Hemserekîya Konseya Rayberdişî ya KCKyî bi mesajêkî 33 ciwanê sosyalîstî yê ke Pirsûsî de 20ê temmuza 2015î de hêrişê DAÎŞî de ameybî qetilkerdene yad kerdî.

Mesaj wina yo:

''Vera ciwananê sosyalîstan ê Tirkîya 20ê temmuza 205î de Pirsûs de hêrişêk ame kerdene. Hêriş de 33 endamê Têgêrayîşê Ciwananê Şorişgêran ameyî qetilkerdene. Serrgêra şehadetanê nînan de ma nê 33 şorişgêran bi minet û rêzî yad kenê.

Têkoşîn û tewirê hêzanê demokratîkan, sosyalîst û şorişgêran ê seba şarê kurdî û Şorişê Rojawanî averberdişê têkoşînê yewbîyayeyî yê vera kedwerdişî, kanwazî û faşîzmî de rolêko girîng kay kerdo. Şehîdê Pirsûsî sembolê nê têkoşînî yê. Têkoşînê şehîdanê Pirsûsî berdewamîya xeta Denîz Gezmîş, Mahîr Çayan, Îbrahîm Kaypakkaya, Hîkmet Kivilciman aver berde. Denîz Gezmîşî serê sehpaya îdamî de qalê paşydayîşê bi kurdan kerdbi û Rayber Apoyî zî tim girîngîye daye nê tewirî. Şorişê Rojawanî şorişo hempar ê şaranê yewbîyayeyan û na xete yo. Nê esasî ser o tewirê şorişgêrîya tewr raşte pawitişê Şorişê Rojawanî yê şaran o. 

Xîret û têkoşînê şarê Vakurê Kurdîstanî û têgêrayîşanê şorişgêran ê sosyalîstan şiknayîşê hêrişanê DAÎŞî û azadkerdişê Kobanê de dîyarker bîyî. Nê têkoşîn û netîceyanê ci planê îqtîdarê AKP-MHPyî yê faşîstî pûç kerdî. Azadkerdişê Kobanê seba rijnayîşê îqtîdarî wayîrê cayêkê tarîxî yo. Îqtîdarê AKP-MHPyî bi Qirkerdişê Parisî armanc kerd ke rejîmê kanperestî pêro Rojhelatê Mîyanênî rê vila bikero. Hêrişê îqtîdarê AKP-MHPyî yê ewroyînî zî na çarçewe de yê.

Têkoşînê kurdan û şaranê Tirkîya yê yewbîyayî yo ke xeta şehîdanê Pirsûsî de aver şîyo, faşîzmê AKP-MHPyî ardo verê rijîyayîşî. Îqtîdar mîyanê binkewtişî û vilabîyayîşî de yo. Îqtîdar bi plananê xo yê hêriş û qirkerdişî xîret keno ke binkewtişê xo binimno. Hêrişê ci yê vera Başûrî, polîtîkayê ci yê destsernayîşê îradeyî, tecrîdê Îmraliyî, planê ci yê vera Sûrîye û Rojawanî pêro na çarçewe de yê. Vera nê polîtîkayanê AKP-MHPyî xurtkerdişê têkoşînê yewbîyayeyî, tewirê şorişgêrî yo tewr raşt o. Hêzê şorişgêr, demokrat, sosyalîst, azadîgîr û demokratîkî ganî bi na mesuldarîya tarîxîye têbigêrê û têkoşînê yewbîyayeyî yê vera faşîzmî xurtêr bikerê. Nê esasî ser o ma venga her kesî danê ke têkoşînî pîlêr bikero.''