Hemserekîya Konseya Rayberdişî ya KCKyî bi wesîleya serrgêra 10. ya Şorişê Rojawanî eşkerayîyêka nuştekîye daye.

Eşkerayîye wina ya:

''Ma serrgêra 10. ya Şorişê Rojawanî yê 19ê Temmuze yo ke şorişo tewr manadar û pîl ê seserra 21. o, pêro şaranê Rojawanî, cinî û ciwanan û şaranê dinya rê fîraz kenê. Ma şexsê şehîdanê Şorişê Rojawanî de pêro şehîdanê demokrasî û şorişî bi rêzdarî yad kenê û înan rê sipas kenê.

Şorişê Rojawanî yê 19ê Temmuze şorişêko pîl ê cinîyan û şaran o ke vera serdestan şaran da û seserra 21. de resa serfîrazîye. Seke şorişanê bînan ê bindestan Şorişê Rojawanî zî vera zulm, kolonyalîzm, netêdûştîye û neheqîye bi têkoşînêkê pîlî û bedelanê pîlan ame kerdene. Coka Şorişê Rojawanî yew parçe û eserê mîrasê merdimîye yo. Şorişê Rojawanî yê 19ê Temmuze taybetmendîyê xo zî afernayî û erjê girîngî dekerdî şorişanê dinya.

Taybetmendîyanê şexsîyan ê Şorişê Rojawanî ra yew zî no yo ke no şoriş îqtîdar û dewletbîyayîşî hedef nêkeno û awankerdişê komelê azadîperest û demokratîkî yê bi îradeyê şaran paweno. Na taybetmendîya Şorişê Rojawanî kerd ke sîstemê kolonyalîzmî wedarno, bireso armancê şorişî utopyayêka cuya azade û têdûşte. No serkewtişê Şorişê 19ê Temmuze zaf girîng o û qewimîyayîşêko tarîxî yo. Şorişê bînî yê tarîxê şaran seba ke îqtîdar û dewletbîyayîş kerdbi hedef nêresayî armancê xo û hetê sîstemê serdestan ra ameyî binvistene. Bi nê hawayî rixmê hende şorişan zî sîstemê kolonyalîzmî nêame çinkerdene. Şorişê Rojawanî na rewşe çareser kerde. Na rewşe tarîxê dinya de qewimîyayîşêkê zaf girîngî îfade kena. Bêguman afernayoxê nê fikrî Rayber Apo yo. Rayber Apoyî pê sîstemê Konfederalîzmê Demokratîkî û hişmendîya komelî ya exlaqî û polîtîke na mesele çareser kerde û Şorişê 19ê Temmuze nê bingeyan ser de ronîya. Coka Şorişê 19ê Temmuze bi paradîgma û fikranê Rayber Apoyî qewimîya.

Taybetmendîyanê tewr girîngan ê Şorişê 19ê Temmuze ra yew zî no yo ke no şoriş hişmendîya neteweya demokratîke ser o ronîyayo. Sîstemê Neteweya Demokratîke kerd ke meseleya tewr girînge ya Rojhelatê Mîyanênî çareser biba; şarî pîya bê pêkewtiş biciwîyê û xo îdare bikerê. Sîstemê dewleta neteweperwere û nîjadpereste kerd ke Rojhelatê Mîyanênî de meseleyî bibê giranêr, şarî bikewê pê û yewbînan qir bikerê. Sîstemê dewleta neteweperwere û nîjadpereste dûştê hişmendîya pîyaciwîyayîşî yo. Xora no sîstem hetê modernîteya kapîtalîste ra ameyo awankerdene û kokê ci de netêdûştî û kolonyalîzm est ê. Şorişê 19ê Temmuze sîstem û hişmendîya Neteweya Demokratîke esas gêno, meseleyanê Rojhelatê Mîyanênî çareser keno û keno ke şarî pîya biciwîyê.

Bêguman taybetmendîya tewr girînge ya Şorişê Rojawanî zî na ya ke cinî û azadîya înan esas kerdo. Şorişê 19ê Temmuze manaya raştikêne de bîyo şorişê cinîyan. Caardişê şorişê serê bingeyê azadîya cinîyan bi derbazkerdişê ferasetê serdestî yê camêrdan tarîx de yewîn o. Bêguman kede û rolê cinîyan her şoriş de bibî. La Şorişê 19ê Temmuze serkêşîya cinîyan de qewimîya û cinîyî bi îrade tede bîyî. La Şorişo ke paştîya xo dano serkêşî û îradeyê cinîyan averşîyayîşêko girîng û tarîxî yo. Şorişê 19ê Temmuze bi serkêşîya cinîyan û azadîya cinîyan rayîro ke bieşko meseleyanê komelkîyan wedarno awan kerdo.

