Komîteya Şar û Bawerîyan a KCKyî bi wesîleya Roşanê Çarşema Sore yê êzidîyan mesajêk weşana. Mesaj wina yo:

‘’Ma roşanê Çarşema Sore ya êzidîyan fîraz kenê ke şarê ma yê êzidîyan kokê xo ser de xo newe ra afernayo, bi erjanê xo yê kulturelan ê qedîman bîyo yew û ameyoxê xo yê azadî awan keno. No roşan hetê kurdan ra sey ‘Çarşemeyê Serê Nîsane’ zî yeno fîrazkerdene. Ma wina hêvî kenê ke no roşan do bibo wesîleya demokrasî, azadî, haştî, way û biratîya şarê êzidîyan û pêro kurdan.

Emser Şingal de êzidîyî binê hêrişanê dewleta Iraqî, tedaya dewleta tirke de Çarşema Sore pêşwazî kenê. Şarê ma yê êzidîyan ancî tehlukeyê qirkerdişî de têrî yo. Vera nê tehlukeyî tek rayîrê felate pawitişê estbîyayîşî, caardişê komelkîbîyayîşî û rêxistinkerdişê xo yo. Ganî Êzidîtîye bêra pawitene. Ganî vera hêrişanê serê êzidîyan Komelo Demokratîk bêro awankerdene. Seba êzidîyan modelo tewr raşt Modelê Îdareyê Xoserî yo. Bi na wesîle ma venga şarê ma yê Başûrî zî danê ke têkoşînê Şingalî sey têkoşînê xo yê demokrasîyî bivîno, wayîrê ci vejîyo û destek bido ci.

Şarê ma yê êzidîyan o ercîyaye;

Roşanê Çarşema Sore goreyê ruh û bawerîya xo bibo wesîleya ganîbîyayîş û afernayîşanê neweyan. Netîceyê ke têkoşînê kurdan bi taybetî ê kurdanê êzidîyan afernayê kelecanê Çarşema Sore ya 2025î zêdînenê. Ma veng danê ke sey şar zî nê prosesî hol fam bikerê. Ma veng danê ke bi erjanê komelkîyan, xeta welatperwerîye de, bi hişmendîya Apogîre rêxistinîya neteweya demokratîke û karê awankerdişê komelê demokratîkî bikerê.

Wa şarê ma yê êzidîyan vera tehlukeyan xopawitişî xurtêr bikero, verê xayîn û ajanan de bi mesuldarî têbigêro û xeta welatperwerîye de şoro. Wa êzidîyî bi xurtkerdişê yewîya xo ya zereyî vera hêrişanê qirkerdişî, tedayan û şerê taybetî erkanê xo bîyaro ca. Bi na wesîle ma ancî Roşanê Çarşema Sore fîraz kenê. Ma şexsê Birnevş, Xanê, Mam Zekî Şengalî, Dijwar Feqîr û Zerdeştan de pêro şehîdanê Şingalî yad kenê û ma soz danê înan ke dewaya Demokrasî û Azadîye ser bivisnê.’’