Hemserekîya Konseya Rayberdişî ya KCKyî bi eşkerayîya nuştekîye veng da ke wa serrgêra 24. ya Komployê Mîyannetweyî yê 15ê Sibate de têkoşîn her hetî ra bêro xurtêrkerdene. Hemserekîye hêzanê komlogeran ra zî waşt wa paştî medê polîtîkayanê qirkerdişî yê vera kurdan ê îqtîdarê faştîstî yê AKP-MHPyî.

Eşkerayîya Hemserekîya Konseya Rayberdişî ya KCKyî de wina ya:

''Komployê Mîyannetweyî yê vera Rayber Apoyî 24 serrî xo dima verdayî. Ma nê komployî lanet kenê. Ma şexsê Halît Oral û Aynure Artan de hemê şehîdanê ke bi şîarê 'Şima Nêeşkenê Tîja Ma Bikerî' dormeyê Rayber Apoyî de bedenê kerd çemberê adirî, ma înan bi hurmet yad kenê û sozê serkewtişî newe kenê.

Rayber Apo 15ê Sibata 1999î de netîceya komployêkî de dîya dewleta tirke ke no komplo warê mîyanneteweyî de komployo tewr gird ê seserra 20. bi. Amerika û Îsrailî nê komloyî rê serkêşîye kerde, welatanê Ewropa paştî da ci û hetê NATOyî ra ame koordînekerdene. Xeylêk dewletan mîyanê komployî de ca girewt. Bêşik peyê nê komployî de planê girdî est ê. Amerîka Rayber Apo û polîtîkayê PKKyî verê xo de sey anstengî dîyênî, coka  verî ke mudaxaleyê Rojhelatê Mîyanênî bikero  waşt Rayber Apo û PKKyî bêtesîr bikero. Rayber Apoyî bi xo vato. Komplo hetê Amerika û NATOyî ra amekerdene. Komplo de rolê dewleta tirke pê gardîyanîye sînordar o.  Seba ke Rayber Apo vera polîtîkayanê hêzanê modernîteya kapîtalîstî yê vera kurdan û Rojhelatê Mîyanênî vindert û vindertişê xo yê azadîye de israr kerd, komplo ame kerdene. Dewleta tirke seba ke dişmenê kurdan a, bi zihnîyetê qesasî nêzdîye bîye.

Rayber Apoyî bi afernayîşê PKKyî û destpêkerdişê têkoşînê azadîye yê kurdan  planê qirkerdişê kudan betal kerd. Dewleta tirke nê hêrsî ra kerd ke bi îmhakerdişê Rayber Apoyî, PKKyî biqedîno û şarê kurdî newe ra îmha û înkar bikero. La Rayber Apoyî destûr nêda şerê kurd-tirkî biqewimîyo û komplo ser bikewo. Xora badê komployî serekwezîrê dewrî Bulent Ecevîtî vat ê nêzanê  qey komplo ame kerdene. No îtîraf zî eşkera mojneno komplo hetê hêzanê mîyanneteweyî ra ame kerdene.

Rayber Apoyî Îmrali de bi averberdişê paradîgmayêka newî, şaran, cinîyan û heme bindestan rê manîfestoya seserra 21. teqdîm kerde û cewabo tewr bimana da komployî. Têgêrayîşê ma bingeyê na paradîgmaya newî de têkoşîn dahîna xurtêr kerd û Kurdîstan û Rojhelatê Mîyanênî de verê averşîyayîşanê girdan akerd. Ewro sere de şar û cinîyê Kurdîstan û Rojehlatê Mîyanênî,  heme dinya de  cinî, şar û bindestî fîkranê Rayber Apoyî qebul kenê û danê ciwîyayene. No zî mojneno ke komplo nêresayo hedefê xo.

Her çiqas komplo mereso hedefê xo zî, bi temamî  betal nêbîyo û nêqedîyayo. Bi qirkerdişê kurdan yeno waştene ke komplo bêro temamkerdene. Xora komployê vera Rayber Apoyî vera şarê kurdî ame kerdene. Heta ke sîstemê Îmraliyî û esareto fîzîkî yê Rayber Apoyî bibo, komplo do dewam bikero.  Komployê Mîyanneteweyî  ewro hetê îqtîdarê AKP-MHPyî ra yeno domnayene. AKP eslê xo de seba ke xizmetê komployî bikero, qirkerdişê kurdana bido domnayene ame ronayene. AKP û Erdogan bi nê waştîşî ameyî îqtîdar. Seba ke AKP têna nêeşka komployî ser bifîno, îtîfaqê AKP-MHPyî ame ronayene.

Bêşik heta ewroyî têkoşînî ma nêverda komplo ser bikewo. Ewro ra tepîya zî semedê şiknayîşê sîstemê îşkence û tecrîdî yê Îmraliyî û caardişê azadîya fîzîkîye ya Rayber Apoyî ganî têkoşîn bêro xurtêrkerdene ke komplo bêro betalkerdene.  Têkoşînê vera kopmloyî warê mîyanneteweyî de yeno kerdene. No averşîyayîşêko zaf muhîm o.  Ma veng danê kurdan û dostanê înan ke wa her hetî de têkoşînî xurtêr bikerê ke komplo bi temamî bêro betalkerdene. Ma veng danê hêzanê ke mîyanê Komployê Mîyanneteweyî de cirewt,  wa nê tewirê xo caverdî, paştî medê polîtîkayanê qirkerdişî yê vera kurdan ê îqtîdarê faştîstî yê AKP-MHPyî.''