Hemserekîya Konseya Rayberdişî ya KCKyî bi eşkerayîyêke 33 ciwanê sosyalîstî yê Tirkîya yê ke yad kerdî ke 20ê temmuza 2015î de hetê AKP-MHPyî ra Pirsûs de ameybî qetilkerdene.

Eşkerayîye wina ya:

''Vera ciwananê sosyalîstan ê Tirkîya Pirsûs de 20ê temmuza 2015î de hêriş ame kerdene û 33 ciwanî ameyî qetilkerdene. Ma nê hêrişê namerdî yê AKP-MHPyî şermezar kenê, şehîdanê Pirsûsî bi rêzî yad kenê û rîyê xo verê înan de anê war. Şexsê înan de ma soz danê ke tim perwerê şehîdan bibê.

Nê endamê Têgêrayîşê Ciwananê Sosyalîstan ê ke Pirsûs de qetil bîyê, bi paştdayîşê xo yê sosyalîstî bi wayîrê rolêkê tarîyî. Nê ciwanî hêrişanê DAÎŞî ra dima seba newe ra awankerdişê Kobanê têgêrayêne. Şorişgêrê şehîdî yê Pirsûsî bîyê temsîlkarê tradîsyonê pîlî. Ma sey hemrayanê înan ganî nê tewirê tarîxî fam bikerê û goreyê ci têkoşîn bikerê.

Îqtîdarê AKP-MHPyî yo ke dişmenê kurdan o û faşîst o, destpêkî ra nata xîret keno ke Şorişê Rojawanî çin bikero. Îqtîdarê AKP-MHPyî yo ke DAÎŞî weye keno, bi taybetî Şingal û Kobanê her ca de hêrişê kurdan keno. Wexto ke DAÎŞ Rojawan de bin kewt planê şefê faşîstî Erdoganî û îqtîdarê ci zî bin kewtî. Coka îqtîdarî planêko newe vist dewre û kerd ke pê çinkerdişê Şorişê Rojawanî newe ra Rojhelatê Mîyanênî de kanwazî aver bero. Gamêka nê konseptî ya girînge zî qirkerdişê kurdan û teyna verdayîşê têkoşînê kurdan bîyî. Bi nê hawayî îqtîdarê AKP-MHPyî armanc kerd ke têkoşînê sosyalîst û demokrasî yê Tirkîya têkoşînê kurdan ra dûrî bifîno û verê demokratîkbîyayîşê Tirkîya bigêro. Qirkerdişê Pirsûsî çarçewa nê konseptî de ame kerdene. Zanîyeno ke prosesê nê qirkerdişî senî bîyo, mekanîzmaya qirkerdişî senî bîya.

Bêguman paştdayîş û xeta têkoşînê hemparî ya şaran û bindestî hînî zafêr aver kewtê. Bi taybetî kurdî, pêro şarê Tirkîya û Rojhelatê Mîyanênî, cinîyî, şorişgêrî û kesê ke seba sosyalîzm û demokrasî têkoşîn kenê, vera faşîzmê AKP-MHPyî bêmabên xo ver danê. Netîceya nê paştdayîş û têkoşînî de planê çinkerdiş û qirkerdişî ser nêkewtî. Seba ke no konsept bi temamî pûç bibo û faşîzmê AKP-MHPyî bin bikewo ganî têkoşîno hîna pîl bêro kerdene. Bêguman seba ney zî rayîro bingeyînêr hîna zaf pawitişê Şorişê Rojawanî yo. Seba wayîrvejîyayîşê şehîdanê Pirsûsî û tradîsyonê têkoşînê sosyalîstî rayîro tewr raşt û manadar no yo. Nê esasî ser o ma venga her kesî danê ke hîna zaf wayîrê Şorişê Rojawanî vejîyê, vera hêrişanê serê Rojawanî hîna zaf bibê wayîrê tewirî û xeta têkoşînê hemparî pîlêr bikerê.''