014 de Planê Çinkerdişî ame amadekerdene û 24ê temmuze de bi desan teyarayan hêrişê Herêmanê Pawitişî yê Medya kerd, no zî bi îlanê şerî.
Pê nê şerî înan bira berdewamîya qirkerdişî daye ke Lozanî reyde dîyabi destpêkerdene. 20ê temmuze de wexto ke 33 ciwanî pê bombayan ameyî qirkerdene, karaktero kolonyalîst ê dewleta tirke zî eşkera bi. Dewleta tirka a raşte waştêne qesasê binkewtişê Kobanê yê DAÎŞî bigêra. 33 ciwanî semedo ke domananê Kobanê atmosferê şerî ra bivejê û cuya înan normalîze bikerê kewtbîyî rayîr.
Hêrişê vera Pirsûsî ra verî pê hemkarîya MÎT û DAÎŞî hêrişê Kobanê amebi kerdene, cinî, ciwan û domanî zî tede bi seyan kobanêyîjî ameybî kiştene. Qirkerdişê Pirsûsî û Kobanê bi heman armancî ameyî kerdene. La ê ser nêkewtî. Pêro dinya wayîrê Kobanê vejîyaye, Kobanê bîye xoverdayîşê Stalingrade. Hêzanê kurdan û şorişgêran vera DAÎŞî xo ver da û hêrişê înan şiknayî.
Tarîx de Qirkerdişê Pirsûsî ra çend rojî dima Peymana Lozanî amebî îmzakerdene û şero seserre dîya destpêkerdene. Têkoşînê Azadîya Kurdan rayberîya PKKyî de bi têkoşînê seserran. Heta ke Kurdîstano azad û Tirkîyaya demokratîke bêrê awankerdene no têkoşîn do dewam bikero. Heta ke dewaya kurdan nêra çareserkerdene demokrasî nêna caardene, heta ke demokrasî nêra caardene meseleya kurdan çareser nêbena. Heta ke na raştîye nêra famkerdene ne têkoşînê azadîya Kurdîstanî ne zî têkoşînê demokrasî ser nêkeweno.
Têkoşînê PKKyî reyde çar parçeyanê Kurdîstanî de têkoşînê azadîye û demokrasî vejîya werte. Nê têkoşînî tesîrê ereban, fars û tirkan zî kerdo, feraseto demokratîk o raştikên resa astêka girînge. Planê qirkerdişî ameyo vindertene. Şarê kurdî bîyo hêzêko xurt ê azadî û demokrasî. No şar hînî koletîye qebul nêkeno. Şarê kurdî bîyo şaro tewr polîtîk û zanaye.
33 raywananê xeyalî heman wextî de vera hêrişanê serê çar parçeyanê Kurdîstanî tewirê xo mojna. Ê seba bêmanakerdişê têlanê sînoran ê Peymana Lozanî kewtbîyî rayîr. Tarîx de way û biratîya şaran nê erdî ser o bîya esas, têlê sînoran zî bîyî sembolê polîtîkaya qirkerdişî. Fîlmê Propaganda yê Kemal Suanlî raştîya Lozanî bi hawayêkê eşkerayî vete werte.
Qirkerdişê 20ê Temmuze yê Pirsûsî û Qirkerdişê Garê Anqara vera ferasetê parçekerdişî bîyî sembol ke welat û şaran kenê yew. 20ê temmuze û 10ê teşrîna verêne bîyî rojê tewr zelalî ke ferasetê Tirkîyaya demokratîke û Kurdîstano Azad vejîya werte. Şarê Tirkîya do xeyalê înan Kurdîstanê Azadî û Tirkîyaya demokratîke reyde tacîdar bikerê.
33 raywanî Pirsûs de qetî nêrê vîrakerdene. Bingeyê Kurdîstanê Azadî û Tirkîyaya demokratîke de vera polîtîka û kerdişanê qirkerdişî sey Lozanî kolonyalîzm do bêro jehrkerdene. Şarê Rojawanî û şorişgêrê ci do nê raywananê xeyalî vîr a nêkerê, hesreta înan pê pawitişê Rojawanî bîyarê ca.''
