Hemserekîya Konseya Rayberdişî ya KCKyî bi eşkerayîyêke şayîyê Newroza 2022yî selam kerdî.

Eşkerayîye wina ya:

''Ma şar û dostanê xo fîraz kenê ke sere de Vakurê Kurdîstanî de çar parçeyanê Kurdîstanî û dinya de her ca kerdo de û faşîzmê AKP-MHPyî rê û pêro dişmenanê demokrasî û azadîye rê dersêko tarîxî da. Ma serra 50. ya Rayberîye de her kesî rê serkewtiş wazenê.

Şarê kurdî û dostanê ci vat 'Biciwîyo Serek Apo', 'Bê Serek cuye nêbena' û perwerîya xo ya bi Rayberîye vete werte. Înan seba ke Rayberîye azad bikerê meydanî kerdî de. Înan bawerî û perwerîya xo ya bi gerîlayan reyna bi qîrayîşî îsbat kerde. Bi nê hawayî qîmet dîyeno kedanê Rayber Apoyî ke 49 serrî verî seba azadkerdişê şarê kurdî gamêke eşte. Newroza 2022yî îlan kerd ke PKK û şarê kurdî do serra 50. ya Rayberîye de têkoşînêkê hîna pîlî bikerê.

Her Newroze kerd ke kurdan xo pê erjanê neweyan newe ra biafernê. Têkoşînê kurdan Newroze, Newroze zî şarê kurdî aver berd û bihêz kerd. Bi nê hawayî şarê kurdî bi şarê Newroze û şarê serewedaritişî. Na Newroze de zî şarê kurdî pê erjanê neweyan xo bihêz kerd û newe ra xo aferna. Cinîyî û ciwanî tewr vernî de şîtî û înan kerd ke Newroze biba bingeyê şorişê kulturel, komelkî û neteweyî. Rixmê pêro hêrişan zî şarê kurdî eke xo ver dano no xêrê nê şorişan ra yo.

Faşîzmê AKP-MHPyî bi tecrîdê girankerdeyî yê vera Rayber Apoyî 7 serrî yo vera kurdan û hêzanê demokrasî hêrişanê giranan keno. Bi nê hawayî wazeno kurdan û nê hêzan çin biker, dîktatorîya faşîste awan bikero û kurdan qir bikero. Bi nê armancî 2014 de îqtîdarî 'Planê Çokdayîşî' amade kerd û tedaya tewr girane vera kurdan û hêzanê demokrasî arde ca. Şarê kurdî, dost û hêzanê demokrasî Newroza 2022yî de vat 'Wext wextê serkewtişî yo.' Êyê ke 'Planê Çokdayîşî' amade kerd do bi xo çin bikerê. Vera Newroza 2022yî çokê faşîzmî lerzenê, mîyanê têkoşînê şarê kurdî û hêzanê demokrasî de înan dî ke peynîya înan ha yena.

Na Newroze mojna ke têkoşîno hempar ê şarê kurdî û hêzanê demokrasî xurt bîyo. No weriştişo xurt ê Newroze, ruh û tewirê têkoşînê hemparî mujde da ke awankerdişê Tirkîyaya demokratîke, Kurdîstanê azadî û Rojhelatê Mîyanênî yê demokratîkî dûr nîyo. Na Newroze de reyna eşkera bi ke ameyoxê Tirkîya do bi îtîfaqê hêzanê demokrasî yê şarê kurdî dîyar beno.

Kawayê Asinkerî ra nata ruh û karakterê Newroze vera zulmî yê. No zî tarîx de bîyo têkoşînê azadîye yê şaran û bindestan. Newroza 2022yî vera faşîzmê AKP-MHPyî sere wedarit û bi hemleya azadîye û demokrasî ya tarîxî. Newroza 2022yî de şar bi tewirê xo têna qederê Kurdîstan û Tirkîya nê heman wextî de qedero sîyasî yê Rojhelatê Mîyanênî zî dîyar kerd. Sey Kongreya Demokrasî ya Şaran na Newroze xeta hedef, çalakî û bernameyan eşkera kerde.

Newroze ters verda zerrîya faşîstan, zaliman û hêzanê zorbazan; moralêko pîl da şarê kurdî, dost û hêzanê demokrasî. Nê xoverdayîş û tewirê şarî enerjîyêka winasêne afernaye ke eşkeno ruhî bido mergî. Pêro şorişgêr, welatperwer, demokratê ke no têkoşîn û tewirê şarî dî, teda û zulm çend giran bibê zî do têkoşîn bikerê û verê xo bidê serkewtişî.

Şarê kurdî û hêzê demokrasî bi hêzê Newroza 2022yî serra 50. ya Rayberîye de ganî têkoşînî zêdêr rêxistin bikerê. Tewirê şarî yê Newroze mojna ke seba geşkerdişê têkoşînê îtîfaqê hêzanê demokrasî yê şarê kurdî îmkanî est ê. Bi na raştîye ganî seba rijnayîşê faşîzmê AKP-MHPyî, polîtîkaya qirkerdişî têkoşîn bêro xurtkerdene, Rayber Apo bêro azadkerdene, Kurdîstano Azad, Tirkîya û Rojhelatê Mîyanênî yo demokratîk do bêrê ronayene.

Vengdayîşê Mazlûm, Zekiye, Rahşane, Ronahî, Bêrîvane, Sema Yuce, Kemal Kurkut û pêro şehîdanê Newroze, erjê têkoşînê 49 serran û Newroza 2022yî wina yo.''