Hemserekîya Konseya Rayberdişî ya KCKyî bi wesîleya serrgêra 42. ya ronayîşê PKKyî eşkerayîyêke daye.

Eşkerayîye wina ya:

''Serrgêra 42. ya ronayîşî ya PKKyî ya Rayber Apoyî, şarê ma, xoverdayoxanê koyan, desşt û zîndanan, meydanan fîraz ba. Ma bi des hezaran şehîdanê xo bi rûmet û minetî yad kenê. Embaz Hakî Karerî ra heta xoverdayoxanê 14ê Temmuze, embaze Egîd û Sara,embaz Erdal, Simko, Rustem Cûdî, Delal Amed, Atakan Mahîr, Zekî Şengalî, Helmet, Kasim Engîn, Leyla Agirî, Egîd Civyan û Yilmaz Dersimî şehîdê ma îradeyê azadî û estbîyayîşê kurdan ê. Ma sozê xo yê caardişê hesreta înan dibare kenê.

Tarîxê têkoşînî yê 42 serran ê PKKyî destanêkê gandarbîyayîşî yo. Hem gandarbîyayîşo neteweyî yo hem zî tarîxê hêz û îradeyê kurdan o. Nê 42 serran de dewêke, kuçeyêk, taxêke, bajarêk nêmend ke nêwurzo payan ser. Pênaseyê 'şarê serewedaritoxî' yo ke Rayber Apoyî seba şarê kurdî kerd, karaktero şorişgêr ê kurdan vist verê çiman.

PKK paradîgmaya azadîya cinîyan xo rê esas gêno

Azadîya cinîyan bingeyê hîra û xorinbîyayîşê demokrasî û azadîyan a. Rayberîya ke bi na hîşmendîye îdeolojîya azadîya cinîyan afernaye û nê bingeyî ser o enerjîya demokratîke ya şorişgêre ya cinîyan ê kurdan eşkera kerde, ewro têna Rayberîya kurdan nê Rayberîya pêro dinya ya. Bi xeta azadîye ya cinîyan, çarçewa û xorinîya karakterê demokratîkî ya PKKyî qat bi qat zêdîyaye. Nasnameyo bingeyî yê PKKyî karakterê azadîpawitoxîya cinîyan a. PKK xo rê paradîgmaya azadîya cinîyan esas gêna.

Ewro rayberîya PKKyî de têkoşîno şorişî yê xeta azadîya cinîyan vurîya çimeyê modernîteya demokratîke. Şexsê şar û cinîyan ê kurdan de merdimîye ewro verê xo da Rojhelatê Mîyanênî.

Ameyoxê Rojhelatê Mîyanênî do pê têkoşînî eşkera beno

Sere de dewleta tirke ya kolonyalîste hêzê despotî yê Rojhelatê Mîyanênî Têkoşînê Azadîye yê PKKyî sey mergê xo vînenê. Coka nê pêro hêzî serkêşîya dewleta tirke de vera PKKyî têkoşîn kenê. Ameyoxê Rojhelatê Mîyanênî bi nê têkoşînî do eşkera bibo.

Têkoşînê 42 serran ê PKKyî û erjê ci têna seba şarê kurdî nê pêro şaranê Rojhelatê Mîyanênî vurîyayî hêzê demokrasî û azadîye. Rojhelatê Mîyanênî de dewro newe yê têkoşînê demokrasî û azadîye dest pêkeno. Rayberîye bi fikr, paradîgma û averberdişê xo bîye raştîya komelî. Destkewteyanê pîlan ê têkoşînê PKKyî ra yew zî no yo.

Ê do nêeşkê kurdan ser o sîstemê qirkerî awan bikerê

Paradîgmaya Rayberîye kelecan û îlham dana pêro dinya. Modernîteya kapîtalîste roje bi roje rijîyena. Hînî şar û hêzî vera sîstemê kapîtalîzmî û modernîteya xo wayîrê hêzê pîlî yê fikran ê. PKK bi têkoşînê xo yê 42 serran kolonyalîzmo qirker pê hêrişanê xo kerdî pûç. Dewleta tirke ya îşxalker û qirkera ke dişmenîya kurdan kena, hînî nêeşkena kurdan ser o sîstemêkê qirkerî awan bikera. Eke xeta Rayber Apoyî ser o têkoşîn pê qeradarîye bêro kerdene kolonyalîzmo qirker û hîşmendîye do bêrê çinkerdene. Têkoşîno ke kurdî bi paradîgmaya azadîwaştoxîya cinîyan, ekolojîke kenê, do ser bikewê û kurdî do wayîrê ziwan, kultur û nasnameyê xo vejîyê.

Seba PKKyî zor û zehmetî çin ê

Seba PKKyî zor û zehmetî çin ê. Pêro zor û zehmetîyî seba PKKyî sebebê têkoşînî yê. Senî ke têkoşînê PKKyî 42 serran de heqê pêro zehmetîyan ra ame û erjê pîlî awan kerdî serra 43. de zî têkoşînê ma do îqtîdarê AKP-MHPyî birijno. AKP hînî partîyêka winasên a ke wextê ci vîyart. Nê îqtîdarî 15 serran de sere de kurdan pêro şarê Tirkîya û Rojhelatê Mîyanênî rê zulm kerd. Têkoşînê xeta Rayberîye serra 43. de do Kurdîstanê azad, Tirkîyaya demokratîke û Rojhelatê Mîyanênî yê demokratîkî awan bikero.

Nê esasî ser serra 43. ya têkoşînî de sere de ciwan û cinîyan ma venga pêro şarê xo, dostanê xo û hêzanê demokrasî danê ke vera faşîzmê AKP-MHPyî têkoşîn geş bikerê, Deheqan birijnê, Rojhelatê Mîyanênî bivurnê wisaranê neweyan ê Newrozan.''