Ûgûr Şakaro ke seba protestokerdişê tecrîdê serê Rayberê Şarê Kurdî Abdullah Ocalanî roja 20’ê Sibate şaristanê Krefeldî yê Almanya de adir nabi bedenê xo ra roja 22’ê Adare de Duîsburg de nêweşxaneyo ke tede tedawî dîyêne cuya xo vînî kerdebî.

Hemserekîya Konseya Rayberdişî ya KCK'yî peyamê xo de vat, “Serrgêra 21’ine ya komploya mîyanneteweyîye ya 15’ê Sibate de seba ke komplo protesto bikero welatperwerê ma yê ercayeyî Ûgûr Şakarî adir nabi bedenê xo ra û roja Newroze de resayo şehadetî. O tewrê kerwana şehîdan a şima nêeşkenê rojê ma tarî bikerê bi û bi pirdêk mabênê tarîtî ra ver bi roşnayî.  Ma verê vîrameyîşê Ûgûr Şakarî de bi hurmet xo namnenê, ma soz danê ke ma do amacê ci qetîyen berê sere. Ma veng danê şarê xo ke vîrameyîşê Ûgûr Şakarî rê wayîr vejîyo û mucadeleyê ê bikero berz.”

Eşkerayîye de dewam de nînan rê ca dîya:

“Ûgûr Şakar Dêrsim ra yo ke ûca dewleta Tirkî qirkerdişanê tewr bixofî yê tarîxî ra yewî bica ardo, ewladêko camêrd o welatperwer ê Dêrsimî yo.  O hemrayo candost ê nameyanê sembolan ê Kurdanê Azadan ê sey Mazlûm, Sakîne û Zulkuf Gezenan o ke hetê Rayber Apoyî ra o nasname ameyo afernayene.   Sey bi se hezaran şarê Kurdî Ûgûr Şakar zî netîceyê zext û zordarîyanê dewleta Tirkî ya qirkerdoxe de bi serran mecbûr mendo ke sirgûn de biciwîyo. Waşto ke qesasê nê bi hawayêkê xurtî bi tewrbîyayîşê mucadeleyê azadîye bigêro, mucadele de xo aver berdo û nê de bi ser zî kewto. 

Manaya adirpanayîşê welatperwerê ma yo ercaye Ûgûr Şakarî yê Almanya pîl a. Na çalakî sey ya Ronahî û Berîvanan sere de seba Almanya seba welatanê Ewropa yê ke se serre yo paştî danê dewleta Tirkî ya ke hemverê Kurdan de qirkerdişan kena peyamêko xurt o. Ma zaf rind zanê ke Almanya bi paştîdayîşo ke dana bi serran o îqtîdarê AKP-MHP’yî yê faşîst û qirkerdoxî payra gêna. Îqtîdaro faşîst ê AKP-MHP’yî xusûsen bi paştîdayîş û cesareto ke Almanya ra gêno û bi pêroyî zî bi paştîdayîşo ke Ewropa ra gêno serê Rayberê Şarê Kurdî de tecrîdê mutleqî bica ano û hemverê Kurdan de zî qirkerdiş bica ano.  Eke Almanya û dewletanê Ewropa paştî nêdayêne îqtîdarê AKP-MHP’yî no îqtîdaro faşîst o qirkerdox hende serran payra nêmendêne. Çalakîya Ûgûr Şakarî hemverê paştîdayîşo ke Almanya û Ewropa seba polîtîkayanê qirkerdişê Kurdan dana dewleta Tirkî krîtîk û cewabêko xurt o. Heman wextî de no vengdayîşêk o seba şarê Kurdî û dostanê înan ke mucadeleyî bikerê berz.

Şarê ma bi wayîrvejîyayîşê vîrameyîşê ewladanê xo yê ercayeyan Zulkuf Gezen û Ûgûr Şakarî Newroza 2019’î açarnaya Newroza xoverdayîşê topyekunî û cewabêko pîl dayo dîktatorîya faşîste ya AKP-MHP’yî û paştîdayoxanê aye.  Na Newroze bi serkêşîya Zulkuf Gezen, Ûgûr Şakar û bi hezaran xoverdayoxan de nika ra mujdana serkewtişî ya hemleya “Ma tecrîdî bişiknê, faşîzmî birijnê û Kurdistanî azad bikerê” daya. Şarê ma do xeta nê ewladanê xo yê fedaîyanê ke bêters canê xo seba azadîya Rayberîya xo û seba azadîya şarê xo feda kerdê de xoverdayîşê topyekunî hîna bikero berz û do bi ser bikewo.”