Derheqê 2 ciwananê kurdan de bi îdîaya kişîyayîşê îdarekarê MÎTî hetê hukmatê Başûrî ra bira îdamî dîyaye.Hemserekîya Koneya Rayberdişî ya KCKyî derheqê mesele de eşkerayîyêke daye.

Eşkerayîya KCKyî wina ya:

''17ê temmuza 2019î de Hewlêr de lokantaya bi nameyê Hokkabazî de îdarekarê MÎTî kişîya. 2 ciwanê kurdî bi îdîaya kiştişê nê kesî ameyî hukmkerdene û derheqê înan de bira îdamî dîyaye. Seba ke Tirkîya memnun biba Başûrê Kurdîstanî de mehkemeya înan cade ameye kerdene. Bi nê hawayî eşkera bi ke Başûrê Kurdîstanî de kiştişê endamanê kiştoxan ê MÎTî sûcêko pîl o.

Nêame qetîkerdene ke no kiştoxê MÎTî hetê nê ciwanan ra kişîya yan nê û eke wina yo çira kişîya. Kiştoxê winasênî Başûrê Kurdîstanî de binê pawitişî de bi rehetî gêrenê, no zî seba ciwananê kurdan sebebê texrîk o.Coka nêno qebulkerdene ke nê ciwanan rê cezaya îdamî dîyaye. Bi taybetî nameyê şarê kurdî û hukmkerdişê kurdî ser o ê nêeşkenê bira winasêne bidê. Coka na bire bîye hedefê nêrazîbîyayîşanê şarê ma.

Nê kesê merdeyî her çi ra verî hukmatê Başûrê Kurdîstanî xapîna û seba îstîxbarat û kiştişî şîyo xebate kerde. Endamê Konseya Hemserekîya Pêroyî Dîyar Xerib (Helmet) zî netîceya xebatêka winasêne de kişîyabi. Embazê ma Demhat û Cemîl zî wexto ke seba ke karêkê dîplomasî Silêmanî de bibî netîceya xebatanê winasênan ê îstîxbaratî de kişîyayî. No endamê MÎTî zî bi nasnameyê konsolosîye wexto ke xebatanê winasênan kerdêne kişîya.

Sey Têgêrayîşê Azadîye yê Kurdîstanî ma roja verêne vat ke yew eleqeyê ma nê serebûtî reyde çin o. Yeo vatene ke nê wird ciwanî vakurij ê û coka nêzdîyê ma yê. No fikro bêmantiq nêno qebulkerdene. 

Nê wird ciwanan keso ke Kurdîstan de cînayet û sûcî kerdêne, kişt. Coka ganî înan rê ne cezaya îdamî ne zî cezaya zîndanî ya bi mengan bêra dayene.

Goreyê huqûqê şerî ganî nê wird ciwanî cade bêrê veradayene. Nêbo kerdişê nê kiştoxê MÎTî normalîze benê û cezaya îdamî zî bena meşrû. Wijdan û welatperwerîya kurdan do qey naye qebul nêkera. Coka gaî hukmatê Başûrê Kurdîstanî, mehkeme û dezgehê hukmî ganî nê wird ciwanan vera bidê. 

Pê waştişê dewleta dişmenî derheqê ciwananê kurdan de bira îdamî dîyaye. Na bira îdamî wijdanê kurdan şeqiznena û nêna qebulkerdene.

Keyeyanê wird ciwanan zî eşkera kerd ke ganî domanê înan bêrê veradayene. Nê esasî ser o ma venga şarê kurdî, dezgehanê demokratîkan ê kurdan, roşnvîr û hunermendanê kurdan, sîyasetmedaran danê ke vera na bire vejîyê û seba ke nê wird ciwanî bêrê veradayene têbigêrê.

Ganî dormeyê Hemleya 'Wext Wextê Azadîye yo' de seba veradîyayîşê nê ciwanan zî xîret bêro kerdene.

PDK eke têna seba memnunîyetê TCyî bira îdamî bîyaro caardene do şaşîyêka tarîxîye bikero. Coka ganî PDK nê ciwanan vera bido.

Mumkîn nîyo ke ma bira winasêne qebul bikerê. Ma zanenê ke pêro hêzê sîyasî yê kurdan, sere de ê Başûrî şarê pêro parçeyanê Kurdîstanî zî na bire do qebul nêkerê. Seba ke nê ciwanî hînî şorê keyeyê xo ma venga her kesî danê ke berpirsîyarîya xo bîyaro ca.''