Hemserekîya Konseya Rayberdişî ya KCKyî bi eşkerayîyêka nuştekîye Qirkerdişê Zîndanan ê 19ê Kanûne û Qirkerdişê Mereşî şermezar kerdî. Eşkerayîye wina ya:

''44 serrî verî Mereş de qirkerdişê dewleta tirke ya kolonyalîste yê vera şarê ma de bi desan merdiman dinyaya xo bedilnaya, birîndar bîyî û neçare mendî ke erdê xo biteriknê. Ma serra 44. de qurbananê Qirkerdişê Mereşî reyna bi rêzdarî yad kenê, dewleta tirke ya qirkere bi nefretî şermezar kenê. Ma sey Têgêrayîşê Azadîye yê Kurdan reyna îfade kenê ke do hesabê pêro qirkerdişan bipersê.

Dewleta tirke seba ke Kurdîstanî bikerê warê vilabîyayîşê netewebîyayîşî tede bi desan qirkerdişî kerdî ke Qirkerişê Mereşî zî nînan ra yew o. Dewleta tirke pê nê qirkerdişan armanc kerd ke Kurdîstan kurdan ra pakî bikera. Rayber Apoyî na raştîya dewlete rew ra dîye û arde ziwan. Xora Qirkerdişê Mereşî zî dima ke têgêrayîşê azadîye bira partîbîyayîşî daye ame kerdene. Dewleta tirke armanc kerd ke bi Qirkerdişê Mereşî verê têgêrayîşê azadîye bigêra û qirkerdişê kurdan cade biqedîna. Sey qirkerdişanê bînan Mereş de zî tay merdimî ameyî qirkerdene ê bînî zî dîyayî koçkerdene. Çunke armancê înan Kurdîstan bê kurdan verdayîş o.

Dewleta tirke çarçewa yew planî de polîtîkaya qirkerdişê kurdan arde ca. Hetê nê planî yo tewr girîng zî no yo ke rojawanê Firatî kurdan ra bêro vengkerdene. Qirkerdişê Mereşî na çarçewe de ame kerdene. Seba ke nasnameyê kurd-elewîtîye averşîyayîş û pawitişê kurdayetîye de zaf girîng bi dewleta tirke no nasname kerd hedef. Qirkerdişê Mereşî qirkerdişê kurdanê elewîyan o. Dewleta tirke Mereş de bi nasnameyê sunîtîye verî girseyî provake kerdî, zemînê qirkerdişî viraşt û dima pê destê ulkucîyanê paramîlîteran qirkerdiş kerd. Xora dewleta tirke dişmena pêro elewîyan a. Sey Mereşî Çorum, Tokat, Sêwas de zî elewîyî qetil kerdî. Coka Qirkerdişê Mereşî qirkerdişê elewîyan o.

Ewro qirkerdişê kurdan hetê îqtîdarê faşîstî yê AKP-MHPyî ra yeno kerdene. Bi AKP-MHPyî teberê sînoranê Vakurê Kurdîstanî de polîtîkaya qirkerdişê kurdan dest pêkerde û na çarçewe de qirkerdiş û îşxal ameyî kerdene. Rojawan de bi taybetî îşxalê Efrînî, dima îşxalê Serêkanîyê û Girê Sipî, hêrişê îşxalî yê vera Başûrî, çekê kîmyewî yê vera gerîlayan, hêrişê vera Şingal û Mexmûrî û Rojawanî, tecrîdê vera Rayber Apoyî nê pêrotî çarçewa qirkerdişê kurdan dde yê û hetê AKP-MHPyî ra yenê caardene. Pir eşkera yo ke îqtîdarê AKP-MHPyî îqtîdaro tewr qirker, tewr faşîst û tewr antî-kurdan o û heta ke est bo kurdî do binê gefê qirkerdişî de bibê. Nê gefî ancax pê rijîyayîşê AKP-MHPyî do biqedê. Ganî pêro demokrat, şorişgêrî, bi taybetî şarê kurdî û dostê kurdan bi na hişmendî vera AKP-MHPyî têkoşînî geş bikerê.

Dewleta tirke ya îşxalkere 19ê kanûna 2000î de hêrişê tepişteyan kerd û netîceya nê hêrişan de bi desan tepişteyan dinyaya xo bedilnaye. Ma pêro şehîdanê şoriş û demokrasî şexsê tepişteyanê xoverdayîşî de bi rêzdarî û minetî yad kenê û sozê xo yê servistişê têkoşînî dibare kenê. Dewleta tirke ya qirkere 19ê kanûna 2000î de seba ke îradeyê tepişteyan bişikna û teslîm bigêra hêrişê zîndanan kerd û bi desan şorişgêrî qetil kerdî. Labelê tepişteyan sey her wextî vera hêrişanê faşîstan xo ver da û bi xoverdayîşê xo hêrişê faşîstî çin kerdî. Ewro zî heman sîyaset hetê îqtîdarê faşîstî yê AKP-MHPyî ra yeno caardene. Raştîye de ewro verî ra zêdeyêr polîtîkaya tecrîd, teda, tersnayîş û teslîmîyetî  yena caardene. Coka xoverdayîş û têkoşîno tewr pîl Îmrali de yeno kerdene û şexsê Rayber Apoyî de yeno temsîlkerdene. Coka vervejîyayîşê tecrîdê Îmraliyî û wayîrvejîyayîşê Rayber Apoyî heman wextî de yeno manaya pawitişê tepişteyan û xeta xoverdayîşî ya zîndanan. Ma venga her kesî danê ke vera tecrîdkerdişê Rayber Apoyî bi xurtêrî tewrê xo bimojno û tepişteyan, xoverdayîşê tepişteyan bipawo.''