Hemserekîya Konseya Rayberdişî ya KCKyî cewab da mektubê şarê Binarê Qendîlî. Eşkerayîye de nê ameyî parekerdene:

''Ma verê şarê Kurdîstanî de cewabdayîşê mektubê şima sey wezîfe vînenê. Ma sere de bi wesîleya şehadetê ci ya verêne hemra Dîyar Xerîb (Helmet) yo ke hetê şarê Başûrî ra zaf yeno heskerdene, yad kenê û sozê caardişê waştişanê şehîdan newe kenê.

Şarê ma yo erjaye;

Herra Başûrî de bitaybetî zî  herêma Qendîl de tarîxê têkoşînê kurdan rolo mîhîm kay kerdo. Na herre bi des serran o ke xoverdayîşî rê şahîde kena. Na cografyaya biheybete ya Kurdîstanî heme têgêrayîşanê kurdan rê wayîrîyê keyeyî kerda. Şarê Başûrî bi des serran o ke vera dişmenî xover dano ke bedelê girdî ameyî dayene. Keleyanê pêtan ê nê têkoşînî ra yewe zî warê Qendîlî û şarê Binerê Qendîlî yo. Coka Qendîl timûtim hedefê hêrişî de yo. Verî rejîmê Bassî û vîst panc serran ra nata zî dewleta tirke hêrişê Qendîlî kena. Dewleta tirke çar perçeyanê Kurdîstanî de kurdan rê dişmenîye kena ke rêjîmê Baasî ra wetêr a. Na dewlete cenaza û goranê kurdan rê zî dişmenîye kena ke ma vera nînan semedê pawitişê ertbîyayîşê kurdan û azadkerdişê ci têkoşîn kenê. Ma yê ke çar perçeyan de verê dişmenî têkoşîn kenê waştişê ma yo tewr peyên oyo ke mabênê kurdan de xusumet vejîyo. Coka ma wazenê ke mabênê rêxistine û partîyanê kurdan de dişmenîye nê dostîye bibo. Xusumetê mabênê kurdan dişmenî rê xizmet keno. Ma bi nê zanayîşî nizdîyê meseleya Zînî Werte benê.

Şarê ma yo erjaye;

Ma sey têgêrayîşî nê demê krîtîkî de Zînî Werte de cakerdişê leşkeran sey tehlukeyî vînenê.  Dewleta tirke ya îşxalkere Heftanînî de vakurî ra çeteyê DAÎŞî zî başûrî ra hêriş kenê ke nê hêrişî zêdîyenê. Demê winayênî de Zînî Werte de cakerdişê leşkeran çinayî rê xizmet keno, ganî şarê ma nayî holêr vîno û raşt fam bikero.Wezîfeyo verên ê partî û hêzanê çekdaran ê kurdan oyo ke vera îşxalkeran erdê xo bipawê. Hêgayanê şarî vêşnenê ke vêşanîye rê mehkum bikerê. Gerek ma destûrê naye mede. Gerek ma polîtîkaya dewleta tirke ya ke wazena kuran cêser bifîno û biverdo pê, ya mexapê.

Seba ke ma tim yewîya kurdan wazenê vera hêrişê DAÎŞî bi vengdayîşê şar û partîyanê sîyasîyî yê Başûrî ma Kerkukî ra heta Şingalî pîya bi pêşmergeyan herra Kurdîstanî pawit. Nê têkoşînî de bi desan gerîlayî pêşmergeyan a pîya şehîd bîyî. Ewro zî ma herra Heftanînî vera îşxalê tirkan pawenê. Waştişê şima yê derheqê Zînî Werte waştişê ma yê zî. Ma zî wazenê ke hema ke rewşe xirabêre nêbîya na mesela bêro çareserkerdene. Tewirê şarê ma eşkeno verê rewşa bitehluke bîgêro ke ma tewirê şima teqdîr kenê. Ma bawer kenêke tewirê şarê Binerê Qendîlî plananê leyminan ê dişmenî do  bixeripno. Ma reyna wazenê vajê ke badê şehadetê hîrê embazanê ma yê Qendîlî heta ewro eke ma çîyêk nêkerdo, no semedê tewirê şarê ma yê Zînî Werte yo. Têna Zînî Werte nê semedê çareserkerdişê heme problemanê ma  ganî sey gama verêne Kongreya Neteweyîye bêro pêser. Ma bi wesîleyê mektubê xo reyna tîya ra veng danê ke wa heme hetî binê serbanê Kongreya Neteweyîye de bêrê têhet.

 Şarê ma yo erjaye yê Binarê Qendîlî;

Seba ke hemrayê ma Helmetî zaf yewîya kurdan waştêne û semedê naye zaf kede daya û roja serrgêra şehadetê ey de cewabê mektubê şima danê. Têgêrayîşê ma heta ewro bi des hezaran şehîdî dayî ke têkoşînê caardişê amancanê nê şehîdan dano. Tewirê ke nê amancan rê xizmet nêkenê ma tim vera ci bî û ewro ra tepîyazî ma do vera nînan bi. Şarê Binerê Qendîlî ke keyeyêko bê şehîd tede çîno, rê vengdayîşê ma no yo ke wa rixmê heme herişan vera dişemenî xeta şehîdan de têkoşînî gird bikerê. Kayanê dişmenî yê ke wazen kurdan yewbînan rê bidê kiştene, rê mexapê. Şima bi tewirê xo eşkenê kayanê dişmenî raşanê. Bi nê hîsan û fîkran şima bi hurmet û heskerdiş selam kenê.''