Hemserekîya Konseya Rayberidişî ya KCKyî derheqê qirkerdişê Parisî ke hîrê kurdî şehîd bîyî de eşkerayîye daye. KCKyî vera hêrişî hêrsê xo ard ziwan, şehîdî yad kerdî û nê vatî:

''No qirkerdiş dewamê qirkerdişê 9ê Çeleyê 2023yî yê Parisî yo. Dewleta tirke des serrî verî pê Qirkerdişê 9ê Çeleyî ke hîrê cinîyê welatperwerê şorişgêrî ameyî qetilkerdene, qirkerdiş û qetlîamê vera kurdan kiriştî Ewropa. No qirkerdiş zî sey qirkerdişê bînî hetê îqtîdarê AKP-MHPyî ra ame kerdene. No îqtîdaro faşîst dişmenê kurdan o û na dişmenîya xo kirişeno her ca. Kurdîstanijê ke Ewropa de yê zî yenê hedefgirewtene. No qirkerdiş hetê îqtîdarê AKP-MHP û MÎTî ra ame kerdene. Eke paşdayîşê dewletanê Ewropa û rêxistinanê îstîxbaratî ra nêbo dewleta tirke û MÎT têna nêeşkena nê hêrişî bikerê. No çîyêko zaf eşkera yo û her kes zano. Cayo sey Paris de her hetê ci hetê îstîxbarat û hêzanê pawtişî ra yeno pawetene de qirkerdiş yeno kerdene. No zî na raştîye vejeno werte.

Rixmo ke eşkera yo qirkerdişê 9ê Çeleyê 2023yî hetê dewleta tirke û MÎTî ra ameyo kerdene qirkerdiş hetê dewleta Fransa ra nêame roşnkerdene û raştîye nêvejîyaye meydan. Qetilkar zîndan de ame kiştene û serê na dosya ame girewtene. Eke serê Qirkerdişê 9ê Çeleyî nêameyêne girewtene û qirkerdiş biameyêne roşnkerdene no qirkerdiş nêameyêne kerdene. Verê qirkerdişan ameyêne girewtene. Xora cayê qirkerdişî nêzdîyê cayê qirkerdişê bînî yo û serrgêra ci de ame kerdene. No zî zaf baldar û manîdar o.

Yew linga şerê dewleta tirke yê vera kurdan zî Ewropa ya. Vizêr Almanya de vera dezgeh û welatperweranê kurdan zext û destbendkerdişî bibî, ewro zî Paris de qirkerdiş bi. Eşkerayo ke îqtîdarê faşîstî yê AKP-MHPyî konseptêko newe yê vera kurdan Ewropa rê dayo qebulkerdene. Fransa vana eleqaya ci pê nê qirkerdişî çîn a. Eke raşt vana wa qirkerdişî roşn bikero û raştîyan vajo. Gireyê nê qirkerdişî Qirkerdişê 9ê Çeleyê 2023yî yê Parisî yo. Coka ganî verî qirkerdişê 9ê Çeleyî bêro roşnkerdene. Eke wina mekero ne ma ne zî şarê kurdî eşkeno hole, pozîtîv nêzdîyê Fransa bibo.

Ma zaf hole zanê ke dewleta tirke heta ewro pê paştdayîşê dewletanê Ewropa qirkerdişê vera kurdan rayra bena.  Eke dewletê Ewropa semedê menfeatê xo yê sîyasî û ekonomîkî paştî medê ci, dewleta tirke nêeşkena wina qirkerdişan bikero. Dewletê Ewropa semedê menfeatanê xo benê hemkarê nê qirkerdişan. La şarê kurdî hinda nê qebul nêkeno. Sere de Fransa ganî qet yew dewleta Ewropa paştî medo polîtîkayanê qirkerdişî yê îqtîdarê AKP-MHPyî. Ewropa ganî goreyê demokrasîyê xo têbigêro.

Ganî şarê Kurdîstanî û dostê ci şirê Paris û nêrazîbîyayîşê xo ramojnê. Ganî her kes verê xo bido Parisî û heta ke no qirkerdişê vera krudan bêro roşnkerdene çalakîyan de bo. Şarê ma û dostê ci yê ke tewirê xo yê demokratîkî ramojnenê wa qetî şîdetî ra dûrî vinderê. Wa vera provokasyonan hîşyar bê û rêxistinkerde têbigêrê. Rayapêroyîya Ewropa zî semedê roşnkerdişê qirkerdişî ganî paştî bido têkoşînê demokratîk û meşruyî yê şarê kurdî û vengê xo berz bikero.''