Hemserekîya Konseya Rayberdişî ya KCKyî derheqê hêrişê îşxalî de eşkerayîya nuştekîye daye û nê vatî:

''Dewleta tirke şewa ke 23ê nîsane bestena 24ê nîsane de vera Herêmanê Pawitişî ye Medya ke gerîlayî tede hekîm ê, hêrişo hîra da destpêkerdene. Seba ke înan 10ê sibate de Garê de derba pîle werde hêrişo newe ameyêne pawitene. Xora 2014 de Planê Çokdayîşî amebi amadekerdene ke pê tesfîyekerdişê têgêrayîşê azadîye qirkerdişê kurdan hedef keno. No hêriş zî semedê temamkerdişê qikerdişî yeno kerdene.

Hêrişê îşxalî bizanayîş plankerde raştê tarîxê Qirkerdişê Armenîyan  ame. Eşkera vanê ke senî ke ma armenîyî qir kerdî peynîya şima zî do wîna bo. Wazenê mesaj bidê ma. Qirkerdişê Armenîyan senî ke pê paştgêrîya Almanya û bêvengîya  welatanê Ewropa û Amerîka ame kerdene yeno waştene ke pê paştdayîşê Amerîka û Ewropa qirkerdişê kurdan zî bêro kerdene. Selahîyetdaranê Tirkîya verê nê hêrişî Amerîka û welatanê Ewropa pêvînayîşî kerdî. No zî mojneno ke ê paştî danê nê hêrişî. Reyna serekê Başûrê Kurdîstanî reyde zî nê hêrişî ameyî qiseykerdene pê qebûlkerdişê ci hêrişî yenê kerdene.Komployê Mîyannetweyî yo ke 1999î de  şexsê Rayber Apoyî de vera Têgêrayîşê Azadîye  yê Kurdî ame kerdene ewro wina yeno rayraberdene.  Amerîka û welatê Ewropa semedê karê xo û şuxulnayîşê Tirkîya qirkerdişê kurdan qebul kenê û paştî danê ci. Hetê bînî ra tay problemê ke mabênê înan û Tirkîya de estê pê qebulkerdişê qirkerdişê kurdan wazenê hal bikerê.

Sere de PDK hêzê kurdî yê sîyasîyî bi bêvengîye nê hêrişan qebul kenê. Ça de vera kurdan hêriş beno ganî cade heme hêzê sîyasîyî û şarê kurdî nêrazîbîyayîş bimojnê. Bêvengîya hêzanê sîyasîyan ê kurdan ke berpirsîyarîya înan a newteweyîye esta, nêna qebulkerdene.  Başûrê Kurdîstanî ya zî cayanê bînan de PKK û gerîlayî û şarê kurdî  tim vera hêrişan tewir genê. Vera hêrişê wina hîrayî  bêvengîya PDKyî manîdar a.  Xora PDK serrêka dormeyê waranê gerîlayan girewtî û sey Xakurkê eşkera paştî daye artêşa tikre û tewirê xo mojna. La heme şarê kurdî paweno ke PDK vera nê hêrişî nêrazîbîyayîş bimojno. Bêvengîya PDKyî yena manaya paştdayîşê hêrişî. Eke PDK vera hêrişî vejîyo dewleta tirke nêeşkena paştdayîşê mîyanneteweyî bîgêro û cesaret nêkana wina hêriş bikero. Hêrişê dewleta tirke îrdayê sîyasîyî yê Iraqî zî binpay keno û yewîya ci tehdît keno. Eke Iraq vera nê hêrişî vejîyo hêrişî sey nemeşru yenê vînayene û benê zehîf. Eke vera ci mevejîyo nê hêrişî benê normal û rojanê verê ma de benê sebebê letebîyayîşê Iraqî. Iraq ganî berpirsîyarîya xo bîyaro ca û vera nê hêrişan cade eşkerayîye bido. Eke Iraq bêveng bimano sey wertaxê nê hêrişî do tarîx de cayê xo bîgêro.

Şarê kurdî dostê înan û hêzê demokrasîyî wa bizanê ke nê hêrkşê qirkerdişî yê. Têna gerîlayî nê şexsê gerîlayan de heme şarê kurdî yeno hedefkerdene. Pê tesfîyekerdişê gerîlayan wazenê qirkerdişê kurdan temam bikerê. Têna Başûrê Kurdîstanî nê heme leteyê Kurdîstanî de wazenê hêzanê azadîye bieciqnê û kurdan qir bikerê.  Nê hetî ra hêrişê vera destkewteyanê Başûr û Rojawanê Kurdîstanî yê. Wa nêro pawtene ke têna xoverdayîşê gerîlayan nê hêrişî şikneno. Pê nê hêrişî yeno waştene ke kurdî werte ra bêrê wedaritene. Coka ganî heme şarê kurdî her ca de wirzo payan ser û bi gerîlan bibo yew. Têkoşînê azadîye yê şarêkî têna pê xoverdayîşê gerîlayan ser nêkewno. Ganî şar û gerîlayî bibê yew û têkoşînê topyekunî rayra berê. Senî ke şarê ma Newroze de wirişt lingan ser ewro wa her cade vejîyo meydanan. Gerîla pê ruhê Cenga Heftanînî û Garê xover dano. Ganî şar zî bi gerîlayan bibo yew û cewabê tarîxî bido. Wext wextê bi ruhê Hemleya ''Wextê ci yo'' xoverdayîş û serewedaritişî yo.

No hêriş eynî wextî de vera Başûrê Kurdîstanî yo. Pê tesfîyekerdişê gerîlayan yeno waştene ke îradeyo sîyasîyî yê Başûrî bêro şikitene û qirkerdiş bêro kerdene.Coka ganî roşnvîr û hunermnedê Başûrî pîya  bi şarî hemleya xoverdayîşî bidê despêkerdene. Her ca ganî vera îşxalî bibo cayê xoverdayîşî. Ganî ruhê xoverdayîşî yê Amedîye, Deralok û Şeladize heme Başûrî ra vila bo û ciwanî zî verê xo bidê sefanê gerîlayan. Dewleta tirke dişmenê heme hêzanê azadîye Rojhelatê Mîyanênî ya. Coka ganî nê hêzî zî vera hêrişê îşxalî kişta gerîlayan de cayê xo bigerê. No xoverdayîş eynî wextî de xoverdayîşê azadîye û demokrasîyî yê şima yo. Ganî heme dinya vera hêrişê dewleta tirke yo ke bi paşdayîşê Amerîka û Ewropa yeno kerden, paştî bido têkoşînê şarê kurdî û gerîlayan.  Sere de Amerîka û Ewropa heme hetê ke paştî danê hêrişê Tirkîya înan rê vengdayîşê ma wina yo; paştdayîşê xo yê hêrişê vera kurdan ê îqtîdarê AKP-MHPyî ra biencê. Hemparê qirkerdişê kurdan nêbê! Senî ke şima 1915 de bêveng mendî û Almanya zî paştî da ewro eynî çî mekerê. Ganî heme şarê dinya vera nê hêrişî nêrazîbîyaîş bimojno.''