Pawitişê Şorişê Rojawanî vera hêrişanê îşxalî erk û mesuldarîya bingeyî ya şorişgêrî û welatperwerî ya. Faşîzmê AKP-MHPyî yo ke wayîrê hişmendîya dişmenîya kurdan a, bi refleksê hêriş û çinkerdişê her çîyê kurdayetîye têgêrena û wazena Şorişê Rojawanî tasfîye bikera. Dewleta tirke verî zî beşêkê Rojawan û Sûrîye îşxal kerdo û kerdişanê xiraban reyde herême de demografî vurnena. Dewleta tirke û îqtîdarê AKP-MHPyî dişmenê kurdan ê û peynî de seba caardişê qirkerdişê kurdan wazena estbîyayîşê kurdan werte ra wedarna. Îşxalê Rojawanî û wedaritişê Sîstemê Demokratîkî yê Rojawanî zî sey safhaya tewr girînge ya nê armancî vînena. Ê qetî seba ney wazenê Rojawanî îşxal bikerê û şorişî tasfîye bikerê.

Faşîzmê AKP-MHPyî ra verî, peyê perdeyî de pê cergan bi taybetî pê DAÎŞî înan kerd ke şorişî tasfîye bikerê la pê nêeşkayî. Coka dewleta tirke bi xo wazeba şorişî tasfîye bikera. DAÎŞo raştikên AKP-MHP yo û vera îşxalê faşîzmê AKP-MHPyî sere de hêz û şarê Rojawanî ganî her kes vinderê û wayîrê tewirêkî bibê. Krîterê kurdayetîye, welatperwerî, şorişgêrî û demokratîkbîyayîşî no yo. Êyê ke vera îşxalî tewirî nêgênê nênê qebulkerdene. Hêzanê rojawanî vera DAÎŞî bi hezaran şehîdî dayî û DAÎŞ vindarna. Hêzanê Rojawanî bi nê hawayî têna Rojawan nê pêro dinya belayêke ra xelisnaye. La Amerîka, NATO û dewletê Ewropa bi hawayêkê zelalî paştî danê polîtîkayanê qirkerdişî yê AKP-MHPyî ke wayîrê hişmendîya DAÎŞî yo. Amerîka, NATO û dewletê Ewropa hol zanenê ke îqtîdarê AKP-MHPyî seba Rojawan, Sûrîye û pêro dinya gef û meseleya asayîşî ya. La ê seba menfaatanê xo yê sîyasî û ekonomîkan paştî danê AKP-MHPyî. Coka nê dewletî hemkarê polîtîkayanê qirkerdişê kurdan ê AKP-MHPyî yê. Ganî şar û dormeyê demokratîkî yê nê welatan vera ney tewirê xo bimojnê û vera paştdayîşê bi AKP-MHPyî  û planê îşxalê Rojawanî rayîr nêdê.

Şarê ma û Gerîlayê Azadîye yê Kurdîstanî her ca de vera hêrişanê qirkeran ê faşîzmê AKP-MHPyî mîyanê têkoşîn û xoverdayîşêkê pîlî de yê. Sey Têgêrayîşê Azadîye ma venga pêro şaranê dinya, dormeyanê şorişgêr û demokratîkan danê ke sey vizêrî ewro zî hetê şaranê Rojawanî de vinderê û Şorişê Rojawanî bipawê. Şorişê Rojawanî şorişo hempar ê pêro cinî, bindest, şaran û merdimîye yo. Vera îşxalî pawitişê Rojawanî erkê her kesî yo. Netîceya têkoşînê hemparî yê hêz û şaranê Rojawanî de û bi paştdayîşê şaranê dinya û cinîyan, faşîzmê AKP-MHPyî do bin bikewo, Şorişê 19ê Temmuze, şorişo hempar ê şaran û cinîyan do estbîyayîşê xo bipawo.Bi na bawerî ma reyna Şorişê 19ê Temmuze serrgêra ci ya 10. de pêro şaranê Rojhelatê Mîyanênî, bi taybetî şaranê Rojawanî rê, cinîyan û şaranê dinya rê fîraz kenê.''